គម្រោងសាងសង់ទំនប់វារីអគ្គិសនីនៅតំបន់អារ៉ែងខេត្តកោះកុងរបស់ក្រុមហ៊ុន Sinohydro ប្រទេសចិនបាននៅទ្រឹងជាបណ្តោះអាសន្នពុំមានសកម្មភាពអ្វីទាំងអស់បន្ទាប់ពីលោកនាយករដ្ឋមន្ត្រីហ៊ុន សែននិងលោក សម រង្ស៊ី បានជួបគ្នានិងបានសន្យាផ្ទាល់មាត់ថារដ្ឋាភិបាលមិនទាន់បានសម្រេចអ្វីទាំងអស់ពាក់ព័ន្ធនឹងគម្រោងនេះ។
កាលពីសប្តាហ៍មុនក្នុងជំនួបដោយឥតមានការព្រាងទុករវាងមេដឹកនាំគណបក្សប្រឆាំង គឺ លោក សម រង្ស៊ី និង លោកនាយករដ្ឋមន្ត្រីហ៊ុន សែន នៅមន្ទីររដ្ឋសភា លោកនាយករដ្ឋមន្ត្រីហ៊ុន សែនបានសន្យាប្រាប់លោក សម រង្ស៊ីថារដ្ឋាភិបាលមិនទាន់សម្រេចអ្វីទាំងអស់ពាក់ព័ន្ធនឹងគម្រោងសាងសង់ទំនប់វារីអគ្គិសនីនៅតំបន់អារ៉ែងរបស់ក្រុមហ៊ុន Sinohydro។
លោក សម រង្ស៊ី បានស្រង់សម្តីលោក ហ៊ុន សែនមកប្រាប់អ្នកកាសែតថា ប្រហែលជាក្នុងអាណត្តិនេះមិនមានគម្រោងនេះទេសុំកុំឱ្យប្រជាពលរដ្ឋមានការបារម្ភ។
លោកសម រង្ស៊ី និយាយថា៖ «បងប្អូនកុំផ្អើល កុំបារម្ភហួសហេតុ គឺអត់ទាន់មានសេចក្តីសម្រេចទេ។ហើយសម្តេចបានលើកឡើងថាប្រហែលអាណត្តិនេះអត់ធ្វើទេ លើកទៅសម័យក្រោយឱ្យជំនាន់ក្រោយខ្មែរជំនាន់ក្រោយអ្នកសម្រេចទៅ»។
កាលពីខែកុម្ភៈឆ្នាំ២០១៤ក្រសួងរ៉ែនិងថាមពលបានចេញលិខិតអនុញ្ញាតឱ្យក្រុមហ៊ុន Sinohydro ធ្វើការសិក្សានិងស្រាវជ្រាវដើម្បីផលិតអគ្គិសនីនៅតំបន់ស្ទឹងជាយអារ៉ែងដែលមានទីតាំងនៅស្រុកថ្មបាំងខេត្តកោះកុង។
លោក Alex Gonzalez-Davidson ជនជាតិអេស្ប៉ាញ ប្រធានអង្គការមាតាធម្មជាតិមានប្រសាសន៍ថាឥឡូវសកម្មភាពនៅតំបន់អារ៉ែងមានសភាពស្ងប់ស្ងាត់ជាងមុនមិនមានក្រុមហ៊ុនណាចុះមកស្រាវជា្រវដូចពីមុនទៀតទេ ក៏ប៉ុន្តែលោកមិនដឹងថាតើរដ្ឋាភិបាលបានសម្រេចផ្អាកគម្រោងសាងសង់ទំនប់វារីអគ្គិសនីហើយឬនៅ។
លោកនិយាយថា៖ «ក្រុមហ៊ុននិងអាជ្ញាធរដូចជាអត់បានទៅអារ៉ែងតាំងពីថ្ងៃដែលគេចាប់យើងហើយហ្នឹងតាមប្រភពមួយចំនួនដែលជាសមាជិករបស់ក្រុមប្រឹក្សាស្រុក ហើយនឹងនៅក្នុងសាលាខេត្តកោះកុងក៏អត់មានព័ត៌មានអ្វីសោះ។សម្រាប់យើងអត់ព័ត៌មានគឺមានន័យថាល្អ។មានន័យថាអាចគេបានផ្អាក»។
លោក អ៊ិត ប្រាង រដ្ឋលេខាធិការក្រសួងរ៉ែ និង ថាមពលមានប្រសាសន៍ថាក្រសួងមិនទាន់ទទួលលិខិតផ្លូវការណាមួយពីរដ្ឋាភិបាលថាឱ្យផ្អាកគម្រោងសាងសង់ទំនប់វារីអគ្គិសនីនៅតំបន់អារ៉ែងនៅឡើយទេ។
លោកមានប្រសាសន៍ថា៖ «អត់ទាន់សុំ អត់ទាន់ផ្អាកអីក៏អត់ទាន់មានការសម្រេចថាម៉េចដែរ។ ក្រសួងនៅរង់ចាំស្ងៀមអញ្ចឹងទៅសិន។ ចេះតែឮថារដ្ឋាភិបាលផ្អាក។ គ្រាន់តែឮទេ តែអត់ទាន់មានការសម្រេចអ្វីទាំងអស់ ហើយខាងក្រុមហ៊ុនហ្នឹងហើយខាងអ្នកសិក្សាក៏អត់ទាន់បន្តការសិក្សាអ្វីទៀតដែរ»។
ក្រុមហ៊ុន Sinohydro មិនបានឆ្លើយតាមសារអេឡិកត្រូនិកទេរហូតមកដល់ថ្ងៃព្រហស្បតិ៍នេះ។
តំបន់អារ៉ែងដែលស្ថិតនៅក្នុងស្រុកថ្មបាំង ខេត្តកោះកុងនោះត្រូវបានក្រសួងរ៉ែ និងថាមពលផ្តល់អាជ្ញាបណ្ណដល់ក្រុមហ៊ុនចំនួន៣ ចាប់តាំងពីឆ្នាំ២០០៧ដល់ឆ្នាំ២០១០ និងពី២០១០ ដល់២០១៣ ហើយចុងក្រោយគឺក្រុមហ៊ុនស៊ីណូហាយដ្រូបានទទួលអាជ្ញាបណ្ណដើម្បី ធ្វើការសិក្សានៅឆ្នាំ២០១៤នេះ ដោយចាប់ពីខែកុម្ភៈរហូតដល់ខែកញ្ញាដើម្បីធ្វើវារីអគ្គិសនី ដែលអាចរំពឹងថា នឹងផលិតថាមពលចំនួន៥០មេហ្កាវ៉ាត់នៅរដូវប្រាំង និង១០៨មេហ្កាវ៉ាត់នៅរដូវវស្សា។
គម្រោងសាងសង់ទំនប់វារីអគ្គិសនីនេះត្រូវបានចោទប្រកាន់ថាបានប៉ះពាល់ដល់ជីវភាពរស់នៅរបស់ប្រជាពលរដ្ឋជនជាតិដើមភាគតិចជង ដែលរស់នៅដោយពឹងផ្អែកទៅលើផលនិង អនុផលព្រៃឈើនៅទីនោះ៕
