រដ្ឋមន្ត្រីការបរទេសអាមេរិកលោក Antony Blinken ដែលធ្វើទស្សនកិច្ចនៅប្រទេសកូរ៉េខាងត្បូងបានបញ្ជាក់ជាថ្មីអំពីទំនុកចិត្តលើការដោះស្រាយរបស់កូរ៉េខាងត្បូងចំពោះភាពចលាចលនយោបាយ ស្របពេលដែលក្រុមអ្នកស៊ើបអង្កេតរបស់កូរ៉េខាងត្បូងមានបំណងពន្យារបន្ថែមនូវដីកាចាប់ខ្លួនប្រធានាធិបតីទម្លាក់ពីតំណែងលោក Yoon Suk Yeol។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
ក្រុមអ្នកស៊ើបអង្កេតដែលស៊ើបអង្កេតលើលោក Yoon ទាក់ទិននឹងការប្រកាសប្រើច្បាប់អាជ្ញាសឹកកាលពីថ្ងៃទី ៣ ខែធ្នូឆ្នាំមុន មិនបានអនុវត្តដីកាចាប់ខ្លួននេះទេកាលពីថ្ងៃសុក្រសប្ដាហ៍មុន ដោយសារត្រូវបានរារាំងដោយកងអង្គរក្សប្រធានាធិបតី។
ការប្រកាសប្រើច្បាប់អាជ្ញាសឹករបស់លោក Yoon នោះបានធ្វើឲ្យមានការរិះគន់ខ្លាំងក្លាពីមន្ត្រីសហរដ្ឋអាមេរិកដែលក្នុងនោះរួមទាំងអនុរដ្ឋមន្ត្រីការបរទេសអាមេរិកលោក Kurt Campbell ផងដែរ ដែលបាននិយាយថាវិធានការនេះគឺជា «ការវិនិច្ឆ័យមិនត្រឹមត្រូវដ៏អាក្រក់»។
លោក Blinken បាននិយាយបន្ទាប់ពីបានជួបជាមួយនឹងរដ្ឋមន្ត្រីការបរទេសកូរ៉េខាងត្បូងលោក Cho Tae-yul ថា សហរដ្ឋអាមេរិកបានបង្ហាញ «ក្ដីបារម្ភធ្ងន់ធ្ងរ» ចំពោះកូរ៉េខាងត្បូងទាក់ទិននឹងវិធានការមួយចំនួនដែលលោក Yoon បានធ្វើឡើងពាក់ព័ន្ធនឹងការប្រកាសប្រើច្បាប់អាជ្ញាសឹករបស់លោក។
ប៉ុន្តែ ព្រឹត្តិការណ៍នានាដែលកើតឡើងបន្តបន្ទាប់ក្រោយមកបានឆ្លុះបញ្ចាំងឲ្យឃើញនូវមុខមាត់របស់កូរ៉េខាងត្បូងក្នុងនាមជាប្រទេសប្រជាធិបតេយ្យដ៏ជោគជ័យមួយ «ដែលមានលក្ខណៈរឹងមាំអស្ចារ្យ»។ នេះបើតាមការបញ្ជាក់របស់លោក Blinken នៅក្នុងសន្និសីទកាសែតមួយ។
លោកបានលើកឡើងថា៖ «ការឆ្លើយតបដែលយើងបានឃើញ និងការឆ្លើយតបដែលយើងរំពឹងថានឹងបន្តឃើញគឺការឆ្លើយតបមួយប្រកបដោយសន្តិវិធីនិងស្របទាំងស្រុងតាមរដ្ឋធម្មនុញ្ញនិងនីតិរដ្ឋ»៕
លោក Blinken ជឿជាក់លើដំណើរការប្រជាធិបតេយ្យនៅកូរ៉េខាងត្បូង
- Reuters
វេទិកាបញ្ចេញមតិ