គណៈកម្មការក្រមសីលធម៌កីឡាបាល់ទាត់ដែលគ្រប់គ្រងសហព័ន្ធកីឡាបាល់ទាត់ FIFA បានព្យួរការងារលោក Sepp Blatter ប្រធានស្ថាប័ននេះដែលកំពុងមានរឿងអាស្រូវ និងអ្នកត្រូវមកជំនួសលោកចំនួន៩០ថ្ងៃ។
គណៈកម្មការនេះបានចាត់វិធានការនេះនៅថ្ងៃព្រហស្បតិ៍នេះប្រឆាំងនឹងលោក Blatter និងលោក Michel Platini ប្រធានសមាគមបាល់ទាត់សហភាពអឺរ៉ុបក្នុងរយៈពេលមិនដល់ពីរសប្តាហ៍បន្ទាប់ពីក្រុមរដ្ឋអាជ្ញាប្រទេសស្វីសបានបើកការស៊ើបអង្កេតសំណុំរឿងព្រហ្មទណ្ឌប្រឆាំងនឹងលោក Blatter ពាក់ព័ន្ធនឹងទឹកប្រាក់ចំនួន២លានដុល្លារដែលបានបង់មកឱ្យលោក Platini ក្នុងឆ្នាំ២០១១។ អាជ្ញាធរបានសាកសួរលោក Blatter នៅឯទីស្នាក់ការធំរបស់ FIFA ក្នុងទីក្រុង Zurich ហើយបានឆែកឆេរការិយាល័យរបស់លោកផងដែរ។
ការព្យូរការងារនេះទំនងជានឹងធ្វើឱ្យខូចដល់ការខិតខំប្រឹងប្រែងរបស់លោក Platini ដើម្បីបានស្នងតំណែងលោក Blatter ផងដែរនៅពេលដែលមានការបោះឆ្នោតក្នុងខែកុម្ភៈ។ តារាបាល់ទាត់បារាំងដែលបានចូលនិវត្តន៍រូបនេះបានប្រកែកនៅថ្ងៃព្រហស្បតិ៍ថា មិនបានធ្វើអ្វីខុសទេ នៅពេលដែលលេចឮព័ត៌មានពីការព្យួរការងាររបស់លោក៕
