ប្រទេសកាណាដា ម៉ិកស៊ិកនិងចិនបាននិយាយកាលពីថ្ងៃអង្គារម្សិលមិញថាពួកគេ នឹងដាក់ពន្ធគយជាការសងសឹកវិញលើទំនិញនាំចូលរបស់សហរដ្ឋអាមេរិកបន្ទាប់ពីប្រធានាធិបតីសហរដ្ឋអាមេរិកលោក Donald Trump ដាក់ពន្ធគយថ្មីលើការនាំចេញទំនិញរបស់ពួកគេទៅកាន់សហរដ្ឋអាមេរិក។
សហរដ្ឋអាមេរិកបានយកពន្ធគយថ្មីចំនួន២៥ភាគរយកាលពីថ្ងៃអង្គារម្សិលមិញលើការនាំចេញទំនិញមកពីដៃគូពាណិជ្ជកម្មធំៗ២គឺប្រទេសម៉ិកស៊ិកនិងកាណាដា និងបង្កើនទ្វេដងនៃពន្ធគយកាលពីដំបូងដែលត្រឹមតែ១០ភាគរយលើការនាំចូលទំនិញចិនទៅដល់២០ភាគរយ។
លោកប្រធានាធិបតី Trump បានដាក់ពន្ធគយថ្មីលើប្រទេសម៉ិកស៊ិកនិងកាណាដា ដែលជាប្រទេសជិតខាងជិតស្និទ្ធបំផុតរបស់ខ្លួន ទោះជាបន្ទាប់ពីពួកគេបាននិយាយថាពួកគេបានទប់ស្កាត់ជនចំណាកស្រុកខុសច្បាប់និងលំហូថ្នាំញៀនខុសច្បាប់ចូលក្នុងសហរដ្ឋអាមេរិកដូចដែលលោកប្រធានាធិបតី Trump បានទាមទារក្តី។
សន្ទស្សន៍ភាគហ៊ុនសំខាន់ៗចំនួន៣របស់សហរដ្ឋអាមេរិកបានធ្លាក់ចុះយ៉ាងខ្លាំងបន្ទាប់ពីការប្រកាសកាលពីថ្ងៃចន្ទរបស់លោកប្រធានាធិបតី Trump ហើយសន្ទស្សន៍ភាគហ៊ុននីមួយៗបានធ្លាក់ប្រហែល២ភាគរយពិន្ទុនៅពេលចាប់ផ្តើមការលក់ដូរកាលពីថ្ងៃអង្គារម្សិលមិញ។
លោកប្រធានាធិបតី Trump បាននិយាយថាពន្ធគយនេះអាចធ្វើឱ្យមានការឈឺចាប់ខាងសេដ្ឋកិច្ចបណ្តោះអាសន្នសម្រាប់ពួកអ្នកប្រើប្រាស់ទំនិញនិងពាណិជ្ជកម្មសហរដ្ឋអាមេរិក ដោយតម្លៃកាន់តែខ្ពស់ឡើងលើទំនិញនាំចូលមកពីប្រទេសទាំង៣។ លោកប្រធានាធិបតីនិយាយទៀតថាក៏ប៉ុន្តែ ក្នុងរយៈពេលយូរទៅមុខ វានឹងជំរុញឱ្យក្រុមហ៊ុនសាជីវកម្មដែលប្រតិបត្តិការនៅក្នុងប្រទេសទាំង៣រើការផលិតទៅកាន់សហរដ្ឋអាមេរិកដើម្បីបញ្ចៀសការយកពន្ធគយ។
នាយករដ្ឋមន្ត្រីកាណាដាលោក Justin Trudeau បាននិយាយថាប្រទេសរបស់លោក នឹងធ្វើការសងសឹកប្រឆាំងនឹងការយកពន្ធខ្ពស់របស់លោក Trump ហើយ«នឹងមិនអនុញ្ញាតឱ្យការសម្រេចដោយអយុត្តិធម៌នេះទៅដោយគ្មានចម្លើយនោះទេ»។ លោកបាននិយាយទៀតថាកាណាដា នឹងដាក់ពន្ធគយចំនួន២៥ភាគរយលើទំនិញសហរដ្ឋអាមេរិកដែលមានតម្លៃ១០៧ពាន់លានដុល្លារ។
ប្រធានាធិបតីប្រទេសម៉ិកស៊ិកអ្នកស្រី Claudia Sheinbaum បាននិយាយថាអ្នកស្រី នឹងដាក់ពន្ធគយជាការសងសឹកលើទំនិញសហរដ្ឋអាមេរិកហើយបានប្រកាសផលិតផលដែលខ្លួននឹងដៅលើនោះនៅថ្ងៃអាទិត្យនៅឯពិធីមួយនៅទីលាន Central Plaza នៅរដ្ឋធានី Mexico City៕
