ការធ្លាក់ឧទ្ធម្ភាគចក្រមួយគ្រឿងនៅថ្ងៃពុធនេះនៅខាងក្រៅរដ្ឋធានីនៃប្រទេសអ៊ុយ ក្រែនបានសម្លាប់មនុស្សយ៉ាងតិចណាស់ក៏ ១៨នាក់ដែរ រួមទាំងលោក Denys Monastyrsky ដែលជារដ្ឋមន្ត្រីក្រសួងមហាផ្ទៃនិងពួកមន្ត្រីជាន់ខ្ពស់របស់ក្រសួងនោះផងដែរ។
លោក Ihor Klymenko ប្រធានប៉ូលិសជាតិអ៊ុយក្រែនក៏បាននិយាយដែរថា កូនក្មេង៣នាក់បានស្ថិតនៅក្នុងចំណោមអ្នកស្លាប់ដោយសារការធ្លាក់ឧទ្ធម្ភាគចក្រដែលបានកើតមានឡើងនៅក្នុងតំបន់ Brovary នៅជាយក្រុងភាគខាងកើតរដ្ឋធានីកៀវ។
ពួកមន្ត្រីបាននិយាយថា ឧទ្ធម្ភាគចក្រសេវាកម្មគ្រាអាសន្ននេះបានធ្លាក់នៅជិតមត្តេយ្យសាលា។
គេមិនទាន់ដឹងច្បាស់នៅឡើយថាតើមូលហេតុអ្វីដែលបណ្តាលឱ្យឧទ្ធម្ភាគចក្រនេះធ្លាក់នោះទេ។
ប្រធានក្រុមប្រឹក្សាអឺរ៉ុប លោក Charles Michel បានចូលរួមរំលែកទុក្ខដល់ប្រជាពលរដ្ឋអ៊ុយក្រែនដោយបានហៅលោក Monastyrsky ថាជា«មិត្តភក្តិដ៏អស្ចារ្សម្នាក់របស់សហភាពអឺរ៉ុប»។
លោក Michel បានបញ្ជូនសារតាម Twitter ថា«យើងសូមចូលរួមកាន់ទុកដ៏ក្រៀមក្រំជាមួយប្រជាពលរដ្ឋអ៊ុយក្រែនចំពោះគ្រោះថ្នាក់នៃការធ្លាក់ឧទ្ធម្ភាគចក្រនៅក្នុងតំបន់ Brovary នេះ»។
សហរដ្ឋអាមេរិកនិងសម្ព័ន្ធមិត្តផ្សេងទៀតរបស់អ៊ុយក្រែននឹងផ្តល់អាវុធទំនើបៗបន្ថែមទៀតឲ្យអ៊ុយក្រែននិងការបណ្តុះបណ្តាលឱ្យចេះប្រើអាវុធទាំងនោះ។ ជំនួយបន្ថែមទៀតទំនងនឹងត្រូវប្រកាសនៅថ្ងៃសុក្រខាងមុខនេះនៅពេលពួកគេធ្វើការកោះប្រជុំជំនួបថ្មីនេះនៃក្រុមប្រទេសទាក់ទិននឹងការការពារអ៊ុយក្រែនដែលដឹកនាំដោយសហរដ្ឋអាមេរិកនៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin នឹងដឹកនាំការចរចានេះដែលនឹងត្រូវចូលរួមដោយរដ្ឋមន្ត្រីការពារជាតិមួយចំនួនទៀត អគ្គលេខាធិការអង្គការអូតង់លោក Jens Stoltenberg និងរដ្ឋមន្ត្រីការពារជាតិអ៊ុយក្រែនលោក Oleksii Reznikov។
នៅថ្ងៃព្រហស្បតិ៍ស្អែកនេះ លោក Austin នឹងឈប់សំចតនៅក្នុងរដ្ឋធានីប៊ែឡាំងដើម្បីជួបជាមួយរដ្ឋមន្ត្រីការពារជាតិថ្មីរបស់អាល្លឺម៉ង់គឺលោក Boris Pistorius នៅពេលដែលអាល្លឺម៉ង់ពិចារណាផ្តល់រថក្រោះចម្បាំងប្រភេទ Leopard 2 របស់ខ្លួនទៅឱ្យកងទ័ពអ៊ុយក្រែន។
ប្រធានាធិបតីនៃប្រទេសអ៊ុយក្រែនលោក Volodymyr Zelensky បាននិយាយថាលោកបានពិភាក្សាកិច្ចសហប្រតិបត្តិការវិស័យការពារប្រទេសជាមួយប្រធានាធិបតីអាល្លឺម៉ង់លោក Frank-Walter Steinmeier មុនជំនួបនៅ Ramstein។ លោក Zelensky មិនបាននិយាយពីរថក្រោះរបស់អាល្លឺម៉ង់នៅក្នុងសុន្ទរកថានៅពេលយប់ថ្ងៃអង្គារនោះទេ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFP និង Reuters។
