ប្រធានាធិបតីសហរដ្ឋអាមេរិកលោក Donald Trump បានចេញបទបញ្ជាប្រធានាធិបតីមួយចំនួនបន្ទាប់ពីលោកបានចូលកាន់តំណែងកាលពីថ្ងៃចន្ទ ដោយរួមមានទាំងការដកសហរដ្ឋអាមេរិកចេញពីអង្គការសុខភាពពិភពលោកនិងទីភ្នាក់ងារអាកាសធាតុអង្គការសហប្រជាជាតិ និងបញ្ជាឱ្យផ្អាកជំនួយបរទេសរបស់សហរដ្ឋអាមេរិកផងដែរ។
បទបញ្ជាប្រធានាធិបតីមួយចំនួនផ្ដោតលើអន្តោប្រវេសន៍ ដូចជាប្រកាសអាសន្នចំពោះព្រំដែនរវាងសហរដ្ឋអាមេរិកនិងម៉ិកស៊ិក បញ្ចប់ការផ្ដល់សិទ្ធិជ្រកកោន និងផ្អាកការផ្ដល់សញ្ជាតិដល់ទារកដែលកើតនៅក្នុងសហរដ្ឋអាមេរិក។
លោក Trump ក៏បានបញ្ជាឱ្យត្រួតពិនិត្យ«ឱ្យដល់កម្រិតខ្ពស់បំផុតតាមតែអាចធ្វើបាន»ចំពោះអ្នកដែលចង់ចូលមកសហរដ្ឋអាមេរិក និងឱ្យរដ្ឋាភិបាលសហរដ្ឋអាមេរិកកំណត់នូវអត្តសញ្ញាណប្រទេសណាដែលអាចមានដំណើរការត្រួតពិនិត្យមិនគ្រប់គ្រាន់ ដើម្បីហាមឃាត់ពលរដ្ឋពីប្រទេសទាំងនោះមិនឱ្យចូលមកក្នុងសហរដ្ឋអាមេរិក។
នៅក្នុងអាណត្តិទីមួយរបស់លោក លោក Trump បានព្យាយាមប្រើគោលនយោបាយការបរទេសបែប «គិតពីផលប្រយោជន៍អាមេរិកមុនគេ» ហើយបទបញ្ជាប្រធានាធិបតីមួយដែលលោកបានចុះហត្ថលេខាកាលពីថ្ងៃចន្ទ គឺបានបញ្ជាឱ្យរដ្ឋមន្ត្រីការបរទេសថ្មី លោក Marco Rubio ផ្ដោតកិច្ចប្រឹងប្រែងរបស់ក្រសួងការបរទេសសហរដ្ឋអាមេរិកទៅលើបេសកកម្មមួយនេះ។
បទបញ្ជានោះមានសេចក្ដីថា៖ «ចាប់ពីថ្ងៃនេះតទៅ គោលនយោបាយការបរទេសរបស់សហរដ្ឋអាមេរិកនឹងផ្ដោតលើផលប្រយោជន៍របស់អាមេរិកជាធំ ហើយនឹងតែងតែយកគិតពីផលប្រយោជន៍អាមេរិកនិងពលរដ្ឋអាមេរិកមុនគេ»។
លោកTrump បានបញ្ជាឱ្យសហរដ្ឋអាមេរិកដកខ្លួនចេញពីកិច្ចព្រមព្រៀងអាកាសធាតុទីក្រុងប៉ារីសឆ្នាំ ២០១៥ ដែលនេះគឺជារឿងដែលលោកធ្លាប់ធ្វើម្ដងរួចទៅហើយនៅក្នុងអាណត្តិទីមួយជាប្រធានាធិបតីរបស់លោក។ លោក Trump ថ្លែងថា សហរដ្ឋអាមេរិក មានប្រវត្តិ«សម្រេចបានទាំងគោលដៅសេដ្ឋកិច្ចនិងបរិស្ថាន» ដែលគួរតែជាគំរូសម្រាប់ប្រទេសដទៃទៀត៕
លោក Trump ចេញបទបញ្ជាប្រធានាធិបតីជាច្រើន រួមទាំងឱ្យដកអាមេរិកចេញពីអង្គការសុខភាពពិភពលោក
