អាជ្ញាធរហុងកុងបានលុបចោលការចរចាជាមួយនឹងបាតុករគាំទ្រលទ្ធិប្រជាធិបតេយ្យដែលបានកាន់កាប់ផ្នែកខ្លះនៃទីក្រុងហុងកុង ក្រោយពេលដែលក្រុមបាតុករបានសច្ចាថានឹងបង្កើនការមិនគោរពបញ្ជារដ្ឋាភិបាល។ មេដឹកនាំក្រុមបាតុករបាននិយាយថា គេត្រូវការដាក់សំពាធបន្ថែមទៀត មុនពេលការចរចាដើម្បីធានាឲ្យបាននូវការវិវត្តទៅមុខទៅរកការបោះឆ្នោតដោយផ្ទាល់ពីប្រជាពលរដ្ឋ។
អ្នកស្រី Carrie Lam បុគ្គលិកស៊ីវិលជាន់ខ្ពស់របស់ទីក្រុងហុងកុង និយាយថា ក្រុមបាតុករកំពុងតែប្រព្រឹត្តិទង្វើរមិនគប្បី ដោយគំរាមថានឹងពង្រីកការធ្វើបាតុកម្មរយៈពេល២សប្តាហ៍ដើម្បីកាន់កាប់ផ្នែកខ្លះនៃទីក្រុងហុងកុង។
កាលពីល្ងាចថ្ងៃព្រហស្បតិ៍ អ្នកស្រី Lam ដែលជាប្រធានរដ្ឋលេខាធិការរបស់ទីក្រុងហុងកុង បានលុបចោលការចរចារដែលបានកំណត់ធ្វើនៅថ្ងៃសុក្រនេះ។
កាលពីពេលរសៀលថ្ងៃព្រហស្បតិ៍នេះ មេដឹកនាំក្រុមអ្នករៀបចំការកាន់កាប់ទីក្រុងបានប្រកាសអំពី“គម្រោងថ្មីមួយនៃការមិនគោរពបញ្ជារដ្ឋាភិបាល។ ពួកគេបានសច្ចាថានឹងបង្កើនដាក់សំពាធលើរដ្ឋាភិបាលដើម្បីការផ្លាស់ប្តូររដ្ឋធម្មនុញ្ញ និងជំរុញឲ្យសាធារណជនចូលរួមធ្វើបាតុកម្មនៅទីតាំងកណ្តាលនៃបាតុកម្មនេះ។
លោក Alex Chow មេដឹកនាំក្រុមបាតុករបានចូលរួមជាមួយនឹងសហព័ន្ធនិស្សិត។
«ប្រសិនបើរដ្ឋាភិបាលមិនមានភាពស្មោះត្រង់ និងឆន្ទះក្នុងការឆ្លើយតបនឹងការទាមទាររបស់ប្រជាពលរដ្ឋហុងកុងដើម្បីឲ្យមានការកែទម្រង់លើរដ្ឋធម្មនុញ្ញ នោះជំហានបន្ទាប់ទៀតអាចជាវិធីសាស្ត្រជាច្រើន ដូចជាការតស៊ូមិនគោរពបញ្ជារដ្ឋាភិបាលនៅទីក្រុងហុងកុង»។
ក្នុងរយៈពេល២សប្តាហ៍នេះ ក្រុមនិស្សិតបាតុកររាប់ពាន់នាក់បានកាន់កាប់ទីតំាងពាណិជ្ជកម្មសំខាន់ៗនៅទីក្រុងហុងកុង ដោយទាមទារឲ្យនាយកប្រតិបត្តិអចិន្ត្រៃយ៍ដែលតែងតាំងដោយរដ្ឋាភិបាលទីក្រុងប៉េកាំងលាលែងពីតំណែង។ ក្រុមបាតុករក៏ចង់បានការផ្លាស់ប្តូររដ្ឋធម្មនុញ្ញដើម្បីទប់ស្កាត់សេចក្តីសម្រេចរបស់ចិន ដែលអនុញ្ញាតឲ្យតែបេក្ខជនដែលខ្លួនបានតែងតាំងប្រកួតប្រជែងក្នុងតំណែងនាយកប្រតិបត្តិអចិន្ត្រៃយ៍ជាតំណែងជាន់ខ្ពស់របស់ទីក្រុងហុងកុង។
មន្ត្រីទីក្រុងហុងកុង និយាយថា ពួកគេមានឆន្ទះពិភាក្សាអំពីការព្រួយបារម្ភរបស់និស្សិត ប៉ុន្តែបានគូសបញ្ជាក់ថាគ្មានការផ្លាស់ប្តូរលើច្បាប់បោះឆ្នោតទេ ហេតុដូច្នេះនាយកប្រតិបត្តិអចិន្ត្រៃយ៍នឹងមិនលាលែងពីតំណែងឡើយ។ ហើយមន្ត្រីទាំងនេះក៏បានស្នើរសុំឲ្យក្រុមបាតុករចាកចេញពីដងវិថីរបស់ទីក្រុង ដោយនិយាយថាការធ្វើបាតុកម្មនេះគឺជាទង្វើរខុសច្បាប់ ហើយរំខានដល់ជីវភាពរស់នៅរបស់ប្រជាពលរដ្ឋរស់នៅតាមតំបន់នោះ៕
ប្រែសម្រួលដោយ ទែន សុខស្រីនិត