កាលពីថ្ងៃសុក្រ រដ្ឋមន្ត្រីការពារជាតិអាមេរិកលោក Pete Hegseth បានព្រមានសម្ព័ន្ធមិត្តនៅអង្គការអូតង់ក្នុងទ្វីបអឺរ៉ុបកុំឲ្យសន្មតថាវត្តមានកងទ័ពអាមេរិកនៅទ្វីបអឺរ៉ុបនឹង «បន្តរហូត» ហើយលោកបានជំរុញបណ្ដាប្រទេសទាំងនោះឲ្យចំណាយបន្ថែមលើផ្នែកការពារ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
លោក Hegseth បានប្រាប់អ្នកយកព័ត៌មាននៅពេលលោកឈរក្បែររដ្ឋមន្ត្រីការពារជាតិប៉ូឡូញនៅក្នុងទីក្រុងវ៉ាសូវីនៃប្រទេសប៉ូឡូញថា៖ «ឥឡូវនេះគឺជាពេលដែលត្រូវវិនិយោគ ដោយសារតែអ្នកមិនអាចធ្វើការសន្មតថាវត្តមានរបស់សហរដ្ឋអាមេរិកនឹងបន្តរហូតនោះទេ»។
លោក Hegseth បានធ្វើទស្សនកិច្ចទៅប៉ូឡូញក្នុងដំណើរទស្សនកិច្ចដំបូងបង្អស់របស់លោកទៅអឺរ៉ុបក្នុងនាមជាមន្ត្រីការទូតកំពូលនៃរដ្ឋបាលរបស់ប្រធានាធិបតីអាមេរិកលោក Donald Trump។ លោក Trump បានអំពាវនាវដល់បណ្ដាប្រទេសជាសមាជិកអង្គការអូតង់ម្ដងហើយម្ដងទៀតឲ្យបង្កើនការចំណាយផ្នែកយោធារបស់ខ្លួន។
លោក Hegseth បានសរសើរប៉ូឡូញថាជា «សម្ព័ន្ធមិត្តគំរូ» សម្រាប់ការចំណាយរបស់ខ្លួនផ្នែកការពារ។ ប៉ូឡូញជាសមាជិកអង្គការអូតង់មកពីអឺរ៉ុបខាងកើតដែលមានព្រំដែនជាប់រុស្ស៊ីនិងអ៊ុយក្រែន។
ប៉ូឡូញមានបំណងចំណាយថវិកាចំនួន ៤,៧% នៃទិន្នផលសេដ្ឋកិច្ចប្រចាំឆ្នាំរបស់ខ្លួនលើផ្នែកការពារនៅឆ្នាំ ២០២៥ នេះ ដែលចំនួននេះគឺលើសកម្រិតអប្បបរមាបច្ចុប្បន្នរបស់អង្គការអូតង់ដែលកម្រិតអប្បបរមានោះគឺ ២%៕
វេទិកាបញ្ចេញមតិ