កូរ៉េខាងជើងបានបាញ់មីស៊ីលមួយគ្រាប់កាលពីថ្ងៃចន្ទ ពេលរដ្ឋមន្ត្រីការបរទេសសហរដ្ឋអាមេរិកលោក Antony Blinken ធ្វើទស្សនកិច្ចនៅកូរ៉េខាងត្បូង ដែលនៅទីនោះ លោកបានព្រមានថាកូរ៉េខាងជើងកំពុងធ្វើការកាន់តែជិតស្និទ្ធជាមួយរុស្ស៊ីខាងបច្ចេកវិទ្យាអវកាសទំនើប។ នេះបើយោងតាមទីភ្នាក់ងារសារព័ត៌មាន AFP។
កូរ៉េខាងជើងបានបាញ់មីស៊ីលផ្លោងមួយគ្រាប់ធ្លាក់ចូលក្នុងសមុទ្រ នៅពេលដែលលោក Blinken កំពុងជួបពិភាក្សាការងារក្នុងទីក្រុងសេអ៊ូលនៃប្រទេសកូរ៉េខាងត្បូង។
គ្រាប់មីស៊ីលនោះហោះបានចម្ងាយប្រមាណ ១.១០០ គីឡូម៉ែត្រ។ នេះបើតាមការបញ្ជាក់របស់យោធាកូរ៉េខាងត្បូង។
ដោយចង្អុលបង្ហាញពីសមយុទ្ធបីផ្លូវដែលកាន់តែកើនឡើងនិងការចែករំលែកព័ត៌មានសម្ងាត់អំពីកូរ៉េខាងជើង លោក Blinken បាននិយាយថា៖ «ការបាញ់មីស៊ីលថ្ងៃនេះគឺគ្រាន់តែជាការរំឭកដល់យើងទាំងអស់គ្នាថាតើកិច្ចសហការរបស់យើងសំខាន់ប៉ុណ្ណា»។
លោក Blinken និងលោក Cho Tae-yul ដែលជាសមភាគីកូរ៉េខាងត្បូងរបស់លោក បានថ្កោលទោសការបាញ់មីស៊ីលនេះនៅពេលថ្លែងក្នុងសន្និសីទកាសែតរួមគ្នាមួយ ដែលនៅទីនោះលោក Blinken ដែលនឹងបញ្ចប់អាណត្តិជាមន្ត្រីការទូតកំពូលរបស់អាមេរិកនេះ បានព្រមានថារុស្ស៊ីកំពុងបង្កើនការគាំទ្រលើកូរ៉េខាងជើងដើម្បីជារង្វាន់សម្រាប់ការដែលកូរ៉េខាងជើងជួយរុស្ស៊ីប្រយុទ្ធនឹងអ៊ុយក្រែន។
លោក Blinken ថ្លែងថា៖ «[កូរ៉េខាងជើង] កំពុងទទួលបានរួចហើយនូវយុទ្ធោបករណ៍និងការហ្វឹកហ្វឺនពីរុស្ស៊ី។ ពេលនេះយើងមានហេតុផលជឿថារុស្ស៊ីមានបំណងចែករំលែកបច្ចេកវិទ្យាផ្កាយរណបនិងអវកាសទំនើបជាមួយកូរ៉េខាងជើង»។
លោក Blinken ក៏បានបញ្ជាក់ជាថ្មីផងដែរអំពីក្ដីបារម្ភដែលថារុស្ស៊ី ដែលជាសមាជិកក្រុមប្រឹក្សាសន្តិសុខអង្គការសហប្រជាជាតិដែលមានសិទ្ធិវេតូ នឹងទទួលស្គាល់ជាផ្លូវការថាកូរ៉េខាងជើងជារដ្ឋដែលមានអាវុធនុយក្លេអ៊ែរ។ ការទទួលស្គាល់នេះនឹងជាដំណើរបង្អាក់ដ៏ធំចំពោះការយល់ស្របជាសាកលដែលថាកូរ៉េខាងជើងត្រូវតែបញ្ចប់កម្មវិធីអាវុធនុយក្លេអ៊ែររបស់ខ្លួន៕
កូរ៉េខាងជើងបាញ់មីស៊ីលចំពេលលោក Blinken ព្រមានអំពីសហប្រតិបត្តិការជាមួយរុស្ស៊ី
ទីក្រុងសេអ៊ូល ប្រទេសកូរ៉េខាងត្បូង —
វេទិកាបញ្ចេញមតិ