ប្រធានាធិបតីសហរដ្ឋអាមេរិកលោក Joe Biden កាលពីថ្ងៃព្រហស្បតិ៍បានជួបពិភាក្សាជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu នៅពេលលោកទាំងពីរព្យាយាមពិភាក្សាលម្អិតអំពីសន្តិភាពជាអចិន្ត្រៃយ៍ដើម្បីបញ្ចប់ការឈឺចាប់នៅក្នុងតំបន់ហ្កាហ្សា។
នៅពេលនោះ អនុប្រធានាធិបតីអាមេរិកអ្នកស្រី Kamalas Harris បានប្រើភាសាខ្លាំងៗជាមួយលោក Netanyahuដោយនិយាយថាអ្នកស្រីមាន «ក្ដីបារម្ភយ៉ាងខ្លាំង» អំពីទំហំនៃការឈឺចាប់របស់មនុស្សនៅក្នុងតំបន់ហ្កាហ្សា។
អ្នកស្រីបាននិយាយថា៖ «ខ្ញុំសូមបញ្ជាក់ជាមួយលោកនាយករដ្ឋមន្ត្រីនូវក្ដីបារម្ភយ៉ាងខ្លាំងរបស់ខ្ញុំអំពីទំហំនៃការឈឺចាប់របស់មនុស្សនៅក្នុងតំបន់ហ្កាហ្សា រួមទាំងការស្លាប់របស់ជនស៊ីវិលស្លូតត្រង់ដ៏ច្រើនអនេកផងដែរ»។
អ្នកស្រីបានបន្ថែមថា៖ «ខ្ញុំបានបញ្ជាក់យ៉ាងច្បាស់អំពីការព្រួយបារម្ភយ៉ាងខ្លាំងរបស់ខ្ញុំអំពីស្ថានភាពមនុស្សធម៌ធ្ងន់ធ្ងរនៅទីនោះដោយមនុស្សជាង ២ លាននាក់កំពុងប្រឈមនឹងបញ្ហាអសន្តិសុខស្បៀងអាហារយ៉ាងខ្លាំង ហើយមនុស្សជាងកន្លះលាននាក់ទៀតកំពុងប្រឈមនឹងបញ្ហាអសន្តិសុខស្បៀងអាហារបន្ទាន់ក្នុងកម្រិតមហន្តរាយ។ អ្វីដែលបានកើតឡើងនៅក្នុងតំបន់ហ្កាហ្សាក្នុងរយៈពេលជាង ៩ ខែកន្លងមកនេះគឺមានលក្ខណៈមហន្តរាយ»។
ពាក្យខ្លាំងៗរបស់អ្នកស្រី Harris ត្រូវបានបង្កើនកាន់តែខ្លាំងឡើងដោយក្រុមអ្នកតវ៉ានៅខាងក្រៅសេតវិមានកាលពីថ្ងៃព្រហស្បតិ៍ដែលជំទាស់ទៅនឹងប្រតិបត្តិការយោធារបស់លោក Netanyahuនៅក្នុងតំបន់ហ្កាហ្សាហើយចង់ឱ្យលោក Biden ឈប់គាំទ្រលោក Netanyahu។
សេតវិមានបានបញ្ជាក់ថា ជំនួបរបស់លោក Netanyahu ជាមួយលោក Bidenមានលក្ខណៈផ្លែផ្កា ក៏ប៉ុន្តែមិនបានលើកឡើងថាជំនួបនេះឈានដល់ការបំបែកភាពទាល់ច្រកណាមួយទេ។
លោក John Kirby ទីប្រឹក្សាផ្នែកសារគមនាគមន៍សន្តិសុខជាតិសេតវិមាន បានប្រាប់ VOAថា៖ «នេះជាការពិភាក្សាដ៏ល្អមួយជាមួយលោកនាយករដ្ឋមន្ត្រី Netanyahu។ លោកប្រធានាធិបតី [Biden] មានឱកាសបង្ហាញក្ដីបារម្ភរបស់លោកអំពីថាតើយើងដើរដល់កន្លែងណាហើយទាក់ទិននឹងកិច្ចព្រមព្រៀងឈប់បាញ់គ្នា និងមានបំណងចង់ឱ្យកិច្ចព្រមព្រៀងនេះសម្រេចឱ្យបានកាន់តែឆាប់ ក៏ដូចជាពិភាក្សាអំពីបញ្ហាជាច្រើនផ្សេងទៀតដូចជាសកម្មភាពបង្កអស្ថិរភាពរបស់អ៊ីរ៉ង់ជាដើម...»៕
អ្នកស្រី Begum Ersoz រួមចំណែកចំពោះសេចក្ដីរាយការណ៍នេះពីសេតវិមាន។ អ្នកស្រី Kim Lewis រួមចំណែកចំពោះសេចក្ដីរាយការណ៍នេះពីរដ្ឋធានីវ៉ាស៊ីនតោន។
អ្នកស្រី Harris ប្រាប់លោក Netanyahu ថា អ្នកស្រីមាន «ក្ដីបារម្ភយ៉ាងខ្លាំង» អំពីទំហំនៃការឈឺចាប់នៅហ្កាហ្សា
វេទិកាបញ្ចេញមតិ