ប៉ុន្មានសប្តាហ៍មុនពេលដែលតៃវ៉ាន់នឹងរៀបចំការបោះឆ្នោតជាតិនិងការបោះឆ្នោតជ្រើសរើសប្រធានាធិបតីរបស់ប្រទេសនេះ ប្រធានាធិបតីតៃវ៉ាន់ លោក Ma Ying-jeou បានប្រកាសថា លោកនឹងជួបពិភាក្សាដោយផ្ទាល់ជាមួយមេដឹកនាំចិន គឺ លោក ហ្សី ជីនពីង នៅប្រទេសសាំងហ្កាពួរ។
កិច្ចប្រជុំនៅថ្ងៃសៅរ៍នេះ នឹងក្លាយជាជំនួបពិភាក្សាមុនដំបូងបង្អស់រវាងមេដឹកនាំតៃវ៉ាន់និងចិន ចាប់តាំងពីឆ្នាំ១៩៤៩មក។ អាជ្ញាធរក្នុងប្រទេសចិនកំពុងព្យាករណ៍ថា កិច្ចប្រជុំនេះនឹងក្លាយជាព្រឹត្តិការណ៍ដែលមានលក្ខណៈប្រវត្តិសាស្រ្តមួយ ក្នុងការបង្កើនទំនាក់ទំនងដែលកំពុងមានលក្ខណៈចង្អៀតរវាងប្រទេសទាំងពីរនេះ។
នៅតៃវ៉ាន់ អ្នកនយោបាយរបស់គណបក្សប្រឆាំងបានបញ្ចេញប្រតិកម្មខ្វល់ខ្វាយភ្លាមៗអំពីជំនួបពិភាក្សានេះ និងមានមនុស្សមួយចំនួនបានប្រមូលផ្តុំគ្នានៅទីក្រុងតៃប៉ិ។ អ្នកខ្លះបានស្នើឲ្យមានការចោទប្រកាន់ទៅលើលោក Ma ថាក្បត់ជាតិ ពីព្រោះមុនពេលដែលលោក Ma ត្រូវបានបោះឆ្នោតជ្រើសរើសជាប្រធានាធិបតីអាណត្តិទី២នោះ លោកបានសន្យាថានឹងមិនជួបជាមួយនឹងមេដឹកនាំរបស់ចិន ឬពិភាក្សាអំពីការរួបរួមជាដាច់ខាត។
ប្រទេសចិនបានអះអាងថា ការដឹកនាំតៃវ៉ាន់ដោយប្រជាធិបតេយ្យ គឺជាផ្នែកមួយនៃទឹកដីរបស់ខ្លួន ហើយចិនចង់ឲ្យប្រទេសទាំង២មានការរួបរួមគ្នាជាថ្មីឡើងវិញ។ ក៏ប៉ុន្តែ មានការគាំទ្រតិចណាស់ពីភាគីតៃវ៉ាន់ ក្នុងការបង្រួបបង្រួមជាមួយនឹងប្រទេសចិន។
លោកស្រី Tsai Ing-wen ដែលជាប្រធានគណបក្សប្រជាធិបតេយ្យ ហើយជាបេក្ខនារីឈរឈ្មោះប្រធានាធិបតីនៅពេលខាងមុខនេះបាននិយាយថា លោកស្រីក៏មានការភ្ញាក់ផ្អើលអំពីសេចក្ដីប្រកាសនេះដូចអ្នកដទៃទៀតដែរ៕
