ប្រធានាធិបតីអាល្លឺម៉ង់ លោក Frank-Walter Steinmeier នឹងមកបំពេញទស្សនកិច្ចលើកដំបូងជាផ្លូវការនៅប្រទេសកម្ពុជា នាសប្តាហ៍ក្រោយ ដើម្បីរឹតចំណងទាក់ទងនៃប្រទេសទាំងពីរ។ នេះបើយោងតាមសេចក្តីប្រកាសព័ត៌មានមួយចេញផ្សាយនៅលើគេហទំព័ររបស់ក្រសួងការបរទេសអាល្លឺម៉ង់។
ដំណើរទស្សនកិច្ចនេះនឹងចាប់ផ្តើមពីថ្ងៃទី១៣ ដល់១៥ ខែកុម្ភៈ ឆ្នាំ២០២៣ មុនពេលប្រធានាធិបតីអាល្លឺម៉ង់រូបនោះនឹងទៅបំពេញទស្សនកិច្ចនៅប្រទេសម៉ាឡេស៊ី បន្ទាប់ពីបំពេញទស្សនកិច្ចក្នុងប្រទេសកម្ពុជា។
បើតាមសេចក្តីប្រកាសព័ត៌មានដដែល លោកប្រធានាធិបតីនឹងមានកិច្ចពិភាក្សាជាមួយថ្នាក់ដឹកនាំនយោបាយកម្ពុជា និងតំណាងក្រុមអង្គការសង្គមស៊ីវិល ហើយលោកក៏នឹងទៅមើលដោយផ្ទាល់អំពីស្ថានភាពបច្ចុប្បន្ននៃការសម្អាតមីន ដែលអាល្លឺម៉ង់កំពុងតែគាំទ្រ និងការងារជួសជុលនៅបរិវេណប្រាសាទអង្គរវត្ត ក្នុងខេត្តសៀមរាបផងដែរ។ ក្នុងដំណើរទស្សនកិច្ចនេះ លោកក៏នឹងចុះពិនិត្យមើលកន្លែងប្រវត្តិសាស្រ្តនៃខ្មែរក្រហមផងដែរ។
វីអូអេមិនអាចសុំការអត្ថាធិប្បាយពីលោក អាន សុខខឿន អ្នកនាំពាក្យក្រសួងការបរទេសកម្ពុជាបាននៅឡើយទេ។
បើតាមព័ត៌មានដែលផ្សព្វផ្សាយលើទំព័រហ្វេសប៊ុករបស់ស្ថានទូតអាល្លឺម៉ង់ប្រចាំប្រទេសកម្ពុជាកាលពីខែមករា រដ្ឋាភិបាលអាល្លឺម៉ង់បានគាំទ្រដល់ប្រទេសកម្ពុជាជាមួយនឹងវិភាគទានចំនួន២៣លានអឺរ៉ូ ក្នុងកិច្ចខិតខំប្រឹងប្រែងបោសសម្អាតមីន ចាប់តាំងពីឆ្នាំ១៩៩៤។ ស្ថានទូតនេះបញ្ជាក់ថា នេះគឺជាការរួមចំណែករបស់អាល្លឺម៉ង់ចំពោះសកម្មភាពបោសសម្អាតមីននៅកម្ពុជា «ដែលឆ្លុះបញ្ចាំងពីការប្តេជ្ញាចិត្តរបស់អាល្លឺម៉ង់ក្នុងការគាំទ្រប្រទេសកម្ពុជាក្នុងការឈានដល់គោលដៅ កម្ពុជាគ្មានមីនឆ្នាំ២០២៣»។
ប្រធានមូលនិធិខុនរ៉ាដ អាដិនណៅអ៊ែរ (Konrad-Adenauer-Stiftung Cambodia) ដែលជាស្ថាប័នមូលនិធិរបស់គណបក្សនយោបាយនៅអាល្លឺម៉ង់ លោក Daniel Schmücking ប្រាប់វីអូអេថា ដំណើរទស្សនកិច្ចកម្រិតថ្នាក់ដឹកនាំរបស់អាល្លឺម៉ង់មកកាន់កម្ពុជានេះជាសញ្ញាវិជ្ជមាននៃវឌ្ឍនភាពទំនាក់ទំនងទ្វេភាគីនាពេលខាងមុខ។ លោកបន្តថា ដំណើរទស្សនកិច្ចលើកដំបូងនេះក៏បង្ហាញពីផលប្រយោជន៍របស់អាល្លឺម៉ង់នៅក្នុងតំបន់ ហើយអាល្លឺម៉ង់រង់ចាំដើម្បីរឹតចំណងទំនាក់ទំនងជាមួយកម្ពុជា ក្រោយគោលនយោបាយរបស់អាល្លឺម៉ង់សម្រាប់តំបន់ឥណ្ឌូប៉ាស៊ីហ្វិកត្រូវបានបង្កើតឡើងកាលពីឆ្នាំ២០២០។
លោកបញ្ជាក់ថា៖ «ខ្ញុំជឿជាក់ថា ទស្សនកិច្ចនេះនឹងពង្រឹងកិច្ចសហប្រតិបត្តិការទ្វេភាគី»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា ប្រាប់វីអូអេថា ទំនាក់ទំនងទ្វេភាគីរវាងកម្ពុជា និងអាល្លឺម៉ង់មិនមានភាពរកាំរកូសអ្វីឡើយ និងថា ប្រទេសមួយនេះក៏បានផ្តល់ជំនួយមកកម្ពុជាច្រើនផងដែរ។
ទោះជាយ៉ាងណាក្តី សាស្ត្រាចារ្យរូបនេះលើកឡើងថា នៅក្នុងក្របខណ្ឌសហភាពអឺរ៉ុប ទំនាក់ទំនងរវាងប្រទេសទាំងពីរហាក់មិនសូវល្អឡើយ ដោយសារតែវាពាក់ព័ន្ធជាមួយការដកប្រព័ន្ធអនុគ្រោះពន្ធ គ្រប់មុខទំនិញលើកលែងសព្វាវុធ ឬហៅថា EBA។
លោកបញ្ជាក់ថា៖ «លើកលែងតែនៅក្នុងក្របខ័ណ្ឌនៅអឺរ៉ុប គឺមានភាពរកាំរកូសរឿង EBA ប៉ុន្តែសម្រាប់ទំនាក់ទំនងទ្វេភាគី កម្ពុជានិងអាល្លឺម៉ង់មានទំនាក់ទំនងល្អ ហើយកម្ពុជាក៏ត្រូវការការជួយគាំពារពីបណ្តាមហាអំណាចសេដ្ឋកិច្ចនេះដែរ»។
លោកបន្តថា អាល្លឺម៉ង់ជាប្រទេសដែលកំពុងតែលេចធ្លោទាំងផ្នែកសេដ្ឋកិច្ច និងយោធា ហេតុនេះការទទួលបានការគាំទ្រពីបណ្តាប្រទេសតូចៗ ដូចជាកម្ពុជា ជាការចាំបាច់ដើម្បីធ្វើឱ្យឥទ្ធិពលរបស់ខ្លួនកាន់តែរីកចម្រើន។
សាស្ត្រាចារ្យរូបនេះរំពឹងថា ដំណើរទស្សនកិច្ចនេះនឹងទទួលបានផលប្រកបដោយវិជ្ជមាន ប៉ុន្តែលោកថា នយោបាយក្នុងស្រុករបស់កម្ពុជាហាក់ក្លាយជារនាំងបន្តិចបន្តួចនៃទំនាក់ទំនងរវាងប្រទេសទាំងពីរនេះ។
កាលពីកន្លងទៅ តំណាងទូតរបស់អាល្លឺម៉ង់ប្រចាំនៅកម្ពុជាបានជួបលោក កឹម សុខា មេដឹកនាំរបស់គណបក្សប្រឆាំងដែលកំពុងជាប់ក្តីក្តាំនៅតុលាការ ក្នុងសំណុំរឿង«ក្បត់ជាតិ» ជាបន្តបន្ទាប់។ កាលពីខែវិច្ឆិកា ឆ្នាំ២០២២ ស្ថានទូតអាល្លឺម៉ង់បានបង្ហោះសារនៅលើប្រព័ន្ធសង្គមរបស់ខ្លួន នៅពេលតំណាងទូតរបស់ខ្លួនជួបជាមួយលោក កឹម សុខា ដោយបញ្ជាក់ថា៖ «សហព័ន្ធអាល្លឺម៉ង់គឺជាប្រទេសដែលគាំទ្រគុណតម្លៃនៃលទ្ធិប្រជាធិបតេយ្យ និងសិទ្ធិមនុស្ស ជាសមាជិកសហភាពអឺរ៉ុប និងជាពិសេសគឺជាមិត្តរបស់កម្ពុជា»។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា កត់សម្គាល់ថា ដំណើរទស្សនកិច្ចរបស់ប្រធានាធិបតីអាល្លឺម៉ង់នេះជាការរឹតចំណងការទូតបន្ថែមរវាងប្រទេសទាំងពីរ និងថា អាល្លឺម៉ង់សម្លឹងឃើញពីតួនាទីសំខាន់របស់កម្ពុជានៅក្នុងឆាកអន្តរជាតិ តាមរយៈការដែលកម្ពុជាបោះឆ្នោតប្រឆាំងនឹងការឈ្លានពានរបស់រុស្ស៊ី ជាពិសេសភាពជោគជ័យរបស់កម្ពុជាក្នុងនាមជាប្រធានប្តូរវេនរបស់អាស៊ាន។
បើតាមលោក វណ្ណ ប៊ុនណា អាល្លឺម៉ង់បានតម្រង់យុទ្ធសាស្ត្ររបស់ខ្លួនមកកាន់តំបន់ឥណ្ឌូប៉ាស៊ីហ្វិក ហេតុនេះប្រទេសនៅក្នុងតំបន់នេះបានក្លាយជាប្រទេសសំខាន់សម្រាប់អាល្លឺម៉ង់ មិនថា ផ្នែកសេដ្ឋកិច្ច នយោបាយ ឬក៏សន្តិសុខនោះទេ។
លោកបញ្ជាក់ថា៖ «ដូច្នេះតាមរយៈដំណើរទស្សនកិច្ចរបស់ប្រធានាធិបតីអាល្លឺម៉ង់ពេលនេះ វាគឺជាការធ្វើឡើងភ្ជាប់ទៅនឹងគោលនយោបាយឥណ្ឌូប៉ាស៊ីហ្វិករបស់អាល្លឺម៉ង់ ដែលចង់ឱ្យវត្តមានរបស់អាល្លឺម៉ង់ក៏ដូចជាឥទ្ធិពលកាន់តែមានភាពលេចធ្លោនៅក្នុងតំបន់ផងដែរ»។
នៅក្នុងឆ្នាំ២០២២ កម្ពុជាបាននាំចេញផលិតផលរបស់ខ្លួនទៅកាន់ទីផ្សារអាល្លឺម៉ង់ ចំនួនប្រមាណ១០៨៣លានដុល្លារអាមេរិក។ តួលេខនេះមានការកើនឡើង២៣% បើធៀបនឹងឆ្នាំ២០២១។ នេះបើតាមសារព័ត៌មានរដ្ឋ AKP ចេញផ្សាយកាលពីថ្ងៃទី៣ ខែកុម្ភៈ ឆ្នាំ២០២៣។
បើតាមសារព័ត៌មានដដែល ការនាំចូលរបស់អាល្លឺម៉ង់មកកម្ពុជាមានការកើនឡើង៣% ដែលមានចំនួនប្រមាណ១៦៣លានដុល្លារអាមេរិកនៅក្នុងឆ្នាំ២០២២។ ទំនិញដែលកម្ពុជានាំចេញទៅកាន់ទីផ្សារអាល្លឺម៉ង់ភាគច្រើនរួមមានសម្លៀកបំពាក់ ស្បែកជើង ទំនិញសម្រាប់ធ្វើដំណើរ ផលិតផលកសិកម្ម គ្រឿងបន្លាស់អគ្គិសនី និងកង់ ខណៈការនាំចូលសំខាន់មានដូចជាយានយន្ត សម្ភារៈសំណង់ និងគ្រឿងសង្ហារឹមជាដើម៕
