ចៅក្រមសហព័ន្ធនៅក្នុងករណីទុកដាក់ឯកសារសម្ងាត់ របស់លោកអតីតប្រធានាធិបតី Donald Trump នៅរដ្ឋ Florida បានច្រានចោលការចោទប្រកាន់របស់រដ្ឋអាជ្ញា កាលពីថ្ងៃចន្ទ ដោយយល់ស្របជាមួយក្រុមមេធាវីការពារក្តី ដែលបាននិយាយថា រដ្ឋអាជ្ញាពិសេស ដែលបានដាក់ពាក្យបណ្តឹងនោះ ត្រូវបានតែងតាំងដោយខុសច្បាប់។
សេចក្តីសម្រេចរបស់ចៅក្រមសហព័ន្ធសហរដ្ឋអាមេរិក អ្នកស្រី Aileen Cannon នាំឱ្យមានការបញ្ចប់យ៉ាងស្រឡាំងកាំងនិងភ្លាមៗមួយរំពេច នៅក្នុងករណីព្រហ្មទណ្ឌមួយ ដែលនៅពេលចាប់ផ្តើម ត្រូវគេចាត់ទុកថា ជាការគំរាមកំហែងផ្លូវច្បាប់យ៉ាងធ្ងន់ធ្ងរមួយ ដែលលោកអតីតប្រធានាធិបតីនៃគណបក្សសាធារណរដ្ឋប្រឈម។ លោក Trump បានប្រឈមជាមួយបទចោទឧក្រិដ្ឋរាប់សិប ដែលចោទលោកថាបានប្រមូលឯកសារសម្ងាត់ទុកដោយខុសច្បាប់ នៅក្នុងគេហដ្ឋានរបស់លោក នៅទីក្រុង Palm Beach រដ្ឋFlorida និងបទរារាំងដល់កិច្ចប្រឹងប្រែងរបស់ FBI ដើម្បីប្រមូលយកវិញ។
ក្រុមមេធាវីការពារក្តី បានដាក់ពាក្យតវ៉ាជាច្រើនលើក នៅក្នុងករណីនេះ មានរួមការតវ៉ាបច្ចេកទេសមួយដែលថាលោករដ្ឋអាជ្ញាពិសេស Jack Smith ត្រូវបានតែងតាំងដោយខុសច្បាប់ នៅក្រោមមាត្រាតែងតាំងនៃរដ្ឋធម្មនុញ្ញ ដែលគ្រប់គ្រងលើការតែងតាំងតំណែងរដ្ឋាភិបាលខ្លះ និងថាការិយាល័យរបស់លោករដ្ឋអាជ្ញា បានទទួលថវិកាចាយវាយដោយមិនត្រឹមត្រូវពីក្រសួងយុត្តិធម៌។
អ្នកស្រី Cannon ដែលបានស្ថិតនៅក្រោមការពិនិត្យមើល តាំងពីមុនករណីបទចោទប្រកាន់ទៅទៀតនោះ បានសរសេរនៅក្នុងសេចក្តីសម្រេចមួយដែលមាន៩៣ទំព័រថា៖ «អ្នកតាក់តែងរដ្ឋធម្មនុញ្ញបានផ្តល់ឱ្យសភានូវតួនាទីសំខាន់មួយ នៅក្នុងការតែងតាំងមន្ត្រីធំៗនិងតូចៗ។ តួនាទីនោះមិនអាចប្រមូលយកដោយសាខានីតិប្រតិបត្តិ ឬ ចែកចាយនៅកន្លែងផ្សេងបានទេ មិនថាក្នុងករណីនេះ ឬមួយក៏ករណីផ្សេងទៀត ទោះជានៅពេលមានសេចក្តីត្រូវការបន្ទាន់របស់ប្រទេសជាតិ ឬ គ្មានក៏ដោយ»។
ក្រុមមេធាវីរបស់លោក Smith កន្លងមកបានតវ៉ាចំពោះការជជែកឱ្យហេតុផលនេះ ក្នុងអំឡុងសវនាការនៅចំពោះមុខអ្នកស្រី Cannon ដែលថាបើទោះជាមានការសម្រេចដែលផ្តល់ផលប្រយោជន៍ដល់ក្រុមមេធាវីការពារក្តី ក៏ការកែតម្រូវនឹងមិនដល់ថ្នាក់ច្រានចោលសំណុំរឿងនេះទាំងស្រុងដែរ។
អ្នកនាំពាក្យម្នាក់ សម្រាប់ក្រុមរដ្ឋអាជ្ញារបស់លោក Smith មិនបានឆ្លើយតបនិងសំណើសុំអត្ថាធិប្បាយភ្លាមៗទេ ហើយក្រុមលោក Trump មិនបានធ្វើអត្ថាធិប្បាយភ្លាមៗទេ៕
វេទិកាបញ្ចេញមតិ