អតីតទេសាភិបាលធនាគារជាតិកាណាដាលោក Mark Carney បានឈ្នះការបោះឆ្នោតក្លាយជាមេដឹកនាំគណបក្សសេរីនិយម ដែលជាគណបក្សកាន់អំណាចនៅក្នុងប្រទេសកាណាដាកាលពីថ្ងៃអាទិត្យ។
លោក Carney បានឈ្នះសំឡេងឆ្នោត ៨៥,៩% ក្នុងចំណោមសមាជិកគណបក្សសេរីនិយម។ លោកនឹងជំនួសតំណែងលោកនាយករដ្ឋមន្ត្រី Justin Trudeau។ លោក Trudeau បានប្រកាសលាលែងពីតំណែងកាលពីខែមករាបន្ទាប់ពីបានកាន់អំណាចអស់រយៈពេលជាង ៩ ឆ្នាំដោយសារតែអត្រាគាំទ្រលោកធ្លាក់ចុះ។
ក្នុងនាមជាជើងថ្មីខាងនយោបាយ លោក Carney បានអះអាងថាលោកបានកាន់តំណែងនេះគឺល្អបំផុតដោយសារលោកនឹងមើលការខុសត្រូវលើការចរចាពាណិជ្ជកម្មជាមួយនឹងប្រធានាធិបតីអាមេរិកលោក Donald Trump។ សង្គ្រាមពាណិជ្ជកម្មរបស់លោក Trump និងការលើកឡើងរបស់លោកដែលចង់ឱ្យកាណាដាធ្វើជារដ្ឋទី ៥១ របស់សហរដ្ឋអាមេរិកបានធ្វើឱ្យប្រជាជនកាណាដាខឹងសម្បា។
លោក Carney បាននិយាយថា បទពិសោធន៍របស់លោកក្នុងនាមជាមនុស្សដំបូងដែលធ្វើជាទេសាភិបាលធនាគារជាតិប្រទេសកាណាដានិងប្រទេសអង់គ្លេសមានន័យថាលោកគឺជាបេក្ខជនដ៏ល្អបំផុតក្នុងការដោះស្រាយជាមួយនឹងលោក Trump។
គេរំពឹងជាទូទៅថា នាយករដ្ឋមន្ត្រីថ្មីរបស់កាណាដានឹងស្នើឱ្យមានការបោះឆ្នោតនៅក្នុងរយៈពេលប៉ុន្មានថ្ងៃឬក៏ប៉ុន្មានសប្ដាហ៍ខាងមុខនៅចំពេលដែលលោក Trump កំពុងគំរាមដាក់ពន្ធគយទូទៅ៕
