សមាជិកសភាសហរដ្ឋអាមេរិកមកពីគណបក្សធំៗទាំងពីរបានសម្តែងការតាំងចិត្ត កៀរគរសម្ពាធអន្តរជាតិ ដើម្បីបញ្ចប់ការឈឺចាប់របស់ពលរដ្ឋមីយ៉ាន់ម៉ា ដែលស្ថិតក្រោមកណ្តាប់ដៃនៃរបបសឹកដែលបានកាត់ផ្តាច់ការគ្រប់គ្រងប្រទេសតាមបែបប្រជាធិបតេយ្យកាលពីខែកុម្ភៈឆ្នាំ២០២១។
សមាជិករដ្ឋសភាលោក Chris Smith ខាងគណបក្សសាធារណរដ្ឋនិងជាសហប្រធានគណៈកម្មការសិទ្ធិមនុស្ស Tom Lantos បានថ្លែងក្រោយសវនាការស្តីពីសិទ្ធិមនុស្សក្នុងប្រទេសម៉ីយ៉ាន់ម៉ាកាលពីសប្តាហ៍ទី២ក្នុងខែកញ្ញានេះថា៖ «យើងកំពុងតាំងចិត្តឡើងវិញចំពោះសិទ្ធិមនុស្សនិងសន្តិភាពសម្រាប់ប្រជាជនភូមា»។
លោកថ្លែងប្រាប់វីអូអេបន្តថា ៖«យើងចាំបាច់ត្រូវធ្វើការងារថែមទៀតសម្រាប់ពលរដ្ឋដែលកំពុងរងទុក្ខវេទនាយ៉ាងខ្លាំងក្រោមរបបឃោរឃៅ»។
លោកបានអំពាវនាវឲ្យបន្តកិច្ចប្រឹងប្រែង«ដើម្បីបញ្ឈប់រំហូរអាវុធ មិនថាមកពីឥណ្ឌា ចិននិងរុស្សីនោះទេ»។ លោកថ្លែងថា ចាំបាច់ត្រូវមាន«បម្រាមកាន់តែម៉ឺងម៉ាត់»ជាពិសេសលើប្រេង ដែលជាប្រភពចំណូលដ៏សន្ធឹកសន្ធាប់របស់របបសឹក។
សមាជិករដ្ឋសភា អ្នកស្រី Ilhan Omar ខាងគណបក្សប្រជាធិបតេយ្យ និយាយថាសមាជិកនៃគណៈកម្មការសិទ្ធិមនុស្សនេះ«ចង់ធ្វើឲ្យប្រាកដថាអំពើប្រល័យពូជសាសន៍ដែលបានកើតឡើងលើជនជាតិRohingya និងអ្វីៗដែលបានកើតឡើងក្នុងប្រទេសមីយ៉ាន់ម៉ា នឹងមិនត្រូវបានបំភ្លេចទេ ហើយថាយើងនឹងនៅតែបន្តលើកបញ្ហានេះថាជារឿងសំខាន់ក្នុងសភា»។
អ្នកស្រី Omar បានប្រាប់ VOA ថាសវនាការនេះគឺធ្វើឲ្យប្រាកដថាពិភពលោកកំពុងធ្វើការជាមួយគ្នាដើម្បី«យកចិត្តទុកដាក់ចំពោះប្រជាជនមីយ៉ាន់ម៉ា ព្យាយាមផ្តល់ជំនួយមនុស្សធម៌ និងធ្វើឲ្យប្រាកដថាមានរដ្ឋាភិបាលស៊ីវិល ហើយក៏មិនភ្លេចជនខ្ចាត់ព្រាត់ និងជនត្រូវផ្លាស់ទីដោយបង្ខំក្នុងស្រុក និងជនភៀសខ្លួនផងដែរ ពេលយើងព្យាយាមគិតអំពីជំនួយមនុស្សធម៌»។
សមាជិករដ្ឋសភាខាងគណបក្សប្រជាធិបតេយ្យ លោក James P. McGovern ដែលជាអ្នកតស៊ូមតិដ៏យូរអង្វែងមកហើយលើបញ្ហាសិទ្ធិមនុស្ស និងជាសហប្រធានគណៈកម្មការសិទ្ធិមនុស្ស Tom Lantos ដែលផ្អែកតាមវិបសាយរបស់គណៈកម្មការ«ទទួលបន្ទុកខាងការលើកកម្ពស់ ការពារនិងតស៊ូមតិគាំទ្រសិទ្ធិមនុស្សអន្តរជាតិដូចមានចែងក្នុងសេចក្តីប្រកាសជាសកលស្តីពីសិទ្ធិមនុស្សនិងលិខិតូបករណ៍សិទ្ធិមនុស្សពាក់ព័ន្ធដទៃទៀត»។
លោក McGovern បាននិយាយក្នុងពេលថ្លែងបើកសវនាការថាសំណួរបឋមសម្រាប់គណៈកម្មការពិនិត្យមើលគឺថាតើសភា រដ្ឋបាលលោក Biden និងសហគមអន្តរជាតិ «កំពុងធ្វើអ្វីៗដែលយើងអាចធ្វើបានហើយឬនៅ ដើម្បីធ្វើជាខ្នងបង្អែកសម្រាប់អ្នកប្រយុទ្ធដើម្បីលទ្ធិប្រជាធិបតេយ្យនិងដើម្បីស្តារលទ្ធិប្រជាធិបតេយ្យនៅភួមា»។
លោកថ្លែងថាសវនាការនេះក៏ជាឱកាសពិនិត្យមើលប្រសិទ្ធភាពសេចក្តីស្នើច្បាប់«ភូមារួបរួមតាមរយៈគណនេយ្យភាពយោធាម៉ឺងម៉ាត់»ឬហៅកាត់ថា BURMA Act ដែលត្រូវបានអនុម័តក្លាយជាច្បាប់រួចហើយកាលពីខែធ្នូឆ្នាំ២០២២ ដែលរួមមានវិធានការការទូតនិងសេដ្ឋកិច្ចមួយចំនួន ដើម្បីដាក់សម្ពាធឲ្យមានការស្តារលទ្ធិប្រជាធិបតេយ្យឡើងវិញនៅមីយ៉ាន់ម៉ា។
លោក McGovern និយាយថា«ការអនុវត្តច្បាប់នេះ កំពុងប្រព្រឹត្តិទៅ ហើយការពិភាក្សាថ្ងៃនេះ គឺជាឱកាសពិនិត្យមើលថាតើគេបានធ្វើអ្វីខ្លះហើយ ហើយសួរថាគេសម្រេចបានអ្វីខ្លះ និងថាតើយើងដឹងថាយើងកំពុងមានវឌ្ឍនភាពដោយរបៀបណា ហើយថាតើយើងអាចធ្វើអ្វីបានទៀត?»
កសិណសាក្សី
មន្ត្រីក្រសួងការបរទេសអាមេរិក ដែលបានធ្វើកសិណក្នុងសវនាការ បានរៀបរាប់កិច្ចប្រឹងប្រែងរបស់រដ្ឋាភិបាល ដើម្បីដាក់សម្ពាធសេដ្ឋកិច្ចនិងនយោបាយលើរបបសឹក ហើយបានគូសបញ្ជាក់ការគាំទ្រជំនួយមនុស្សធម៌រួមទាំងសម្រាប់ជនភៀសខ្លួន Rohingya ក្នុងប្រទេសបង់ក្លាដែសដែលនៅជិតខាងមីយ៉ាន់ម៉ាផងដែរ។
អ្នករាយការណ៍ ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅមីយ៉ាន់ម៉ាលោក Tom Andrews ដែលជាសាក្សីម្នាក់ក្នុងសវនាការនិងជាអតីតសមាជិកសភាអាមេរិកដែរនោះ បានអំពាវនាវឲ្យសហរដ្ឋអាមេរិកបន្តឹងទណ្ឌកម្មលើមេដឹកនាំយោធា ដោយតម្រង់គោលដៅលើប្រភពចំណូលចម្បងរបស់ពួកគេគឺការលក់ប្រេងនិងឧស្ម័ន។
លោក Andrews និយាយថា«យើងចាំបាច់ត្រូវដាក់ទណ្ឌកម្មថែមទៀត។ ខ្ញុំជំរុញឲ្យសហរដ្ឋអាមេរិក ចូលរួមជាមួយសហភាពអឺរ៉ុបហើយដាក់ទណ្ឌកម្មភ្លាមៗលើប្រភពចំណូលដ៏ធំបំផុតតែមួយគត់របស់របបសឹកគឺសហគ្រាសប្រេងនិងឧស្ម័នមីយ៉ាន់ម៉ា»។
លោកនិយាយថា «បើអ្នកអាចបញ្ឈប់លុយបាន នោះអ្នកអាចកាត់ផ្តាច់សមត្ថភាពរបស់ពួកគេ មិនឲ្យបន្តអំពើឃោរឃៅទាំងនេះបានហើយ» ដោយនិយាយសម្តៅដល់ការស្លាប់ជនស៊ីវិលក្រោមកណ្តាប់ដៃយោធា។
ក្នុងបទសម្ភាសន៍ជាមួយ VOA ក្រោយសវនាការនេះ លោក Andrews បាននិយាយថាសវនាការនេះ លើកទឹកចិត្តរូបលោក។
«ការណ៍ដែលសភាសហរដ្ឋអាមេរិក សួរសំណួរទាំងនេះទៅរដ្ឋបាល[លោកBiden]គឺជាសញ្ញាដ៏វិជ្ជមានខ្លាំងមួយ»។
អ្នកស្រី Malaki Karen សកម្មជនសិទ្ធិមនុស្ស Rohingya ដ៏លេចធ្លោម្នាក់ ក៏បានធ្វើកសិណក្នុងសវនាការនេះដែរ ដោយធ្វើឲ្យមានការយកចិត្តទុកដាក់ទៅលើស្ថានភាពយ៉ាប់យ៉ឺនរបស់សហគមន៍ Rohingya និងតម្រូវការរក្សាការប្តេជ្ញាចិត្តដោយសហរដ្ឋអាមេរិកនិងសហគមន៍អន្តរជាតិ។
អ្នកស្រីថ្លែងថា៖ «យើងចង់បានការចូលរួមថែមទៀតពីសហរដ្ឋអាមេរិក អង្គការសហប្រជាជាតិ ប្រទេសបង់ក្លាដែស និងប្រទេសដែលមានឥទ្ធិពលនានាដែលខ្វល់ខ្វាយអំពីសិទ្ធិមនុស្ស»។
