មន្ត្រីសហរដ្ឋអាមេរិកនិងមន្ត្រីអ៊ុយក្រែនបានចាប់ផ្ដើមពិភាក្សាគ្នានៅថ្ងៃអង្គារនេះនៅក្នុងប្រទេសអារ៉ាប៊ីសាអូឌីត ដោយភាគីអ៊ុយក្រែនគ្រោងនឹងបង្ហាញជូននូវផែនការបទឈប់បាញ់មួយផ្នែកជាមួយនឹងរុស្ស៊ី។
ផែនការរបស់អ៊ុយក្រែននេះរួមមានការបញ្ឈប់ការវាយប្រហារដោយមីស៊ីលរយៈចម្ងាយឆ្ងាយនិងបទឈប់បាញ់ដែលផ្ដោតលើសមុទ្រខ្មៅ។
ប្រធានាធិបតីអ៊ុយក្រែនលោក Volodymyr Zelenskyy មិនបានចូលរួមនៅក្នុងការប្រជុំនៅថ្ងៃអង្គារនេះទេ ដោយប្រទេសអ៊ុយក្រែនគឺតំណាងដោយលោក Andriy Yermak នាយកខុទ្ទកាល័យប្រធានាធិបតី លោក Andrii Sybiha រដ្ឋមន្ត្រីការបរទេស លោក Rustem Umerov រដ្ឋមន្ត្រីការពារជាតិ និងលោក Pavlo Palisa មេបញ្ជាការយោធា។
លោក Zelenskyy បានបញ្ជាក់នៅលើបណ្ដាញសង្គមអនឡាញ X មុនការប្រជុំនេះថា អ៊ុយក្រែនសង្ឃឹមថានឹងទទួលបាន «លទ្ធផលជាក់ស្ដែង»។
រដ្ឋមន្ត្រីការបរទេសសហរដ្ឋអាមេរិកលោក Marco Rubio និងទីប្រឹក្សាសន្តិសុខជាតិអាមេរិកលោក Mike Waltz ជាអ្នកដឹកនាំគណៈប្រតិភូសហរដ្ឋអាមេរិកនៅក្នុងការប្រជុំនេះ ស្របពេលដែលប្រធានាធិបតីអាមេរិកលោក Donald Trump ជំរុញឱ្យមានការបញ្ចប់ជាបន្ទាន់នូវសង្គ្រាមដែលរុស្ស៊ីបានចាប់ផ្ដើមនៅដើមឆ្នាំ ២០២២ ដោយការឈ្លានពានពេញទំហឹងលើអ៊ុយក្រែននេះ។
លោក Rubio បាននិយាយកាលពីថ្ងៃចន្ទថា សហរដ្ឋអាមេរិកសង្ឃឹមថានឹងដោះស្រាយបញ្ហាផ្អាកជំនួយសម្រាប់អ៊ុយក្រែន។
មន្ត្រីរុស្ស៊ីបាននិយាយនៅថ្ងៃអង្គារនេះថា ការវាយប្រហាររបស់អ៊ុយក្រែនដែលប្រើដ្រូនជាង ៩០ គ្រឿងបានសម្លាប់មនុស្សយ៉ាងតិច ២ នាក់និងធ្វើឱ្យមនុស្ស ១៨ នាក់ផ្សេងទៀតរងរបួសនៅក្នុងតំបន់រដ្ឋធានីមូស្គូ។
ក្រសួងការពារជាតិរុស្ស៊ីបានបញ្ជាក់ថាខ្លួនបានបាញ់ទម្លាក់ដ្រូនចំនួន ៩១ គ្រឿងនៅក្នុងតំបន់រដ្ឋធានីមូស្គូ និងដ្រូនសរុបទាំងអស់ចំនួន ៣៣៧ គ្រឿងនៅទូទាំងតំបន់ទាំងអស់៕
ព័ត៌មានខ្លះក្នុងសេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន The Associated Press ទីភ្នាក់ងារ Agence France-Presse និងទីភ្នាក់ងារ Reuters
