ដោយមានលោក Donald Trump ដែលចូលចិត្តប្រើវោហាសាស្ត្រប្រឈមមុខដាក់គ្នា ក្លាយជាប្រធានាធិបតីសហរដ្ឋអាមេរិកជាថ្មី មេដឹកនាំចិន អឺរ៉ុប និងអ៊ុយក្រែន ត្រូវគេរំពឹងថានឹងការពារកិច្ចសហប្រតិបត្តិការសាកលនៅថ្ងៃអង្គារនេះ នៅឯជំនួបប្រជុំប្រចាំឆ្នាំនៃឥស្សរជនពិភពលោកនៅទីក្រុង Davos ប្រទេសស៊្វីស។
អ្នកចូលរួមនៅឯវេទិកាសេដ្ឋកិច្ចពិភពលោក World Economic Forum នៅរមណីយដ្ឋានភ្នំទឹកកករបស់ស្វ៊ីស ដែលបានចាប់ផ្តើលកាលពីថ្ងៃចន្ទ ដឹងច្បាស់ថា ប្រធានបទធំជាងគេគឺលោក Donald Trump ថ្វីបើពួកគេមិននិយាយឈ្មោះលោកក្តី។ លោក Trump ត្រូវគេរំពឹងថានឹងថ្លែងតាមវីដេអូទៅកាន់វេទិកានេះនៅថ្ងៃព្រហស្បតិ៍។
លោក Trump បានត្រឡប់ទៅកាន់អំណាចនៅសេតវិមានវិញកាលពីថ្ងៃចន្ទ ដោយនាំមកជាមួយនូវរដ្ឋបាលអាមេរិកថ្មីមួយដែលមានលក្ខណៈគាំពារនិយម ហើយគេបារម្ភថា លោកនឹងធ្វើតាមការសន្យាដោយដាក់ពន្ធគយខ្ពស់ទៅលើប្រទេសចិន និងសូម្បីតែសម្ពន្ធមិត្តអាមេរិកដូចជាកាណាដានិងសហភាពអឺរ៉ុប។
នៅក្នុងសុន្ទរកថាស្បថចូលកាន់តំណែង លោក Trump បានប្តេជ្ញាថារដ្ឋាភិបាលក្រុងវ៉ាស៊ីនតោននឹង«ដាក់ពន្ធគយនិងយកពន្ធពីប្រទេសដទៃ»។
ប្រធានសហភាពអឺរ៉ុបអ្នកស្រី Ursula von der Leyen ដែលចូលរួមនៅវេទិកា Davos បានសរសេរលើបណ្តាញ X ដោយការពារភាពចាំបាច់ក្នុងការធ្វើការរួមគ្នាជាសាកលនិងប្រាថ្នាចង់បង្កើតភាពជាដៃគូថ្មី។
ឧបនាយករដ្ឋមន្ត្រីចិន លោក Ding Xuexiang ចូលរួមនៅក្នុងវេទិកានេះ។ ចិនមានការប្រយ័ត្នប្រយែងចំពោះលោក Trump។ ក្រោយកិច្ចសន្ទនាតាមទូរសព្ទរវាងប្រធានាធិបតីចិន លោក Xi Jingping ជាមួយលោក Trump កាលពីថ្ងៃសុក្រសប្តាហ៍មុន លោក Xi ថាលោកសង្ឃឹមថានឹងមានការចាប់ផ្តើមល្អជាមួយនឹងរដ្ឋបាលថ្មីរបស់សហរដ្ឋអាមេរិក។ ថ្វីបើលោក Trump បានថ្លែងខ្លាំងៗអំពីការដាក់ពន្ធគយលើចិន មកទល់ពេលនេះលោកបានបង្ហាញសញ្ញាចង់ធ្វើឱ្យប្រសើរទំនាក់ទំនងជាមួយចិន រួមទាំងការអន្តរាគមន៍ឱ្យបើកបណ្តាញ TikTok នៅសហរដ្ឋអាមេរិកវិញ។
ចំណែកអ៊ុយក្រែនវិញក៏ពិនិត្យដឹតដល់ចំពោះអ្វីដែលលោក Trump នឹងធ្វើក្នុងអាណត្តិទី២របស់លោក។ ប្រធានាធិបតីអ៊ុយក្រែនលោក Volodymyr Zelensky ត្រូវគេរំពឹងថានឹងអំពាវនាវឱ្យមេដឹកនាំពិភពលោក បន្តគាំទ្រអ៊ុយក្រែនក្នុងសង្គ្រាមជាមួយរុស្ស៊ី។ លោកថ្លែងកាលពីថ្ងៃចន្ទថា លោកសង្ឃឹមថាលោក Trump នឹងសម្រេចបាន«សន្តិភាពដោយយុត្តិធម៌»៕
