លោកប្រធានាធិបតី Joe Biden បាននិយាយកាលពីថ្ងៃពុធថា លោក«កំពុងប្រគល់ឲ្យអ្នកបន្តវេនជំនាន់ថ្មី» ខណៈដែលលោកពន្យល់ពីការចាកចេញភ្លាមៗរបស់លោកពីការឈរឈ្មោះជាបេក្ខជនប្រធានាធិបតីឆ្នាំ២០២៤ ដល់ពលរដ្ឋអាមេរិកាំងជាលើកដំបូងនៅយប់ថ្ងៃពុធ ពីការិយាល័យសេតវិមាន។ នេះជាការបញ្ចប់ជីវិតនយោបាយជាង៥០ឆ្នាំរបស់លោកផងដែរ។
លោក Biden បានថ្លែងថា៖ «ខ្ញុំគោរពការិយាល័យនេះ។ ប៉ុន្តែខ្ញុំស្រឡាញ់ប្រទេសរបស់ខ្ញុំច្រើនជាង»។
លោក Biden ដែលមានវ័យ៨១ ឆ្នាំបានច្រានចោលសម្ពាធជាច្រើនសប្តាហ៍ពីគណបក្សប្រជាធិបតេយ្យឱ្យដើរចេញបន្ទាប់ពីការជជែកដេញដោលដ៏មហន្តរាយនៅថ្ងៃទី២៧ ខែមិថុនាដោយមានពេលមួយនោះលោកបាននិយាយថាមានតែ «ព្រះអម្ចាស់ដ៏មានមហិទ្ធិឫទ្ធិ» ប៉ុណ្ណោះដែលអាចបញ្ចុះបញ្ចូលលោកឲ្យចាកចេញបាន។
លោកBiden បានថ្លែងថា៖ «ខ្ញុំបានសម្រេចចិត្តថា មធ្យោបាយដ៏ល្អបំផុតឆ្ពោះទៅមុខ គឺការប្រគល់ឲ្យអ្នកបន្តវេនជំនាន់ថ្មី។ នោះជាមធ្យោបាយដ៏ល្អបំផុតក្នុងការបង្រួបបង្រួមប្រទេសជាតិរបស់យើង»។
លោក Biden បានធ្វើការសម្រេចចិត្តបន្ទាប់ពីការពិចារណាយ៉ាងលំបាកអស់ពេលជាច្រើនថ្ងៃ និងការឈឺចាប់ចំពោះការស្ទង់មតិផ្ទៃក្នុងដែលព្យាករណ៍ថាលោកអាចចាញ់លោក Donald Trump មកពីគណបក្សសាធារណរដ្ឋនៅក្នុងខែវិច្ឆិកា ហើយទាញសមាជិកបក្សប្រជាធិបតេយ្យឲ្យធ្លាក់ទៅជាមួយ។
លោក Biden បានបន្ថែមថា៖ «រឿងដ៏អស្ចារ្យរបស់អាមេរិកគឺនៅត្រង់ថាស្តេច និងជនផ្តាច់ការមិនអាចដឹកនាំបានទេ។ ពលរដ្ឋជាអ្នកដឹកនាំ។ ប្រវត្តិសាស្ត្រគឺនៅក្នុងដៃរបស់អ្នក។ អំណាចគឺនៅក្នុងដៃរបស់អ្នក។ គំនិតរបស់អាមេរិកគឺស្ថិតនៅក្នុងដៃរបស់អ្នក»។
នេះជាការថ្លែងសុន្ទរកថាជាសាធារណៈលើកដំបូងរបស់លោក Biden ចាប់តាំងពីលោកបានប្រកាសកាលពីថ្ងៃអាទិត្យតាមរយៈប្រព័ន្ធផ្សព្វផ្សាយសង្គមថាលោកបានសម្រេចចិត្តមិនឈរឈ្មោះបោះឆ្នោតឡើងវិញនៅថ្ងៃទី៥ ខែវិច្ឆិកា។
លោកBiden គឺជាប្រធានាធិបតីដែលកំពុងកាន់អំណាចដំបូងគេដែលមិនឈរឈ្មោះបោះឆ្នោតឡើងវិញចាប់តាំងពីឆ្នាំ១៩៦៨មក នៅពេលដែលលោក Lyndon Johnson ដែលរងការរិះគន់ចំពោះការចាត់ចែងសង្រ្គាមវៀតណាមបានដកខ្លួនចេញពីយុទ្ធនាការភ្លាមៗនៅថ្ងៃទី៣១ ខែមីនា។
លោក Biden ក៏ចូលរួមជាមួយលោក James K. Polk លោកJames Buchanan លោកRutherford B. Hayes លោកCalvin Coolidge និង លោកHarry Truman ដែលជាប្រធានាធិបតី ដែលបានសម្រេចចិត្តមិនឈរឈ្មោះសម្រាប់អាណត្តិទីពីរ។
លោក Biden បានប្រឈមមុខនឹងការអំពាវនាវឱ្យចាកចេញបន្ទាប់ពីការជជែកដេញដោលមិនបានល្អនឹងលោក Trump ហើយបាននាំឲ្យមានសំណួរដ៏គួរឱ្យព្រួយបារម្ភអំពីបញ្ហាស្មារតីរបស់លោក។
ទោះបីជាយ៉ាងណាក៏ដោយ ចាប់តាំងពីលោកបានប្រកាសឈប់ឈរឈ្មោះមក គណបក្សប្រជាធិបតេយ្យបានប្រមូលផ្តុំគ្នាជុំវិញលោក ដោយគោរពចំពោះចរិតលក្ខណៈ និងស្នាដៃការងាររបស់លោកជាប្រធានាធិបតី។
បុគ្គលិកមួយហ្វូងបានដើរចូលទៅក្នុងសេតវិមាននៅល្ងាចនោះ ដើម្បីមើលសុន្ទរកថាជាមួយគ្នា។ មន្ត្រីម្នាក់បាននិយាយថា ពិធីជប់លៀងទទួលភ្ញៀវ និងទស្សនាត្រូវបានប្រារព្ធធ្វើនៅទូទាំងសេតវិមាន។
លោក Biden បាននិយាយថា លោកនឹងផ្តោតលើការងាររបស់លោកជាប្រធានាធិបតីក្នុងរយៈពេលប្រាំមួយខែដែលនៅសេសសល់។ លោកនឹងជួបជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu នៅថ្ងៃព្រហស្បតិ៍អំពីកិច្ចខិតខំប្រឹងប្រែងដើម្បីចរចាបទឈប់បាញ់នៅតំបន់ហ្កាហ្សា។
នេះជាលើកទីបួនហើយដែលលោក Biden បានប្រើប្រាស់ការរៀបចំជាផ្លូវការនៃការិយាល័យសេតវិមាន ចាប់តាំងពីចូលកាន់តំណែងក្នុងឆ្នាំ២០២១។ សុន្ទរកថានាពេលថ្មីៗនេះរបស់លោកនៅការិយាល័យសេតវិមានធ្វើឡើងកាលពីថ្ងៃទី១៥ ខែកក្កដា នៅពេលដែលលោកបានជំរុញឱ្យពលរដ្ឋអាមេរិកាំងបន្ថយវោហាសាស្ត្រនយោបាយបន្ទាប់ពីការប៉ុនប៉ងធ្វើឃាតលោក Trump ។
អាជីពនយោបាយរបស់លោក Biden បានចាប់ផ្តើមនៅពេលដែលលោកបានជាប់ឆ្នោតជាសមាជិកព្រឹទ្ធសភាក្នុងឆ្នាំ១៩៧២ នៅអាយុ២៩ ឆ្នាំ ហើយបានក្លាយជាសមាជិកព្រឹទ្ធសភាវ័យក្មេងបំផុតទី៦ របស់សហរដ្ឋអាមេរិក។ លោកនឹងបញ្ចប់អាណត្តិសេតវិមានរបស់លោកនៅថ្ងៃទី២០ ខែមករា ឆ្នាំ២០២៥ ក្នុងនាមជាប្រធានាធិបតីអាមេរិកដែលមានវ័យចំណាស់ជាងគេ ដែលនៅពេលនោះលោកនឹងមានអាយុ ៨២ ឆ្នាំ។
លោក Biden បានថ្លែងថា៖ «ការការពារលទ្ធិប្រជាធិបតេយ្យគឺសំខាន់ជាងតួនាទីណាទាំងអស់។ ខ្ញុំស្រូបបានកម្លាំង និងស្វែងរកភាពរីករាយក្នុងការធ្វើការបម្រើពលរដ្ឋអាមេរិកាំង។ ប៉ុន្តែកិច្ចការដ៏ពិសិដ្ឋនៃការធ្វើឲ្យសហព័ន្ធរបស់យើងមានភាពល្អឥតខ្ចោះនេះ គឺមិនមែនដើម្បីខ្ញុំទេ។ វាគឺដើម្បីអ្នកទាំងអស់គ្នា។ គ្រួសាររបស់អ្នកទាំងអស់គ្នា។ អនាគតរបស់អ្នក។ វាស្របតាមពាក្យថា៖«យើងជាប្រជាពលរដ្ឋ» ។
វេទិកាបញ្ចេញមតិ