ការស្វែងរកឡើងវិញនូវយន្តហោះរបស់ក្រុមហ៊ុនអាកាសចរណ៍ម៉ាឡេស៊ីដែលមានជើងហោះហើរ MH370 បានចាប់ផ្តើម ក្រោយពីយន្តហោះនេះ បានបាត់ជាង១ទសវត្សរ៍មកហើយ ដែលជាអាថ៍កំបាំងដែលបានអូសបន្លាយពេលដ៏យូរបំផុតមួយក្នុងវិស័យអាកាសចរណ៍។ នេះបើយោងតាមទីភ្នាក់ងារសារព័ត៌មាន AFP។
រដ្ឋមន្ត្រីដឹកជញ្ជូនម៉ាឡេស៊ី លោក Anthony Loke បាននិយាយនៅថ្ងៃអង្គារថា ក្រុមហ៊ុនរុករកក្នុងសមុទ្រ Ocean Infinity បានបន្តស្វែងរកយន្តហោះដែលបាត់នោះ។
លោក Loke បានប្រាប់ក្រុមអ្នកយកព័ត៌មានថាសេចក្តីលម្អិតនៃកិច្ចសន្យារវាងម៉ាឡេស៊ីនិងក្រុមហ៊ុនរុករកនេះ កំពុងស្ថិតក្នុងដំណាក់កាលចុងក្រោយ តែស្វាគមន៍«ភាពសកម្មរបស់ក្រុមហ៊ុន Ocean Infinity ក្នុងការដាក់ពង្រាយនាវារបស់ក្រុមហ៊ុននោះ» ដើម្បីចាប់ផ្តើមស្វែងរកយន្តហោះនោះ ដែលបានបាត់កាលពីថ្ងៃទី៨ ខែមីនាឆ្នាំ២០១៤។
យន្តហោះប្រភេទ Boeing 777 ដែលដឹកមនុស្សចំនួន២៣៩នាក់ បានបាត់ពីអេក្រង់រ៉ាដា ពេលកំពុងហោះពីទីក្រុងគួឡាឡាំពួ ប្រទេសម៉ាឡេស៊ី ទៅទីក្រុងប៉េកាំង ប្រទេសចិន។
ទោះជាមានការស្វែងរកដ៏ធំបំផុតក្នុងប្រវត្តិសាស្ត្រអាកាសចរណ៍ក៏ដោយ ក៏គេនៅមិនទាន់រកឃើញយន្តហោះនោះនៅឡើយ៕
វេទិកាបញ្ចេញមតិ