បុគ្គលិកស៊ីវិលនៃទីក្រុងហុងកុងបានវិលត្រឡប់ទៅធ្វើការងារនៅទីស្នាក់ការនានារបស់រដ្ឋាភិបាលនៅថ្ងៃច័ន្ទនេះនៅពេលដែលការតវ៉ាប្រឆាំងគាំទ្រលទ្ធិប្រជាធិបតេយ្យដែលបានធ្វើឲ្យជាប់គាំងតំបន់នោះអស់រយៈពេលជាង១សប្តាហ៍បានស្ងប់ស្ងាត់។
ពួកបុគ្គលិកបានត្រូវអនុញ្ញាតិឲ្យឆ្លងកាត់តាមរបាំងរបស់ពួកបាតុករដោយគ្មានការបញ្ឈប់។
លោក Tim Fung ជាបុគ្គលិកស៊ីវិលនិយាយថា៖ «ខ្ញុំគោរពសិទ្ធិរបស់ពួកបាតុករសម្តែងមតិរបស់ពួកគេ ក៏ប៉ុន្តែពួកគេក៏ចាំបាច់គោរពសិទ្ធិរបស់យើងដើម្បីវិលត្រឡប់ទៅការិយាល័យរបស់យើងដើម្បីធ្វើការដែរ។»
ចំនួនបាតុករបានធ្លាក់ចុះមកត្រឹមរាប់រយនាក់។ កាលពីមួយសប្តាហ៍កន្លងមកនេះ បាតុកររាប់ម៉ឺននាក់បាននៅពាសពេញផ្លូវនានាដែលនៅទីនោះ ការប៉ះទង្គិចជាមួយប៉ូលិស បានផ្ទុះឡើងជាច្រើនលើក។
ពួករដ្ឋអំណាចបានកំណត់ពេលនៅថ្ងៃច័ន្ទនេះដើម្បីបោសសម្អាតផ្លូវនានា ហើយ កន្លែងធ្វើពាណិជ្ជកម្ម សាលារៀននិងការិយាល័យរដ្ឋាភិបាល អាចបើកទ្វារឡើងវិញបាន។
កាលពីថ្ងៃអាទិត្យម្សិលមិញ បាតុករគាំទ្រលទ្ធិប្រជាធិបតេយ្យ បានដករបាំងចេញពីផ្លូវចេញចូលខ្លះទៅកាន់ការិយាល័យរបស់រដ្ឋាភិបាលនៅកណ្តាលក្រុងហើយបានចាកចេញពីតំបន់នោះ។ ក៏ប៉ុន្តែបាតុករបានបង្ហាញនូវការបែកបាក់គ្នា ហើយបាតុករខ្លះបានប្តេជ្ញាថាមិនចាកចេញពីទីនោះ៕