អ្នកឈ្នះឆ្នោតថ្មីដែលទំនងក្លាយជាអធិការបតីថ្មីរបស់ប្រទេសអាល្លឺម៉ង់បានព្រមានថាសហរដ្ឋអាមេរិកគិតគូរតិចតួចអំពីជោគវាសនារបស់អឺរ៉ុបហើយបានអំពាវនាវឱ្យទ្វីបនេះរៀបចំជាបន្ទាន់នូវសមត្ថភាពការពារខ្លួនដោយផ្ទាល់។ នេះជារឿងជាការកត់សម្គាល់នូវការផ្លាស់ប្តូរយ៉ាងខ្លាំងក្នុងរបៀបដោះស្រាយពីប្រទេសដែលសេដ្ឋកិច្ចធំបង្អស់មួយនៅតំបន់អឺរ៉ុប។
នៅឯការជជែកដេញដោលដែលផ្សាយតាមទូរទស្សន៍ក្រោយការបោះឆ្នោតបន្ទាប់ពីគណបក្សប្រជាធិបតេយ្យ Christian របស់លោកឬគណបក្ស CDU បានឈ្នះដោយទទួលបានសំឡេងឆ្នោត២៨,៥ភាគរយនៅក្នុងការបោះឆ្នោតកាលពីថ្ងៃអាទិត្យដែលមានចំនួន៨ភាគរយនាំមុខគណបក្សជម្រើសផ្សេងសម្រាប់អាល្លឺម៉ង់ឬ AfD លោក Friedrich Merz បាននិយាយ ថា«ខ្ញុំ នឹងមិនដែលបានគិតថាខ្ញុំ នឹងត្រូវតែនិយាយដូច្នេះនៅក្នុងកម្មវិធីទូរទស្សន៍នេះទេ។ ក៏ប៉ុន្តែ បន្ទាប់ពីកំណត់សម្គាល់របស់លោកប្រធានា ធិបតី Donald Trump កាលពីសប្តាហ៍មុន ការណ៍នេះបានបញ្ជាក់យ៉ាងច្បាស់ថាពល រដ្ឋអាមេរិកាំងនៅក្នុងរដ្ឋបាលនេះ មិនខ្វល់ខ្វាយអំពីជោគវាសនារបស់អឺរ៉ុបទៀតទេ»។
លោក Merz បានបន្ថែមទៀតថា«អាទិភាពរបស់ខ្ញុំ នឹងពង្រឹងអឺរ៉ុបឱ្យបានឆាប់រហ័សទៅតាមលទ្ធភាពដែលជាជំហានដែលយើងប្រាកដអាចធ្វើឱ្យសម្រេចបាននូវឯករាជ្យភាពចេញពីសហរដ្ឋអាមេរិក»។
លោកបានមានប្រសាសន៍ទៀតថាសន្និសីទអង្គការអូតង់នៅក្នុងខែមិថុនាខាងមុខ អាចជាការកំណត់បញ្ហានេះ។ លោកបានបន្ថែមទៀតថាគេមិនទាន់ដឹងច្បាស់នៅឡើយថាសម្ពន្ធមិត្ត«នឹងនៅតែពិភាក្សាអំពីអង្គការអូតង់នៅក្នុងទម្រង់នៅពេលបច្ចុប្បន្ននេះឬថាតើយើងនឹងត្រូវបង្កើតសមត្ថភាពការពារជាតិរបស់អឺរ៉ុបមួយឱ្យបានឆាប់រហ័សឡើង»។
រហូតមកទល់ពេលនេះ អាល្លឺម៉ង់ជាម្ចាស់ជំនួយយោធាធំទី២ដល់ប្រទេសអ៊ុយក្រែន បន្ទាប់ពីសហរដ្ឋអាមេរិក។ លោក Merz ប្រហែលស្វះស្វែងដើម្បីបង្កើនការជួយឧបត្ថម្ភនេះ។ នេះបើតាមអ្នកស្រី Liana Fix នៃក្រុមប្រឹក្សាទំនាក់ទំនងការបរទេសដែលមានទីតាំងនៅក្នុងរដ្ឋធានីវ៉ាស៊ីនតោន។
ជ័យជម្នះនៃការបោះឆ្នោតរបស់លោក Merz បានកើតមានឡើងនៅខួបលើកទី៣នៃការឈ្លានពានទ្រង់ទ្រាយធំរបស់រុស្ស៊ីលើប្រទេសអ៊ុយក្រែន៕
វេទិកាបញ្ចេញមតិ