សន្តិសុខជាការផ្តោតអារម្មណ៍យ៉ាងខ្លាំងសម្រាប់មហាសន្និបាតរបស់គណបក្សសាធារណរដ្ឋ នៅក្នុងទីក្រុង Milwaukee រដ្ឋ Wisconsin នៅសប្តាហ៍នេះ ប៉ុន្តែបណ្តាទីភ្នាក់ងារពង្រឹងច្បាប់របស់រដ្ឋាភិបាលសហព័ន្ធ និយាយថា ពួកគេគ្មានគម្រោងផ្លាស់ប្តូរ វិធានការសន្តិសុខយ៉ាងតឹងរ៉ឹងដែលមានជាស្រេចហើយនោះទេ។
អ្នកស្រី Audrey Gibson-Cicchino អ្នករៀបចំសន្តិសុខរបស់កងការពារប្រធានាធិបតីសហរដ្ឋអាមេរិក សម្រាប់មហាសន្និបាតរបស់គណបក្សសាធារណរដ្ឋ ថ្លែងថា៖ «យើងជឿជាក់លើផែនការសន្តិសុខសម្រាប់មហាសន្និបាតនេះ ហើយយើងរៀបចំរួចរាល់អស់ហើយ»។ អ្នកស្រីបានថ្លែងតាមកញ្ចក់ទូរទស្សន៍ កាលពីថ្ងៃអាទិត្យ ថា៖ «យើងមិនរំពឹងថានឹងមានការផ្លាស់ប្តូរអ្វីទាក់ទងនឹងរឿងការពារសន្តិសុខទេ»។
អតីតប្រធានាធិបតីលោក Trump បានប្រាប់កាសែត The Washington Examiner ថា សុន្ទរកថារបស់លោកនៅក្នុងមហាសន្និបាតនៅថ្ងៃព្រហស្បតិ៍ គ្រោងនឹងនិយាយខ្លាំងៗ ហើយនឹងផ្តោតលើគោលនយោបាយរបស់លោកប្រធានាធិបតីសហរដ្ឋអាមេរិក Joe Biden ប៉ុន្តែឥឡូវនេះ នឹងរួមមានការអំពាវនាវឱ្យមានការបង្រួបបង្រួមជាតិ។
លោក Trump បានប្រាប់កាសែតនេះថា៖ «នេះជាឱកាសមួយដើម្បីបង្រួបបង្រួមប្រទេសទាំងមូល និងពិភពលោកទាំងមូលផងដែរ។ សុន្ទរកថានេះនឹងខុសគ្នាច្រើនណាស់ ខុសគ្នាច្រើនជាងសុន្ទរកថាដែលគ្រោងកាលពីពីរថ្ងៃមុន»។
កាលពីថ្ងៃអាទិត្យ លោក Biden បានថ្លែងថា ការបាញ់កាំភ្លើងនោះ «ផ្ទុយពីអ្វីៗទាំងអស់ដែលតំណាងឱ្យយើង ក្នុងនាមជាប្រទេសមួយ។ យើងមិនមែនអ៊ីចឹងទេ ក្នុងនាមជាប្រទេសមួយ។ អាមេរិកាំងមិនមែនអ៊ីចឹងទេ។ ហើយយើងមិនអាចអនុញ្ញាតឱ្យរឿងនេះកើតឡើងបានទេ»។
លោកបានប្តេជ្ញាថា កងការពារសន្តិសុខប្រធានាធិបតី នឹងផ្តល់ជូនលោក Trump នូវ «ធនធានសមត្ថភាព និង វិធានការសន្តិសុខទាំងអស់ ដែលចាំបាច់ ដើម្បីធានាសុវត្ថិភាពរបស់លោកជាបន្ត»។
លោក Biden ក៏បានថ្លែងដែរថា លោករំពឹងថា គណបក្សសាធារណរដ្ឋ នៅសប្តាហ៍នេះ នឹងរិះគន់សមិទ្ធផលរបស់លោក ហើយនឹងប្រកាសអំពីទស្សនៈរបស់ខ្លួន សម្រាប់ប្រទេសជាតិ ហើយថា លោកនឹងប្រើប្រាស់កម្មវិធីផ្ទាល់ខ្លួនរបស់លោក នៅសប្តាហ៍នេះ ដើម្បីលើកតម្កើងកិច្ចការរបស់រដ្ឋបាលលោកផងដែរ។
លោក Biden បានថ្លែងថា៖ «ខ្ញុំនឹងបន្តនិយាយយ៉ាងខ្លាំងៗសម្រាប់លទ្ធិប្រជាធិបតេយ្យរបស់យើង ដើម្បីការពាររដ្ឋធម្មនុញ្ញរបស់យើង និងនីតិរដ្ឋ ដើម្បីអំពាវនាវឱ្យមនុស្សនាំគ្នាធ្វើសកម្មភាពនៅកន្លែងបោះឆ្នោត មិនមែនធ្វើអំពើហិង្សានៅតាមផ្លូវយើងទេ»។
ជនសង្ស័យ
ទីភ្នាក់ងារស៊ើបអង្កេតសហព័ន្ធ FBI បាននិយាយថា ខ្លួនបានកំណត់អត្តសញ្ញាណរបស់ជនសង្ស័យម្នាក់ហើយ ប៉ុន្តែនៅមិនទាន់អាចសន្មតអំពីអ្វីដែលជំរុញឡើង នៅក្នុងការប៉ុនប៉ងធ្វើឃាត នៅក្នុងការជួបជុំអ្នកគាំទ្ររបស់លោក Trump កាលពីថ្ងៃសៅរ៍ នៅទីក្រុង Butler រដ្ឋ Pennsylvania។
FBI បាននិយាយថា បុរសអាយុ ២០ ឆ្នាំ ឈ្មោះ Thomas Matthew Crooks ដែលជាអ្នកស្រុក Bethel Park រដ្ឋ Pennsylvania ជា «ជនសង្ស័យពាក់ព័ន្ធ» នៅក្នុងការបាញ់បោះកាលពីថ្ងៃសៅរ៍នោះ។ អ្នកឈរនៅខាងក្រៅបរិវេណសន្តិសុខ នៅកន្លែងលោក Trump ថ្លែងនោះ បាននិយាយថា ពួកគេបានស្រែកប្រាប់ប៉ូលិស ប៉ុន្តែអត់មានអ្នកណាឮ នៅពេលដែលពួកគេបានឃើញខ្មាន់កាំភ្លើងលូនលើដំបូលអគារមួយនៅក្បែរនោះ ដោយមានអាវុធមួយដើម។
ខ្មាន់កាំភ្លើងនោះបានបាញ់កាំភ្លើងជាច្រើនគ្រាប់ ប៉ះត្រូវត្រចៀកស្តាំរបស់លោក Trump ហើយបានសម្លាប់អ្នកចូលរួមម្នាក់ និងបណ្តាលឱ្យមនុស្សពីរនាក់ទៀតរបួស មុនអ្នកបាញ់ស៊ីបម្នាក់របស់កងការពារសន្តិសុខប្រធានាធិបតី បានបាញ់សម្លាប់ជនសង្ស័យនោះ។ កាំភ្លើង AR-15 មួយដើម ត្រូវបានរកឃើញនៅក្បែរសពជនសង្ស័យ។
យុវជន Crooks ដែលបានរៀនចប់វិទ្យាល័យ កាលពីពីរឆ្នាំមុននោះ បានធ្វើការជាអ្នកជំនួយខាងអាហារូបត្ថម្ភម្នាក់ នៅកន្លែងស្តារនីតិសម្បទា Bathel Park Skilled Nursing and Rehabilitation Center។
បុរសនេះបានចុះឈ្មោះជាសមាជិកគណបក្សសាធារណរដ្ឋ។ ប៉ុន្តែពេលគាត់មានអាយុ ១៧ ឆ្នាំ Crooks បានធ្វើវិភាគទានចំនួន ១៥ ដុល្លារ ឱ្យអង្គការ ActBlue ដែលជាគណៈកម្មាធិការនយោបាយមួយ ដែលរៃអង្គាសប្រាក់សម្រាប់អ្នកនយោបាយនិយមឆ្វេង និងអ្នកនយោបាយគណបក្សប្រជាធិបតេយ្យ។ នេះបើតាមឯកសារដែលដម្កល់នៅគណៈកម្មការបោះឆ្នោតសហព័ន្ធឆ្នាំ ២០២១។
ភរិយារបស់លោក Trump គឺអ្នកស្រី Melania Trump ដែលមិនមានវត្តមាននៅក្នុងការជួបជុំឃោសនានោះ បាននិយាយនៅក្នុងសារតាមប្រព័ន្ធផ្សព្វផ្សាយសង្គម កាលពីថ្ងៃអាទិត្យថា៖ «បីសាចដែលបានដឹងថាស្វាមីរបស់ខ្ញុំជាម៉ាស៊ីននយោបាយលើសមនុស្សធម្មតាបានព្យាយាមបញ្ចប់ចំណង់ចំណូលចិត្តរបស់លោក Donald សំណើច ភាពប៉ិនប្រសប់ និងការស្រឡាញ់តន្ត្រី និងការបំផុសគំនិតរបស់លោក។ ចំណុចស្នូលនៃជីវិតរបស់ស្វាមីខ្ញុំ ផ្នែកមនុស្សធម៌របស់លោក ត្រូវបានកប់នៅជាមួយនឹងម៉ាស៊ីននយោបាយ»។
អ្នកស្រីបានបន្ថែមថា៖ «សម្រាប់អ្នកដែលយំដោយការគាំទ្រ ខ្ញុំសូមអរគុណ។ ខ្ញុំសូមកោតសរសើរអ្នកដែលបានឈានហួសពីការបែកបាក់នយោបាយ។ សូមអរគុណអ្នកដែលបានចងចាំថាអ្នកនយោបាយម្នាក់ៗគឺជាបុរស ឬស្ត្រី ដែលមានគ្រួសារដែលជាទីស្រឡាញ់»។
នៅក្នុងសារបង្ហោះតាមប្រព័ន្ធផ្សព្វផ្សាយសង្គម លោក Trump បាននិយាយថា លោក «មិនអីទេ»។ លោកត្រូវបានអនុញ្ញាតឲ្យចេញពីមន្ទីរពេទ្យ កាលពីល្ងាចថ្ងៃសៅរ៍។
ឧប្បត្តិហេតុបាញ់ប្រហារ បានចោទជាសំណួរភ្លាមៗអំពីកម្រិតនៃការការពារដែលសេវាសម្ងាត់ផ្តល់ដល់លោក Trump ទោះបីជាទីភ្នាក់ងារសន្តិសុខនេះបានបដិសេធថា «មិនពិត» នូវការអះអាងដោយអ្នកគាំទ្រលោក Trump មួយចំនួន ដែលថាសេវាសម្ងាត់បានបដិសេធសំណើសុំសន្តិសុខបន្ថែមសម្រាប់លោក Trump ។
អ្នកនាំពាក្យមួយរូបរបស់ទីភ្នាក់ងារនេះបាននិយាយថា៖ «តាមពិតទៅ សេវាសម្ងាត់របស់អាមេរិកបានបន្ថែមធនធាននិងសមត្ថភាពការពារដល់លោកអតីតប្រធានាធិបតី»។
លោក Andrew McCabe អតីតនាយករងនៃការិយាល័យស៊ើបអង្កេតសហព័ន្ធ (FBI)បានប្រាប់ទូរទស្សន៍ CNN ថា នៅក្នុងផែនការសម្រាប់ការជួបជុំគ្នានៅខាងក្រៅគឺអាជ្ញាធរបានបរាជ័យក្នុងការ «លុបបំបាត់ចំណុចមើលឃើញ» ដល់ឆាកដែលលោក Trump បានថ្លែងសារ ទាំងដោយមិនបានដាក់របាំងរវាងអគារពីកន្លែងដែលខ្មាន់កាំភ្លើងបានបាញ់ និងឆាក ឬដោយដាក់មន្ត្រីអនុវត្តច្បាប់នៅក្បែរនោះ ដើម្បីរារាំងមិនអាចឲ្យឡើងទៅកាន់ដំបូលបាន។
មេដឹកនាំគណបក្សសាធារណរដ្ឋនៅក្នុងរដ្ឋសភាបាននិយាយថា ពួកគេនឹងបើកការស៊ើបអង្កេតលើឧបទ្ទវហេតុនេះ ហើយបានស្នើឱ្យនាយកសេវាសម្ងាត់អ្នកស្រី Kimberly Cheatle ចូលរួមសវនាការលើបញ្ហានេះ។ សវនាការនឹងធ្វើឡើងនៅថ្ងៃទី ២២ ខែកក្កដា។
ក្រុមអ្នកវិភាគបានព្រមានថា ការប៉ុនប៉ងធ្វើឃាតអាចធ្វើឱ្យយុទ្ធនាការប្រធានាធិបតីដែលប្រយុទ្ធគ្នាយ៉ាងខ្លាំងក្លាកាន់តែកើនកម្តៅនិងធ្វើឱ្យសង្គមអាមេរិកាំងបែកបាក់ថែមទៀត។
លោក Jacob Ware អ្នកស្រាវជ្រាវនៅក្រុមប្រឹក្សាទំនាក់ទំនងការបរទេស បានថ្លែងថា៖ «នេះគឺជាថ្ងៃដ៏ខ្មៅងងឹតពិសេសនៅអាមេរិក ដែលជាថ្ងៃខ្មៅងងឹតយ៉ាងពិសេសនៅក្នុងលទ្ធិប្រជាធិបតេយ្យរបស់យើង»។
លោកបាននិយាយបន្ថែមថា៖ «វាប្រហែលជាអំពើហិង្សានយោបាយដ៏ធ្ងន់ធ្ងរបំផុតដែលយើងបានឃើញចាប់តាំងពីការវាយប្រហារភេរវកម្មថ្ងៃទី ៩ ខែកញ្ញាមក»។
លោកសាស្ត្រាចារ្យ Casey Burgat នៃសាកលវិទ្យាល័យ George Washington បាននិយាយថា «ថ្ងៃនេះពិភពលោកបានផ្លាស់ប្តូរ»។
លោកបានបន្ថែមថា៖ «វានឹងមានការចង្អុលដាក់គ្នាតាមបន្ទាត់នយោបាយបក្សអំពីរបៀប និងមូលហេតុដែលរឿងនេះកើតឡើង ប៉ុន្តែនៅទូទាំងវិសាលគមនយោបាយ យើងនឹងឮពីការបដិសេធជារួមនូវអំពើហិង្សានយោបាយទាំងអស់។ ខ្ញុំគ្រាន់តែសង្ឃឹមថាការបដិសេធចោលអំពើហិង្សានយោបាយនឹងឈ្នះ»៕
ព័ត៌មានខ្លះនៅក្នុងសេចក្តីរាយការណ៍នេះដកស្រង់ចេញពីទីភ្នាក់ងារសារព័ត៌មាន AP, AFP និង Reuters។
ប្រែសម្រួលដោយលោក ប៉ូច រាសី និងលោក ម៉ែន គឹមសេង
វេទិកាបញ្ចេញមតិ