ប្រទេសកាណាដា ម៉ិកស៊ិក និងចិនបានបញ្ជាក់កាលពីថ្ងៃអង្គារថា ពួកគេនឹងដាក់ពន្ធគយសងសឹកលើទំនិញនាំចូលពីសហរដ្ឋអាមេរិក បន្ទាប់ពីប្រធានាធិបតីអាមេរិកលោក Donald Trump បានដាក់ពន្ធគយថ្មីលើទំនិញរបស់ពួកគេដែលនាំចេញទៅសហរដ្ឋអាមេរិក។
សហរដ្ឋអាមេរិកបានដាក់ពន្ធគយថ្មី ២៥% កាលពីថ្ងៃអង្គារលើទំនិញនាំចូលពីប្រទេសម៉ិកស៊ិកនិងកាណាដាដែលជាដៃគូពាណិជ្ជកម្មដ៏ធំជាងគេបង្អស់ទាំងពីររបស់ខ្លួន និងបានដំឡើងពន្ធគយដល់ ២០% លើទំនិញនាំចូលពីចិន។
នៅក្នុងការថ្លែងទៅកាន់សភាទាំងពីរថ្នាក់កាលពីយប់ថ្ងៃអង្គារ លោក Trump ក៏បានប្ដេជ្ញាផងដែរថានឹងដាក់ពន្ធគយក្នុងលក្ខណៈតបតទៅវិញលើប្រទេសផ្សេងទៀតដែលនឹងចាប់ផ្ដើមពីថ្ងៃទី ២ ខែមេសាខាងមុខនេះតទៅ ដោយលោកបានត្អូញត្អែរអំពីអ្វីដែលលោកហៅថាជាការធ្វើពាណិជ្ជកម្ម «មិនស្មើភាព»។ លោកបានលើកឡើងពីប្រទេសប្រេស៊ីល ឥណ្ឌា កូរ៉េខាងត្បូង និងសហភាពអឺរ៉ុប។
លោក Trump បានដាក់ពន្ធគយថ្មីលើម៉ិកស៊ិកនិងកាណាដាដែលជាប្រទេសជិតខាងរបស់សហរដ្ឋអាមេរិក ទោះបីជាបន្ទាប់ពីប្រទេសទាំងពីរនេះបានបញ្ជាក់ថាពួកគេបានទប់ស្កាត់ការធ្វើអន្តោប្រវេសន៍ខុសច្បាប់និងលំហូរគ្រឿងញៀនខុសច្បាប់ចូលក្នុងសហរដ្ឋអាមេរិកតាមការទាមទាររបស់លោក Trump ក៏ដោយ។
សន្ទស្សន៍ភាគហ៊ុនធំៗទាំង ៣ របស់សហរដ្ឋអាមេរិកបានធ្លាក់ចុះយ៉ាងខ្លាំង បន្ទាប់ពីលោក Trump បានប្រកាសកាលពីថ្ងៃចន្ទអំពីរឿងពន្ធគយនេះ។ សន្ទស្សន៍ភាគហ៊ុននីមួយៗធ្លាក់ចុះប្រហែល ២ ពិន្ទុភាគរយនៅពេលចាប់ផ្ដើមនៃការជួញដូរភាគហ៊ុនកាលពីថ្ងៃអង្គារ៕
វេទិកាបញ្ចេញមតិ