រដ្ឋមន្ត្រីការបរទេសបារាំងលោក Jean-Noel Barrot បាននិយាយនៅថ្ងៃពុធនេះថា លោកចង់ឲ្យប្រទេសនៅអឺរ៉ុប «ទាំងអស់» ធ្វើកិច្ចសហប្រតិបត្តិការនិងចាប់ផ្ដើមកាត់បន្ថយការផ្ដល់ទិដ្ឋាការដល់ជនជាតិនៃប្រទេសដែលបដិសេធមិនទទួលយកត្រឡប់ទៅវិញនូវជនចំណាកស្រុកខុសច្បាប់ដែលបារាំងបណ្ដេញចេញ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
លោក Barrot បាននិយាយដូច្នេះបន្ទាប់ពីបុរសដែលមានកំណើតនៅអាល់ហ្សេរីម្នាក់បានដើរចាក់គេចាក់ឯងនៅក្នុងទីក្រុង Mulhouse ភាគខាងកើតប្រទេសបារាំងកាលពីចុងសប្ដាហ៍កន្លងមកនេះ ដោយសម្លាប់មនុស្សម្នាក់និងធ្វើឲ្យមនុស្សជាច្រើននាក់ទៀតរងរបួស។ ប្រធានាធិបតីបារាំងលោក Emmanuel Macron បានហៅហេតុការណ៍នេះថាជា «ទង្វើភេរវកម្មបែបអ៊ិស្លាម»។
ជនសង្ស័យអាយុ ៣៧ ឆ្នាំរូបនោះមានឈ្មោះស្ថិតនៅក្នុងបញ្ជីតាមដានទាក់ទិននឹងភេរវកម្ម និងស្ថិតក្នុងបទបញ្ជាដែលតម្រូវឲ្យបញ្ជូនចេញពីប្រទេសបារាំង។
បារាំងបានព្យាយាមបណ្ដេញជននេះចេញជាច្រើនលើកច្រើនសារមកហើយ ប៉ុន្តែប្រទេសអាល់ហ្សេរីបដិសេធមិនធ្វើកិច្ចសហប្រតិបត្តិការជាមួយ។ នេះបើតាមការបញ្ជាក់របស់អាជ្ញាធរបារាំង។
ប៉ុន្តែ លោក Barrot បានស្នើថា ប្រសិនបើរដ្ឋាភិបាលបរទេសសហការជាមួយ សហភាពអឺរ៉ុបក៏អាចពិចារណាកាត់បន្ថយពន្ធគយសម្រាប់ប្រទេសទាំងនោះផងដែរ។
អាជ្ញាធរបារាំងមានបំណងបន្ដឹងគោលនយោបាយអន្តោប្រវេសន៍និងការគ្រប់គ្រងព្រំដែន។ នេះជាវិធានការមួយដែលបង្ហាញអំពីការផ្លាស់ប្ដូរឆ្ពោះទៅរកនយោបាយបែបស្ដាំនិយមនៅក្នុងប្រទេសបារាំង៕
វេទិកាបញ្ចេញមតិ