សម្រាប់ឆ្នាំ២០២៤ កន្លងទៅនេះ ប្រទេសចិនមានកំណើនសេដ្ឋកិច្ចយឺតបំផុតមិនធ្លាប់មានក្នុងរយៈពេលប៉ុន្មានទសវត្សរ៍ចុងក្រោយនេះ។ នេះបើតាមទិន្នន័យដែលត្រូវបានបង្ហាញកាលពីថ្ងៃទី១៧ ខែមករា និងចុះផ្សាយដោយទីភ្នាក់ងារសារព័ត៌មាន AFP។ មេដឹកនាំចិនក៏កំពុងសម្លឹងមើលការប្រឈមមុខគ្នាផ្នែកពាណិជ្ជកម្មទាំងក្តីបារម្ភ នៅពេលដែលប្រធានាធិបតីសហរដ្ឋអាមេរិក លោក Donald Trump ឡើងកាន់អំណាចក្នុងអាណត្តិទី២របស់លោក។
ទីក្រុងប៉េកាំងកាលពីពេលថ្មីៗនេះ បានប្រកាសអំពីវិធានការគាំទ្រយ៉ាងខ្លាំងដែលមិនធ្លាប់មាន ដើម្បីធ្វើឱ្យសេដ្ឋកិច្ចរបស់ខ្លួនងើបឡើងវិញបន្ទាប់ពីបានរងគ្រោះផ្ទួនៗគ្នា រួមមានទាំងវិបត្តិបំណុលក្នុងទីផ្សារអចលនទ្រព្យដែលអូសបន្លាយអស់រយៈពេលជាយូរ និងការចំណាយតិចតួចរបស់អ្នកប្រើប្រាស់ចិន។
ប៉ុន្តែ បើតាមទិន្នន័យផ្លូវការរបស់ការិយាល័យជាតិស្ថិតិរបស់ទីក្រុងប៉េកាំងដែលបានបង្ហាញកាលពីថ្ងៃទី១៧ ខែមករា ថា សេដ្ឋកិច្ចចិនមានកំណើន ៥ ភាគរយកាលពីឆ្នាំ២០២៤ គឺលើសបន្តិចបន្តួច អត្រាព្យាករណ៍ ៤,៩ ភាគរយដែលទីភ្នាក់ងារព័ត៌មាន AFP បានព្យាករតាមរយៈការស្ទង់មតិអ្នកវិភាគនានា។
ទោះបីជាយ៉ាងនេះក្ដី ក៏តួលេខនេះនៅតែទាបជាងកំណើនសេដ្ឋកិច្ចដែលមាន ៥,២ ភាគរយកាលពីឆ្នាំ២០២៣។ ការិយាល័យជាតិស្ថិតិបញ្ជាក់ថា កំណើនសេដ្ឋកិច្ចចិននេះកើតមានឡើងនៅចំពោះមុខ«បរិយាកាសស្មុគស្មាញនិងធ្ងន់ធ្ងរ បូករួមជាមួយនឹងសម្ពាធពីខាងក្រៅនិងការលំបាកនៅខាងក្នុង»។
មន្ត្រីចិនជាច្រើនបានសារភាពថា សេដ្ឋកិច្ចរបស់ប្រទេសនេះនៅតែប្រឈមមុខជាមួយនឹង«ការលំបាកនិងបញ្ហាប្រឈមជាច្រើន»។
អត្រានៃការលក់រាយដែលជាកត្តាវាស់ស្ទង់សតិអារម្មណ៍របស់អ្នកប្រើប្រាស់ បានកើនឡើង ៣,៥ ភាគរយ ដែលជាការធ្លាក់ចុះដ៏ខ្លាំងមួយពីអត្រាកំណើន ៧,២ភាគរយកាលពីឆ្នាំ២០២៣ ទោះបីជាផលិតផលឧស្សាហកម្មបានកើនឡើងពី ៤,៦ ភាគរយនៅឆ្នាំ២០២៣ ទៅដល់ ៥,៨ ភាគរយនៅឆ្នាំ២០២៤ក្ដី។
ទោះជាងយ៉ាងណាក្ដី ការហក់ឡើងនៃសេដ្ឋកិច្ច ៥,៤ភាគរយដែលកើតមាននៅក្នុងរយៈពេល ៤ខែចុងក្រោយនៃឆ្នាំ២០២៤ គឺមានកំណើនលឿនជាងការស្ទង់មតិរបស់សារព័ត៌មាន Bloomberg ដែលបានព្យាករថានឹងមានតែ ៥ ភាគរយប៉ុណ្ណោះ ហើយកំណើននេះក៏ល្អប្រសើរជាងកំណើននៅក្នុងរយៈពេលដូចគ្នាកាលពីឆ្នាំ២០២៣។
លោក Zhiwei Zhang ប្រធានក្រុមហ៊ុន Pinpoint Asset Management និយាយថា ទិន្នន័យដែលបានបង្ហាញនេះបញ្ជាក់ពីសារដែលមានន័យចម្រុះគ្នា។
លោកថ្លែងថា៖ «ការផ្លាស់ប្តូរគោលនយោបាយរបស់ទីក្រុងប៉េកាំងកាលពីពេលថ្មីៗនេះ បានជួយឱ្យសេដ្ឋកិច្ចចិនមានស្ថិរភាពនៅក្នុងត្រីមាសទី៤ នៃឆ្នាំ២០២៤ ប៉ុន្តែ វាទាមទារឱ្យមានកញ្ចប់លើកទឹកចិត្តជាគោលនយោបាយធំៗនិងទៀងទាត់មួយ ដើម្បីបង្កើនកម្លាំងជំរុញសេដ្ឋកិច្ចនិងធ្វើឱ្យការស្ដារឡើងវិញមានស្ថិរភាព»។
អ្នកស្រី Zichun Huang អ្នកជំនាញផ្នែកសេដ្ឋកិច្ចចិនប្រចាំនៅក្រុមហ៊ុន Capital Economics និយាយថា អ្នកស្រីរំពឹងថា «កំណើនសេដ្ឋកិច្ចចិននឹងបន្តកើនឡើងខ្លាំងនៅក្នុងប៉ុន្មានខែខាងមុខនេះ»។
អ្នកស្រីថ្លែងថា៖ «វិធានការគាំទ្រទៅលើវិស័យអចលនទ្រព្យរបស់រដ្ឋាភិបាលហាក់ដូចជាកំពុងធ្វើឱ្យធូរស្រាលខ្លះដែរ ដោយល្បឿននៃការធ្លាក់ចុះនៃតម្លៃផ្ទះមិនធ្លាក់ខ្លាំងដូចមុន ហើយការលក់ផ្ទះថ្មីៗបង្ហាញថា វិស័យនេះត្រូវបានស្ដារឡើងវិញមួយកម្រិត»។
តើនឹងមានបញ្ហាអ្វីនាពេលខាងមុខ?
អត្រាកំណើនផលិតផលក្នុងស្រុកសរុប ឬ GPD នេះ មានកម្រិតទាបបំផុតនៅប្រទេសចិនចាប់ពីឆ្នាំ១៩៩០ មក ដោយមិនទាន់គិតដល់ឆ្នាំដែលមានភាពច្របូកច្របល់ផ្នែកហិរញ្ញវត្ថុក្នុងពេលមានការរាតត្បាតជំងឺកូវីដ១៩។
ក្រុមអ្នកវិភាគដែលត្រូវបានស្ទង់មតិដោយទីភ្នាក់ងារ AFP បានប៉ាន់ប្រមាណថា កំណើនសេដ្ឋកិច្ចចិនអាចធ្លាក់មកនៅត្រឹមតែ ៤,៤ ភាគរយប៉ុណ្ណោះនៅឆ្នាំ២០២៥ ហើយអាចបន្តធ្លាក់ចុះនៅក្រោម ៤ ភាគរយនៅឆ្នាំបន្ទាប់។
រហូតមកទល់ពេលនេះ ចិនបានបរាជ័យក្នុងការងើបចេញពីវិបត្តិកូវីដ១៩ ខណៈដែលការចំណាយនៅក្នុងស្រុកកំពុងធ្លាក់ចុះយ៉ាងខ្លាំង ហើយរដ្ឋាភិបាលមូលដ្ឋានដែលពោរពេញដោយបំណុលក៏រួមចំណែកដល់ភាពយឺតយ៉ាវនៃកំណើនផងដែរ។
យ៉ាងណាក៏ដោយ ទិន្នន័យដែលបានបញ្ចេញកាលពីពេលថ្មីៗនេះបង្ហាញឱ្យឃើញពីផ្នែកវិជ្ជមានដ៏កម្រ នោះគឺការនាំចេញកាលពីឆ្នាំមុនបានឈានដល់កម្រិតខ្ពស់បំផុតមិនធ្លាប់មានក្នុងប្រវត្តិសាស្ត្រ។ ប៉ុន្តែ បញ្ហាជាច្រើនដែលកំពុងហ៊ុមព័ទ្ធការនាំចេញពាណិជ្ជកម្មដ៏ធំរបស់ចិននេះមានន័យថា ទីក្រុងប៉េកាំងប្រហែលជាមិនអាចពឹងពាក់លើការដឹកជញ្ជូននៅក្រៅប្រទេសដើម្បីជំរុញសេដ្ឋកិច្ចដ៏អាប់អួររបស់ខ្លួនបានទេ។
លោក Trump បានសន្យាថានឹងបន្ថែមទណ្ឌកម្មយ៉ាងធ្ងន់ធ្ងរទៅលើប្រទេសចិន។
អ្នកស្រី Huang ថ្លែងថា៖ «យើងនៅតែរំពឹងថា កំណើនសេដ្ឋកិច្ចចិននៅឆ្នាំ២០២៥ នឹងនៅតែថយចុះដដែល ហើយលោក Trump ទំនងជាបន្តការគំរាមកំហែងតាមរយៈការដាក់ពន្ធគយឆាប់ៗនេះ ហើយអតុល្យភាពនៃហេដ្ឋារចនាសម្ព័ន្ធដែលមានស្រាប់នឹងនៅតែដាក់សម្ពាធទៅលើសេដ្ឋកិច្ចដដែល»។
ទីក្រុងប៉េកាំងបានដាក់ចេញវិធានការមួយចំនួនជាបន្តបន្ទាប់កាលពីប៉ុន្មានខែកន្លងទៅ ដើម្បីធ្វើយ៉ាងណាឱ្យសេដ្ឋកិច្ចរបស់ខ្លួនងើបឡើងវិញ រួមមានការទម្លាក់អត្រាការប្រាក់សម្រាប់វិស័យសំខាន់ៗ ការបន្ធូរបន្ថយបំណុលរបស់រដ្ឋាភិបាលមូលដ្ឋាន និងកម្មវិធីពង្រីកការផ្ដល់ប្រាក់ឧបត្ថម្ភសម្រាប់ទំនិញប្រើប្រាស់តាមផ្ទះ។
វិបត្តិទំនុកចិត្ត
ក្រុមអ្នកឃ្លាំមើលបានតាមដានយ៉ាងដិតដល់ទៅលើទិន្នន័យដែលត្រូវបានបញ្ចេញកាលពីថ្ងៃទី១៧ មករា ថា តើវាមានសញ្ញាណាមួយអាចធ្វើឱ្យវិធានការទាំងនោះទទួលបានជោគជ័យក្នុងស្ដារសកម្មភាពសេដ្ឋកិច្ចឡើងវិញ។
ការិយាល័យជាតិស្ថិតិរបស់ចិនបានឱ្យដឹងថា៖ «កញ្ចប់គោលនយោបាយបន្ថែមទាំងនេះត្រូវបានប្រកាសឡើងទាន់ពេលវេលា ដែលធ្វើឱ្យទំនុកចិត្តរបស់សង្គមត្រូវបានធានាយ៉ាងមានប្រសិទ្ធភាព ហើយសេដ្ឋកិច្ចក៏បានងើបឡើងវិញគួរឱ្យកត់សម្គាល់»។
ធនាគារកណ្ដាលចិនបានចង្អុលបង្ហាញកាលពីពេលថ្មីៗនេះ ថា នៅឆ្នាំ២០២៥ ចិននឹងបន្តកាត់បន្ថយអត្រាការប្រាក់ដែលជាផ្នែកមួយនៃការកែប្រែដ៏សំខាន់ដែលបង្ហាញឡើងតាមរយៈគោលជំហរគោលនយោបាយរូបិយប័ណ្ណ«ដែលបន្ធូរបន្ថយខ្លះ»។
ប៉ុន្តែក្រុមអ្នកវិភាគព្រមានថា ចិនត្រូវប្រឹងប្រែងបន្ថែមទៀត ដើម្បីជំរុញកំណើននៃការប្រើប្រាស់ក្នុងស្រុកឡើងវិញ ខណៈដែលទិដ្ឋភាពនៃការនាំចេញរបស់ចិនមានសភាពកាន់តែមិនច្បាស់។
លោក Harry Murphy Cruise មកពីក្រុមហ៊ុនវិភាគសេដ្ឋកិច្ច Moody's Analytics បានប្រាប់ទីភ្នាក់ងារសារព័ត៌មាន AFP ថា៖ «ការគាំទ្រតាមរយៈគោលនយោបាយហិរញ្ញវត្ថុតែមួយមុខ ទំនងជាមិនអាចធ្វើឱ្យសេដ្ឋកិច្ចដើរនៅលើផ្លូវត្រូវវិញបានទេ។ ចិនកំពុងរងគ្រោះពីវិបត្តិខ្វះទំនុកចិត្ត មិនមែនវិបត្តិឥណទាននោះទេ។ គ្រួសារនិងក្រុមហ៊ុននានាមិនមានទំនុកចិត្តលើសេដ្ឋកិច្ចចិនដែលធ្វើឱ្យពួកគេមិនហ៊ានខ្ចីប្រាក់ មិនថាកម្ចីនោះមានអត្រាការប្រាក់ទាបយ៉ាងណាក៏ដោយ។ ដើម្បីសម្រេចគោលដៅនេះបាន គេត្រូវផ្តល់ជំនួយខាងសារពើពន្ធដើម្បីឱ្យម៉ាស៊ីនសេដ្ឋកិច្ចអាចដើរបានរលូនជាងមុន»។
ធាតុផ្សំមួយនៃគោលនយោបាយថ្មីបំផុតរបស់ទីក្រុងប៉េកាំងគឺផែនការផ្ដល់ប្រាក់ឧបត្ថម្ភ ដែលបច្ចុប្បន្ននេះត្រូវបានពង្រីកទៅដល់របស់របរសម្រាប់ប្រើប្រាស់ក្នុងផ្ទះ ដូចជាឆ្នាំដាំបាយ និងចង្ក្រានមីក្រូវ៉េវជាដើម ដែលការធ្វើដូច្នេះ ទីក្រុងប៉េកាំងសង្ឃឹមថានឹងជំរុញឱ្យមានការចំណាយឡើងវិញ។
ប៉ុន្តែ ទិន្នន័យចុងក្រោយនេះបង្ហាញថា កិច្ចប្រឹងប្រែងរបស់រដ្ឋាភិបាលមិនទាន់ទទួលបានផលត្រឡប់មកវិញនៅឡើយ ក្នុងការជំរុញឱ្យមានសកម្មភាពអ្នកប្រើប្រាស់ឡើងវិញ។
បើយោងតាមអាជ្ញាធរស្ថិតិរបស់ចិនថា ប្រទេសចិនបានគេចផុតទាំងប្រផឹតប្រផើយ ពីការធ្លាក់ចូលទៅក្នុងវិបត្តិបរិត្តផរណា ឬ ការធ្លាក់ចុះនៃតម្លៃទំនិញ កាលពីខែធ្នូ ដោយនៅពេលនោះតម្លៃទំនិញបានកើនឡើងក្នុងល្បឿនយឺតបំផុតមិនធ្លាប់មានក្នុងរយៈពេល ៩ ខែ។
ចិនបានងើបចេញពីបរិត្តផរណាមានរយៈពេល ៤ ខែ កាលពីខែកុម្ភៈឆ្នាំមុន គឺមួយខែក្រោយពេលទទួលរងនូវកាធ្លាក់ចុះតម្លៃទំនិញទាបបំផុតមិនធ្លាប់មានក្នុងរយៈពេល ១៤ ឆ្នាំ។
ការធ្លាក់ចុះតម្លៃទំនិញ អាចបង្កការគំរាមកំហែងដល់សេដ្ឋកិច្ចទាំងមូល ដោយសារតែអតិថិជននិងអ្នកប្រើប្រាស់មានទំនោរផ្អាកការទិញរបស់របរប្រើប្រាស់ក្នុងស្ថានភាពបែបនេះ ដោយពួកគេរំពឹងថាតម្លៃទំនិញនឹងបន្តធ្លាក់ចុះកាន់តែខ្លាំងថែមទៀត៕
