មន្រ្តីនគរបាលជាន់ខ្ពស់របស់ថៃបានបញ្ចេញព័ត៌មានថា ការបាញ់សម្លាប់លោក លិម គិមយ៉ា អតីតតំណាងរាស្រ្តគណបក្សសង្រ្គោះជាតិ ក្នុងទីក្រុងបាងកក ប្រទេសថៃ កាលពីសប្តាហ៍មុន គឺជា«ការសងសឹកផ្ទាល់ខ្លួន» រវាងមេខ្លោងនៃឃាតកម្ម និងជនរងគ្រោះ។ នេះបើយោងតាមសារព័ត៌មានថៃឈ្មោះ Khaosod ដែលបានដកស្រង់សម្តីរបស់មន្រ្តីនគរបាលថៃ និងបានចុះផ្សាយកាលពីថ្ងៃពុធ។
អគ្គស្នងការនគរបាលថៃ លោក Kittirat Panpetch ត្រូវបានដកស្រង់សម្តីតាមរយៈសារព័ត៌មានថៃថា ករណីបាញ់ប្រហារនេះជា«ជម្លោះផ្ទាល់ខ្លួន» និងជា«ការសងសឹកផ្ទាល់ខ្លួន»តែប៉ុណ្ណោះ។ លោកបញ្ជាក់ថា វា«មិនមែនជារឿងនយោបាយ»ឡើយ។
ទោះជាយ៉ាងណា លោកមិនបានបញ្ជាក់ថា ជម្លោះអ្វីឱ្យពិតប្រាកដទេ។
ការអះអាងរបស់មេនគរបាលថៃ ខណៈអាជ្ញាធរថៃបានស្នើប៉ូលិស Interpol ឱ្យឃាត់ខ្លួនជនជាតិកម្ពុជាពីរនាក់ ដែលសង្ស័យថាពាក់ព័ន្ធនឹងរឿងឃាតកម្មនេះ ក្នុងនោះមានលោក លី រតនរស្មី ទីប្រឹក្សារបស់លោក ហ៊ុន សែន ដែលត្រូវបានសង្ស័យថាបានផ្តល់ប្រាក់ដល់ជនដៃដល់ និងលោក ពេជ្រ គឹមស្រ៊ិន ដែលត្រូវបានគេកំណត់ថាជាអ្នកឱ្យសញ្ញា និងរូបភាពដល់ឃាតករជាជនជាតិថៃ។
បើទោះមានការអះអាងពីនគរបាលថៃអំពីជម្លោះផ្ទាល់ខ្លួននៅក្នុងឃាតកម្មនេះ មន្រ្តីគណបក្សជំទាស់មួយចំនួនមិនជឿការអះអាងរបស់ប៉ូលិសថៃឡើយ។
លោក អ៊ុំ សំអាន អតីតតំណាងរាស្រ្តរបស់គណបក្សសង្រ្គោះជាតិ បានស្នើឱ្យថៃស៊ើបអង្កេតបន្តទៀត ដោយលោកមិនជឿថាជារឿងសងសឹកផ្ទាល់ខ្លួនឡើយ។
លោកបន្ថែមថា លោក លិម គិមយ៉ា និងលោក លី រតនរស្មី មិនដែលមានជម្លោះជាមួយគ្នា ហើយលោក លិម គិមយ៉ា រស់នៅប្រទេសបារាំង ហើយលោក លី រតនរស្មី រស់នៅកម្ពុជា និងថៃ។
លោក អ៊ុំ សំអាន បារម្ភអំពីការបន្ធូរបន្ថយឃាតកម្មនេះ កុំឱ្យវាក្លាយជារឿងធំ ខណៈលោកថា អតីតនាយករដ្ឋមន្រ្តីកម្ពុជា លោក ហ៊ុន សែន មានទំនាក់ទំនងល្អជាមួយមេដឹកនាំថៃបច្ចុប្បន្ននេះ។
លោកប្រាប់វីអូអេថា៖ «ឬក៏អាចរដ្ឋាភិបាលអ្នកស្រី Paetongtarn គាត់មិនចង់ឱ្យរឿងហ្នឹងល្បីផ្សព្វផ្សាយ។ វាជារឿងនយោបាយ ព្រោះវាអាចប៉ះពាល់ដល់វិស័យទេសចរណ៍នៅថៃ ដោយសារប្រទេសថៃមានភ្ញៀវទេសចរណ៍ច្រើន ក៏អាចថាបាន»។
លោកជំរុញឱ្យរដ្ឋាភិបាលបារាំងត្រូវឃ្លាំមើលការស៊ើបអង្កេតរបស់អាជ្ញាធរថៃ ដោយសារជនរងគ្រោះមានសញ្ជាតិបារាំង។
ចំណែកលោក មុត ចន្ថា អតីតមន្រ្តីគណបក្សជំទាស់មួយរូប បានបង្ហោះសារនៅលើហ្វេសប៊ុករបស់លោកថា «គេកំពុងរៀបចំឈុតឆាក ដើម្បីក្រឡៃផែនការធ្វើឃាត»លើលោក លិម គិមយ៉ា។ លោកបន្ថែមថា ជនរងគ្រោះពុំដែលស្គាល់លោក លី រតនរស្មី ឡើយ។
លោកបញ្ជាក់ថា៖ «ចំពោះមនុស្សមិនដែលស្គាល់គ្នា និងមិនដែលមានទំនាក់ទំនងជាមួយគ្នា តើមានហេតុផលអ្វីដែលបង្កើតឱ្យមានជម្លោះបុគ្គលជាមួយគ្នាយ៉ាងដូចម្តេចកើត? ហេតុផលនេះមិនសមរម្យ ហើយវា[ជា]រឿងប្រឌិតបង្វែរទិសដៅ»។
កាលពីថ្ងៃពុធ តុលាការព្រហ្មទណ្ឌថៃបានចេញដីកាចាប់ខ្លួន លោក លី រតនរស្មី ដែលជាជនជាតិខ្មែរ និងជាសមាជិកគណបក្សប្រជាជនកម្ពុជា ពាក់ព័ន្ធនឹងការផ្តល់ប្រាក់ដល់ឃាតករដែលបានសារភាពថាបានបាញ់សម្លាប់លោក លិម គិមយ៉ា។ នេះបើតាមសារព័ត៌មានថៃឈ្មោះ Thai PBS ដែលចេញផ្សាយនៅថ្ងៃពុធ។
លោក លី រតនរស្មី ត្រូវបានអាជ្ញាធរថៃអះអាងថា មានឈ្មោះថៃថា Somwang Bamrungkit អាយុ៤៣ឆ្នាំ។ លោកត្រូវបានចោទប្រកាន់ថា បានជួលខ្មាន់កាំភ្លើងជាជនជាតិថៃឱ្យបាញ់សម្លាប់លោក លិម គិមយ៉ា កាលពីសប្តាហ៍មុន។
លោក លី រតនរស្មី អតីតសកម្មជនគណបក្សជំទាស់ មានតួនាទីជាទីប្រឹក្សារបស់ លោក ហ៊ុន សែន ប្រធានគណបក្សប្រជាជនកម្ពុជា និងបច្ចុប្បន្នជាប្រធានព្រឹទ្ធសភា។ នេះបើតាមសេចក្តីសម្រេចរបស់គណបក្សប្រជាជនកម្ពុជា ចុះថ្ងៃទី២៣ ខែមករា ឆ្នាំ២០២៤ ដែលត្រូវបានផ្សព្វផ្សាយនៅលើសារព័ត៌មាន Freshnews ដែលស្និទ្ធនឹងរដ្ឋាភិបាល។
លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា ប្រាប់វីអូអេកាលពីថ្ងៃពុធថា ការចេញដីកាចាប់ខ្លួននេះជាសមត្ថកិច្ចរបស់តុលាការថៃ ហើយវាមិនពាក់ព័ន្ធនឹងថ្នាក់ដឹកនាំនៅប្រទេសកម្ពុជាទេ។ លោកបន្ថែមថា ការប្រព្រឹត្តអំពើខុសច្បាប់របស់បុគ្គលជាទីប្រឹក្សា «គឺជាការទទួលខុសត្រូវរបស់អ្នកប្រព្រឹត្តផ្ទាល់ខ្លួន មិនមានពាក់ព័ន្ធអីដល់ថ្នាក់ដឹកនាំទេ»។
លោក សុខ ឥសាន បន្ថែមថា ការភ្ជាប់ឃាតកម្មនេះទៅថ្នាក់ដឹកនាំកម្ពុជា គឺជា«ការចោទដោយគ្មានហេតុផល» និង«ការចោទ[បែប]និន្នាការនយោបាយ»។
លោក ទូច សុខៈ អ្នកនាំពាក្យរបស់ក្រសួងមហាផ្ទៃប្រាប់វីអូអេនៅថ្ងៃព្រហស្បតិ៍ថា ប្រសិនបើរដ្ឋាភិបាលថៃស្នើសុំចាប់ខ្លួនក្នុងប្រទេសកម្ពុជា កម្ពុជាមាន«ឆន្ទៈមុះមុត»បំពេញកិច្ចសហការជាមួយថៃ។ លោកបន្ថែមថា ការបញ្ជូនមនុស្សទៅថៃ ឬយ៉ាងណា កម្ពុជានឹងពិនិត្យមើលទិដ្ឋភាពច្បាប់ជាក់ស្តែងរវាងប្រទេសទាំងពីរ៕
វេទិកាបញ្ចេញមតិ