ព្រះតេជគុណ បូរ បេត ដែលត្រូវបានអាជ្ញាធរថៃ ឃាត់ព្រះកាយ កាលពីដើមខែធ្នូ ឆ្នាំ២០២១ ហើយដោះលែងវិញនោះ បានចាកចេញពីប្រទេសថៃទៅប្រទេសស្វីស កាលពីយប់ថ្ងៃអាទិត្យ ក្រោយទទួលបានសិទ្ធិជ្រកកោននយោបាយនៅទីនោះ។
ព្រះតេជគុណគ បូរ បេត ព្រះជន្ម ៣៥ ព្រះវស្សា ដែលជាសកម្មសង្ឃបរិស្ថាន និងតែងតែរិះគន់រដ្ឋាភិបាល បានគេចចេញពីប្រទេសកម្ពុជា ចាប់តាំងពីចុងឆ្នាំ២០២០ ហើយបានគង់នៅក្នុងប្រទេសថៃជាងមួយឆ្នាំ មុននិមន្តទៅប្រទេសស្វីស ដែលជាកន្លែងព្រះអង្គទទួលបានសិទ្ធិជ្រកកោននយោបាយ ដូចព្រះសង្ឃ និងអ្នកនយោបាយផ្សេងទៀតដែរ។ ការណ៍ដែលព្រះអង្គគេចព្រះកាយទៅប្រទេសថៃ ដោយសារព្រះអង្គបារម្ភអំពីការចាប់ព្រះកាយ ក្រោយពេលព្រះអង្គចេញព្រះភក្ត្រតវ៉ាទាមទារយុត្តិធម៌ដល់លោក រ៉ុង ឈុន មេដឹកនាំសហជីព កាលពីឆ្នាំមុន។
ព្រះអង្គមានសង្ឃដីកាប្រាប់វីអូអេកាលពីថ្ងៃអាទិត្យ ទី១២ ខែធ្នូ ឆ្នាំ២០២១ថា ព្រះអង្គ ជាជនភៀសខ្លួន ដែលត្រូវបានទទួលស្គាល់ដោយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ប៉ុន្តែកាលពីថ្ងៃទី១ ខែធ្នូ ព្រះអង្គត្រូវបានឃាត់ព្រះកាយដោយប៉ូលិសថៃ នៅវត្តដែលព្រះអង្គគង់។ នៅពេលនោះ ប៉ូលិសថៃបានសុំពិនិត្យមើលលិខិតឆ្លងដែន ហើយថា ព្រះអង្គមិនមានទិដ្ឋាការចូលប្រទេសថៃ ដោយចោទព្រះអង្គថា រស់នៅដោយខុសច្បាប់។ ប៉ុន្តែ ព្រះអង្គបញ្ជាក់ថា ព្រះអង្គជាជនភៀសខ្លួនដែលត្រូវបានទទួលស្គាល់។
ព្រះអង្គ បូរ បេត បន្តថា ប៉ូលិសថៃឲ្យព្រះអង្គសឹក ប៉ុន្តែព្រះអង្គបានប្រកែក ដោយសារព្រះអង្គជាព្រះសង្ឃជនជាតិខ្មែរ ដូច្នេះព្រះអង្គមិនទាន់ចង់សឹកទេក្នុងប្រទេសថៃ។
ក្រោយមានអន្តរាគមន៍ជាបន្តបន្ទាប់ ក្នុងនោះក៏មានអ្នកនយោបាយថៃម្នាក់ ផងដែរ ព្រះអង្គ បូរ បេត ត្រូវបានដោះលែងវិញ ប៉ុន្តែអាជ្ញាធរថៃ មិនអាចអនុញ្ញាតឲ្យព្រះអង្គគង់ក្នុងប្រទេសថៃយូរឡើយ។
ព្រះអង្គប្រាប់វីអូអេកាលពីចុងសប្តាហ៍ថា៖ «អាត្មាថា អាត្មាអត់ទៅទេ បើអាត្មាទៅ ទីមួយអាត្មាអាចនឹងជាប់គុក។ ទីពីរអាត្មា អាចនឹងស្លាប់ក្រោមរបបលោក ហ៊ុន សែន ដែលធ្វើបាបអាត្មា ធ្វើទារុណកម្មអាត្មា។ អាត្មាថា អត់ទៅទេ អាត្មានៅទីនេះ»។
ព្រះអង្គ បូរ បេត បានចាប់ផ្តើមបួសជាព្រះសង្ឃតាំងពីព្រះតេជព្រះគុណ មានព្រះជន្ម ១៣ ព្រះវស្សា នៅក្នុងភូមិស្រែវាលខាងលិច ឃុំដងកាំបិតស្រុកសណ្តាន់ ខេត្តកំពង់ធំ ដែលជាតំបន់សំបូរទៅដោយព្រៃឈើ គឺព្រៃឡង់ ដែលជាព្រៃអភិរក្សចុងក្រោយរបស់កម្ពុជា។ ការធំដឹងក្តីក្នុងតំបន់ព្រៃឡង់នេះហើយដែលធ្វើឲ្យព្រះតេជព្រះគុណស្រឡាញ់ព្រៃឈើ ហើយព្រះតេជគុណ ក៏បានក្លាយជាសកម្មសង្ឃមួយអង្គការពារព្រៃឈើរបស់កម្ពុជាដែលបានបាត់បង់ដ៏ច្រើន។ បន្ថែមពីនេះ ព្រះតេជគុណ ក៏ចង់ឃើញយុត្តិធម៌សង្គមនានា ដោយចូលរួមតវ៉ាទាមទាររកយុត្តិធម៌ដល់អ្នកតស៊ូសិទ្ធិមនុស្ស ដូចជាករណីលោក រ៉ុង ឈុន ជាដើម។
មុនចាកចេញទៅប្រទេសស្វីសព្រះអង្គ បូរ បេត ប្រាប់វីអូអេថា ព្រះអង្គមានព្រះទ័យចង់ធ្វើជាអ្នកនយោបាយមួយរូប បើមានឱកាស ដោយសារព្រះអង្គចង់ធ្វើជាតំណាងរាស្រ្ត ដើម្បីចូលរួមក្នុងកិច្ចការជួយប្រជាពលរដ្ឋ។
ព្រះអង្គបញ្ជាក់ថា៖ «ទោះបីយ៉ាងណាក៏ដោយ ក្នុងនាមយើងជាកូនខ្មែរ យើងគេចអត់ផុត ក្រៅពីយើងវិលវិញទេ ពីព្រោះអាត្មាហ្នឹងតែងតែគិតថា នឹងមានឱកាសណាមួយ អាត្មានឹងមកចូលរួមការពារព្រៃឈើនៅក្នុងប្រទេសកម្ពុជា ជាពិសេសមកចូលរួមធ្វើនយោបាយតាមបែបសង្គមប្រជាធិបតេយ្យក្នុងប្រទេសកម្ពុជា។ អានេះ ជាស្រុកកំណើតរបស់យើង។ យើងអត់អាចចោលបានទេ។ កាលៈទេសៈណាមួយ យើងត្រូវតែវិលវិញមករស់ក្នុងប្រទេសកម្ពុជាយើងវិញ»។
ក្នុងរយៈពេលចុងក្រោយនេះ អាជ្ញាធរថៃ បានចាប់បញ្ជូនសកម្មជនមួយចំនួនមកប្រទេសកម្ពុជាវិញ ទោះបីពួកគេត្រូវបានទទួលស្គាល់ដោយអង្គការសហប្រជាជាតិឲ្យស្នាក់នៅក្នុងប្រទេសថៃក៏ដោយ។
កាលពីថ្ងៃទី១៩ ខែវិច្ឆិកា អ្នកស្រី ឡាញ់ ថាវរី អតីតមេឃុំឫស្សីក្រោក ក្នុងស្រុកមង្គលបុរីខេត្តបន្ទាយមានជ័យ ត្រូវបានអាជ្ញាធរថៃឃាត់ខ្លួន ហើយបន្ទាប់មកបញ្ជូនមកកម្ពុជាកាលពីថ្ងៃទី២០ ខែវិច្ឆិកា ឆ្នាំ២០២១។ ចំណែកកាលពីដើមខែវិច្ឆិកា ឆ្នាំ២០២១ បុរសពីរនាក់ដែលម្នាក់ជាសកម្មជនសង្គម និងម្នាក់ទៀតជាសកម្មជនគណបក្សសង្គ្រោះជាតិ ត្រូវបានអាជ្ញាធរថៃចាប់ខ្លួន ហើយបញ្ជូនមកកម្ពុជាដែរ៕
