មេដឹកនាំក្រុមប្រទេសដែលមានសេដ្ឋកិច្ចជឿនលឿន ឬ G-7 គ្រោងជួបប្រជុំគ្នានៅថ្ងៃអង្គារដើម្បីពិភាក្សាអំពីស្ថានការណ៍នៅប្រទេសអាហ្វហ្គានីស្ថាន ដោយមេដឹកនាំជាច្រើនគ្រោងជំរុញឲ្យលោកប្រធានាធិបតី Joe Biden រក្សាទុកកងទ័ពអាមេរិកនៅក្នុងប្រទេសនេះ ឱ្យហួសថ្ងៃកំណត់នៅថ្ងៃទី ៣១ ខែសីហា ដើម្បីជួយសម្រួលដល់កិច្ចប្រឹងប្រែងការជម្លៀសដែលកំពុងកើតមានឡើង។
នាយករដ្ឋមន្រ្តីអង់គ្លេសលោក Boris Johnson បាននិយាយនៅមុនកិច្ចប្រជុំដែលនឹងធ្វើតាមអនឡាញនេះថា៖ «ខ្ញុំនឹងសុំឱ្យមិត្តភក្តិនិងសម្ព័ន្ធមិត្តរបស់យើងបន្តនៅជាមួយប្រជាជនអាហ្វហ្គានីស្ថាននិងបង្កើនការគាំទ្រដល់ជនភៀសខ្លួននិងជំនួយមនុស្សធម៌»។
ខណៈនៅសល់ពេលតែមួយសប្តាហ៍ទៀតនឹងចូលដល់ថ្ងៃកំណត់របស់លោក Biden នោះ ពលរដ្ឋបស្ចិមប្រទេសនិងប្រជាជនអាហ្វហ្គានីស្ថានរាប់ម៉ឺននាក់ដែលបានគាំទ្រកិច្ចខិតខំប្រឹងប្រែងរបស់អាមេរិកបានធ្វើដំណើរទៅអាកាសយានដ្ឋានអន្តរជាតិក្រុងកាប៊ុល ដោយសង្ឃឹមថា នឹងបានឆ្លងកាត់ច្រកទ្វារនិងទៅដល់ទីសុវត្ថិភាពតាមជើងយន្តហោះចេញ។
ទោះយ៉ាងណា ជនជាតិអាហ្វហ្គានីស្ថានជាច្រើនបាននិយាយថា ពួកគេមានការលំបាកឬមិនអាចឆ្លងកាត់ចំណុចត្រួតពិនិត្យរបស់ពួកតាលីបង់ជាបន្តបន្ទាប់មុនទៅដល់អាកាសយានដ្ឋានទេ។ ហើយមន្រ្តីតាលីបង់ហាក់ដូចជាមិនចង់បន្ធូរបន្ថយឱ្យសហរដ្ឋអាមេរិកទេ ដោយហៅថ្ងៃកំណត់ចុងក្រោយ ៣១ សីហា ថាជា«បន្ទាត់ក្រហម»។
ទីប្រឹក្សាសន្តិសុខជាតិអាមេរិកលោក Jake Sullivan បានប្រាប់អ្នកយកព័ត៌មាននៅសេតវិមានកាលពីថ្ងៃច័ន្ទថា៖ «យើងកំពុងពិភាក្សាជាមួយពួកតាលីបង់ជារៀងរាល់ថ្ងៃតាមរយៈបណ្តាញនយោបាយនិងសន្តិសុខ» ទាក់ទងនឹង «ទិដ្ឋភាពទាំងអស់ដែលកំពុងកើតឡើងនៅទីក្រុងកាប៊ុលនាពេលនេះ»។
ទោះមានភាពរញ៉េរញ៉ៃពីដំបូងក្តី ក៏ការជម្លៀសខ្លួនមានល្បឿនលឿនជាងមុន។ មន្ត្រីអាមេរិកបាននិយាយកាលពីល្ងាចថ្ងៃច័ន្ទថា មានមនុស្សជាង២៧.០០០នាក់ត្រូវបានគេជម្លៀសតាមផ្លូវអាកាសចេញពីអាហ្វហ្គានីស្ថានក្នុង៣៦ម៉ោងមុននោះ ដែលនេះជាចំនួនច្រើនជាងចំនួនសរុបកាលពីមួយសប្តាហ៍មុននោះ៕
