គ្រោះរាំងស្ងួតដែលបានកើតឡើងក្នុងរយៈពេល៨ខែនៅឆ្នាំ២០២១នេះបានបង្កការខូចខាតលើផ្ទៃដីដំណាំស្រូវជាង១៧ម៉ឺនហិកតានៅទូទាំងប្រទេស។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទដែលវីអូអេបានទទួលក្នុងសប្តាហ៍នេះ។
របាយការណ៍ដែលផ្តល់ដោយអ្នកនាំពាក្យក្រសួងកសិកម្មបានបង្ហាញថាគិតត្រឹមថ្ងៃទី២៥ ខែសីហា ឆ្នាំ២០២១ ដំណាំស្រូវនៅរាជធានីនិងខេត្តចំនួន៨ គឺខេត្តបន្ទាយមានជ័យកំពង់ស្ពឺ កំពង់ធំ កណ្តាល រាជធានីភ្នំពេញ ពោធិ៍សាត់ សៀមរាប និងខេត្តតាកែវបានបន្តរងផលប៉ះពាល់និងខូចខាតដោយគ្រោះរាំងស្ងួត។
ដំណាំស្រូវដែលទទួលរងផលប៉ះពាល់មានចំនួនសរុប១៧៣.១២៥ហិកតាដែលក្នុងនោះអន្តរាគមន៍បូម សង្គ្រោះផ្ទៃដីប៉ះពាល់បានចំនួន១.៨៤៦ហិកតា ដែលស្មើនឹង៦,៣៧%នៃផ្ទៃដីដំណាំស្រូវអនុវត្តបានទូទាំងប្រទេស។
យោងតាមរបាយការណ៍ដដែលរបស់ក្រសួងកសិកម្មរុក្ខាប្រមាញ់ និងនេសាទគិតត្រឹមចុងខែសីហា ស្ថានភាពការងារបង្កបង្កើនផល ដំណាំស្រូវរដូវវស្សាមានសភាពលឿនជាងឆ្នាំមុនដោយសម្រេចបានប្រមាណជិត២លាន៧សែនហិកតាស្មើនឹង១០៣% នៃផែនការដាំដុះ ដែលឆ្នាំមុនសម្រេចបានតែ៩៨,៤៣% បើប្រៀបធៀបរយៈពេលដូចគ្នា។
អ្នកនាំពាក្យរបស់ក្រសួងកសិកម្មរុក្ខាប្រមាញ់ និងនេសាទលោក ស្រី វុឌ្ឍី ប្រាប់វីអូអេតាមសារឆ្លើយឆ្លងTelegram ក្នុងន័យដើមថា៖ «ក្នុងពេលមានគ្រោះរាំងស្ងួតក្រសួងកសិកម្មចុះធ្វើអន្តរាគមន៍ជួយដល់កសិករដែលរងគ្រោះតាមរយៈការផ្តល់គ្រាប់ពូជដំណាំនិងផ្តល់បច្ចេកទេសផលិតកម្ម។ ការធ្វើអន្តរាគមន៍សង្គ្រោះដោយបូមបាចទឹកគឺក្រសួងធនធានទឹកជាអ្នកអនុវត្តព្រមគ្នាតាមយន្តការប្រមូលផ្តុំកម្លាំងក្រោមយន្តការអនុវត្តនៃអាជ្ញាធរគ្រប់គ្រងគ្រោះមហន្តរាយរបស់ជាតិ»។
លោក សំ វិទូ អតីតនាយកប្រតិបត្តិមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា(CDAC) និងជាទីប្រឹក្សាឯករាជ្យខាងកសិកម្មកត់សម្គាល់ថាការបម្រែបម្រួលអាកាសធាតុជាកត្តាសំខាន់មួយដែលបណ្តាលឲ្យមានគ្រោះរាំងស្ងួត ស្របពេលរចនាសម្ព័ន្ធប្រព័ន្ធធារាសាស្រ្តនៅមិនទាន់ត្រូវបានរៀបចំឲ្យមាននៅគ្រប់តំបន់ដែលមានការខ្វះខាតទឹកស្រោចដំណាំក្នុងអំឡុងពេលរាំងស្ងួត។
លោកបន្ថែមថាបើគិតតាមឆ្នាំចន្ទគតិរបស់កម្ពុជាដែលមានរយៈពេល១៣ខែការធ្វើស្រូវនៅរដូវវស្សាអាចមានការពន្យារពេលផងដែរដែលតោងឲ្យប្រជាកសិករត្រៀមពូជស្រូវដែលមិនប្រកាន់រដូវ ដើម្បីបន្តការដាំដុះ។
លោកជឿថារដ្ឋាភិបាលក៏ដូចមន្ទីរកសិកម្មទៅតាមបណ្តាខេត្តបានត្រៀមរួចជាស្រេចពូជស្រូវរបៀបនេះដើម្បីចែកជូនកសិករដើម្បីឲ្យពួកគាត់មានលទ្ធភាពស្តារដើមទុនដែលខាតបង់ទៅក្នុងដំណាំស្រូវខូចខាតដោយសារគ្រោះរាំងស្ងួត។
ប៉ុន្តែអ្នកជំនាញកសិកម្មរូបនេះនិយាយថាវិធានការឆើ្លយតបខាងលើគ្រាន់តែជាមធ្យោបាយទប់ទល់រយៈពេលខ្លីប៉ុណ្ណោះហើយរដ្ឋាភិបាលគួរពិចារណាកែលម្អឬពង្រីកប្រព័ន្ធធារាសាស្ត្រតូចៗឲ្យបានច្រើនថែមទៀត បន្ថែមទៅលើប្រព័ន្ធធារាសាស្ត្រធំៗដែលមានស្រាប់ដើម្បីឆ្លើយតបទៅនឹងគ្រោះរាំងស្ងួតសម្រាប់រយៈពេលវែងនិងមធ្យម។
លោកសំ វិទូ ថ្លែងថា៖ «ការរៀបចំហេដ្ឋារចនាសម្ពន្ធប្រព័ន្ធធារាសាស្ត្រហ្នឹងឲ្យបានគ្រប់គ្រាន់ព្រោះបើសិនជាយើងប្រៀបធៀបរវាងប្រទេសកម្ពុជាយើងជាមួយប្រទេសវៀតណាមជាមួយប្រទេសថៃគឺយើងមាននៅតិចជាងគេណាស់។ ហើយប្រព័ន្ធធារាសាស្ត្ររបស់យើងដែលយើងមាន យើងឃើញថាខ្ញុំបានដើរទៅខាងដូចខេត្តព្រៃវែងទៅខាងត្បូងឃ្មុំឬក៏ទៅខាងតំបន់ទំនាបផ្សេងៗទៀតយើងឃើញភាគច្រើន គឺយើងមានតែនៅក្នុងរដូវវស្សាហើយអីចឹងរដូវប្រាំងគឺទឹករបស់យើងពិបាកក្នុងការបូមណាស់លើកលែងតែតំបន់ដែលនៅក្បែរបឹងគៀកនឹងបឹងខ្លាំងឬក៏គៀកនឹងទន្លេខ្លាំងដែលគាត់អាចបូមទឹកពីបឹងឬក៏ពីទន្លេ»។
លោកបន្ថែមថាការពង្រីកប្រព័ន្ធស្តុកទឹកតាមតំបន់វាលស្រែដោយការភ្ជាប់ទឹកពីប្រឡាយមេអាចបើកផ្លូវកសិករឲ្យសង្គ្រោះដំណាំស្រូវចេញពីស្ថានភាពរាំងស្ងួត។
លោកពន្យល់យ៉ាងដូច្នេះ៖«ប្រព័ន្ធជើងក្អែកចេញពីប្រឡាយមេទៅតាមស្រែកសិករអីហ្នឹងឬក៏មានប្រព័ន្ធស្រះស្តុកទឹកនៅតាមស្រែកសិករដើម្បីឲ្យកសិករអាចថាបូមសង្គ្រោះនៅពេលដែលគាត់ជួបបញ្ហារាំងស្ងួតល្មមៗគាត់អាចបូមពីស្រះរបស់គាត់ដើម្បីសង្គ្រោះឬក៏អាចស្រះហ្នឹងអាចក្លាយទៅជាទីកន្លែងសម្រាប់ស្តុកពូជត្រីជាដើមចឹង។ អាហ្នឹងគឺជួយល្អដើម្បីជួយឲ្យកសិករអាចពេលដែលគាត់មិនបានផលស្រូវក៏គាត់អាចបានផលត្រីអីចឹងដែរ»។
អ្នកនាំពាក្យក្រសួងកសិកម្មលោក ស្រី វុឌ្ឍី មិនផ្តល់ការអធិប្បាយទៅសំណួរពាក់ព័ន្ធនឹងការបង្កើតប្រព័ន្ធធារាសាស្ត្រដើម្បីជួយដល់ប្រជាកសិករដែលរងផលប៉ះពាល់ពីគ្រោះរាំងស្ងួត។
វីអូអេមិនទាន់អាចសុំការអធិប្បាយពីអ្នកនាំពាក្យក្រសួងធនធានទឹកនិងឧតុនិយមលោក ចាន់ យុត្ថា បានទេនៅថ្ងៃពុធនេះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោកឃុន សុខាប្រាប់វីអូអេនៅថ្ងៃពុធនេះថាកូនរដូវប្រាំងមួយដែលបានលេចឡើងក្នុងរដូវវស្សានេះបានបង្កឲ្យមានស្ថានភាពរាំងស្ងួតមួយរយៈពេលដែលស្ថានភាពនេះអាចនឹងប្រែប្រួលទៅវិញខណៈពេលនេះភ្លៀងចាប់ផ្តើមធ្លាក់មកវិញ។
លោកបន្ថែមថាលោកនាយករដ្ឋមន្ត្រី ហ៊ុន សែន បានបញ្ជាឲ្យមន្ត្រីជំនាញពាក់ព័ន្ធរបស់ក្រសួងរដ្ឋរួមមានមន្ត្រីធនធានទឹកមកធ្វើអន្តរាគមន៍ក្នុងតំបន់រាំងស្ងួត ហើយអ្វីដែលជាការបារម្ភនោះគឺទឹកជំនន់ព្រោះបើតាមការព្យាករភ្លៀងអាចនឹងធ្លាក់ខ្លាំងក្នុងប៉ុន្មានថ្ងៃខាងមុខទៀត។
លោកឃុន សុខា បញ្ជាក់ថា៖ «រាជរដ្ឋាភិបាលសម្តេចតេជោគាត់បានបញ្ជូនជំនាញខាងក្រសួងពាក់ព័ន្ធជាពិសេសធនធានទឹកហ្នឹងគេចុះធ្វើអន្តរាគមន៍បានមួយចំនួនហើយ។ ហើយឥឡូវហ្នឹងគឺការងាររាំងស្ងួតហ្នឹងគឺបានមានភ្លៀងធ្លាក់បន្តបន្ទាប់មកវិញហើយ។ ឥឡូវហ្នឹងយើងឈានដល់តំណាក់កាលខ្លាចតែមានទឹកជំនន់ទឹកភ្លៀងទៀត។ បាទដោយសារតែមានការព្យាករក្នុងប៉ុន្មានថ្ងៃនេះនឹងមានធ្លាក់ភ្លៀងធ្លាក់ខ្លាំង ច្រើនថ្ងៃជាប់គ្នា»។
បើតាមលោកឃុន សុខា ប្រទេសកម្ពុជានិងប្រទេសជាច្រើនទៀតក្នុងសាកលលោកអាចនឹងងាយរងហានិភ័យពីគ្រោះមហន្តរាយធម្មជាតិផ្សេងៗដែលបណ្តាលមកពីបម្រែបម្រួលអាកាសធាតុដូចយ៉ាងគ្រោះទឹកជំនន់ដែលបានកើតឡើងដ៏កម្រនៅប្រទេសអាល្លឺម៉ង់ឥណ្ឌា ចិនកាលពីអំឡុងខែកក្កដានិងខែសីហាឆ្នាំនេះនិងភ្លើងឆេះព្រៃក៏បានកើតឡើងនៅប្រទេសជាច្រើនដែរនៅឆ្នាំនេះ ដោយសារតែការកើនឡើងនៃកម្តៅផែនដី។
កម្ពុជាជាប្រទេសដែលងាយរងគ្រោះមួយ ដោយសារវិបត្តិបម្រែបម្រួលអាកាសធាតុ។ កាលពីឆ្នាំ២០១៥ កម្ពុជាបានរងផលប៉ះពាល់ពីគ្រោះរាំងស្ងួតខ្លាំងបំផុតនៅក្នុងរយៈពេល៥០ឆ្នាំចុងក្រោយនេះដែលប្រជាជនប្រមាណ២,៥លាននាក់នៅទូទាំងប្រទេសបានរងផលប៉ះពាល់យ៉ាងធ្ងន់ធ្ងរ។ បម្រែបម្រួលអាកាសធាតុនេះ ភាគច្រើនប៉ះពាល់ធ្ងន់ធ្ងរលើប្រជាជនដែលប្រកបរបរក្នុងវិស័យកសិកម្ម និងនេសាទ៕
