មន្រ្តីជាន់ខ្ពស់នៃស្ថានទូតបារាំងប្រចាំនៅកម្ពុជាបានជួបជាមួយមន្រ្តីកម្ពុជា កាលពីថ្ងៃចន្ទ ដើម្បីពិភាក្សាអំពីកិច្ចសហការក្នុងការស៊ើបអង្កេតលើករណីឃាតកម្មលើលោក លិម គិមយ៉ា អតីតតំណាងរាស្រ្តគណបក្សសង្រ្គោះជាតិដែលមានសញ្ជាតិបារាំង។
បើតាមហ្វេសប៊ុករបស់ស្ថានទូតបារាំង លោក Jacques Pellet ឯកអគ្គរដ្ឋទូតបារាំងប្រចាំកម្ពុជាបានជួបជាមួយលោក ឌី វិជ្ជា អគ្គស្នងការរងនគរបាលជាតិ ដើម្បីពិភាក្សាគ្នាអំពីវិធានការធ្វើឡើងដោយអាជ្ញាធរកម្ពុជាក្នុងក្របខណ្ឌនៃការស៊ើបអង្កេតរបស់ប្រទេសថៃ ជុំវិញឃាតកម្មលើពលរដ្ឋបារាំង លោក លិម គិមយ៉ា។
ស្ថានទូតបញ្ជាក់ថា៖ «ប្រទេសបារំាងកំពុងតាមដានដោយយកចិត្តទុកដាក់អំពីការស៊ើបអង្កេតដែលធ្វើឡើងដោយប្រទេសថៃ ដើម្បីស្វែងរកការណ៍ពិតចំពោះករណីនេះ»។
ស្ថានទូតបារាំងប្រាប់វីអូអេតាមសារអ៊ីម៉ែលនៅថ្ងៃអង្គារថា៖ «ប្រទេសបារាំងបានធ្វើការយ៉ាងមមាញឹក។ យើងបន្តតាមដានយ៉ាងដិតដល់អំពីការស៊ើបអង្កេត ដែលធ្វើឡើងដោយប្រទេសថៃ ដើម្បីស្វែងរកការណ៍ពិតពេញលេញជុំវិញករណីនេះ»។
ស្ថានទូតមិនអាចអត្ថាធិប្បាយអ្វីបន្ថែមទៀតឡើយលើករណីនេះ។
គេមិនទាន់ដឹងនៅឡើយថា តើមន្រ្តីបារាំងបានស្នើឲ្យកម្ពុជាចាប់ខ្លួនជនជាតិខ្មែរពីរនាក់ ដែលត្រូវបានថៃបង្ហាញមុខថា ពាក់ព័ន្ធនឹងឃាតកម្មនេះ ឬយ៉ាងណាទេ នៅក្នុងជំនួបកាលពីថ្ងៃចន្ទ។
វីអូអេមិនទាន់អាចសុំការអត្ថាធិប្បាយពីលោក ឌី វិជ្ជា ប្រធាននាយកដ្ឋានកណ្តាលសន្តិសុខ បាននៅឡើយទេ។
កាលពីកន្លងទៅ តុលាការព្រហ្មទណ្ឌថៃបានចេញដីកាចាប់ខ្លួន លោក លី រតនៈរស្មី អតីតទីប្រឹក្សាលោក ហ៊ុន សែន ហើយលោកត្រូវបានចោទប្រកាន់ថាបានជួលខ្មាន់កាំភ្លើងជាជនជាតិថៃឲ្យបាញ់សម្លាប់ លោក លិម គិមយ៉ា។
ចំណែកជនសង្ស័យម្នាក់ទៀតមានឈ្មោះ ពេជ្រ គឹមស្រ៊ិន ដែលត្រូវបានគេមើលឃើញថា ជាអ្នកឲ្យសញ្ញា និងរូបភាពដល់ជនដៃដល់។
ចំពោះករណីឃាតកម្មនេះ គេមិនទាន់ដឹងនៅឡើយទេថា តើភាគីថៃបានស្នើឲ្យកម្ពុជាចាប់ខ្លួនបុគ្គលខ្មែរដែលសង្ស័យពីរនាក់នោះ ឬយ៉ាងណាទេ។ ប៉ុន្តែអាជ្ញាធរកម្ពុជាធ្លាប់អះអាងថា កម្ពុជានៅតែបន្តសហការជាមួយភាគីថៃ ដើម្បីស្វែងរកយុត្តិធម៌ដល់ជនរងគ្រោះ ប្រសិនបើភាគីថៃត្រូវការ។
កាលពីកន្លងទៅ អាជ្ញាធរថៃបានចាប់ខ្លួនជនជាតិថៃម្នាក់ ដែលបានសារភាពថា បានបាញ់សម្លាប់លោក លិម គិមយ៉ា។ ប៉ូលិសថៃធ្លាប់បានទម្លាយថា ករណីបាញ់សម្លាប់នេះមិនមែនជារឿងនយោបាយឡើយ ហើយវាជាការសងសឹកផ្ទាល់ខ្លួនរវាងមេខ្លោងនៃឃាតកម្ម និងជនរងគ្រោះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត យល់ថា កម្ពុជាត្រូវមានកិច្ចសហប្រតិបត្តិការល្អនៅក្នុងការស៊ើបអង្កេតលើឃាតកម្មនេះ។
លោកថ្លែងថា៖ «ដើម្បីផ្តល់ភាពយុត្តិធម៌ពេញលេញសម្រាប់លោក លិម គិមយ៉ា និងគ្រួសារ បើសិនជាមានការស្នើសុំណាមួយចាំបាច់ពីភាគីថៃ កម្ពុជាត្រូវមានកិច្ចសហប្រតិបត្តិការល្អទៅលើករណីឃាតកម្មលើលោក លិម គិមយ៉ា ហ្នឹងដើម្បីស្វែងរកយុត្តិធម៌ឲ្យបានពេញលេញសម្រាប់ករណីនេះ»។
គួរបញ្ជាក់ថា លោក លិម គិមយ៉ា ត្រូវបានគេបាញ់ ៣ គ្រាប់ស្លាប់នៅនឹងកន្លែង កាលពីថ្ងៃទី ៧ ខែមករា ក្នុងទីក្រុងបាងកក ប្រទេសថៃ គ្រាដែលលោកបានចុះពីរថយន្តក្រុងដែលលោកនិងភរិយាធ្វើដំណើរពីខេត្តសៀមរាបនៃប្រទេសកម្ពុជាទៅទីក្រុងបាកកកនៃប្រទេសថៃ៕
វេទិកាបញ្ចេញមតិ