ការតវ៉ាប្រឆាំងកាន់តែច្រើន ត្រូវបានគេគ្រោងធ្វើឡើងបន្ទាប់ពីលោកដូណាល់ ត្រាំ បានជាប់ឆ្នោតជាប្រធានាធិបតី ដោយមានក្រុមជាច្រើនកំពុងរៀបចំការតវ៉ាប្រឆាំងនៅថ្ងៃសម្ភោពចូលកាន់ដំណែងប្រធានាធិបតីនៅក្នុងខែមករា។
បាតុកម្មតូចៗក៏កំពុងធ្វើឡើងដែរ។ សិស្សនៅឯវិទ្យាល័យ Woodrow Wilson ក្នុងរដ្ឋធានីវ៉ាស៊ីនតោន មានគម្រោងដើរចេញពីថ្នាក់រៀននៅថ្ងៃអង្គារ ក្រោយមក ពួកគេមានគម្រោងដើរទៅកាន់សណ្ឋាគារត្រាំអន្តរជាតិ។ ទើបតែមួយថ្ងៃមុននេះ សិស្សនៅវិទ្យាល័យក្នុងរដ្ឋម៉ារីឡេនក្បែររដ្ឋធានីវ៉ាស៊ីនតោន ក៏បានដើរចេញពីថ្នាក់រៀនដែរ។
ការតវ៉ាប្រឆាំងបានបន្តធ្វើកាលពីចុងសប្តាហ៍នៅទូទាំងសហរដ្ឋអាមេរិក ក៏ប៉ុន្តែកាលពីយប់ថ្ងៃអាទិត្យ បាតុកម្មមានទ្រង់ទ្រាយតូចជាងបាតុកម្មបន្ទាប់ជ័យជម្នះភ្លាមៗរបស់លោកត្រាំពីខាងគណបក្សសាធារណរដ្ឋ។
បាតុករជាច្រើនបានកាន់បដាដែលមានន័យថា «លោកត្រាំមិនមែនជាប្រធានាធិបតីរបស់ខ្ញុំទេ យើងនឹងតវ៉ាប្រឆាំងផែនការរបស់លោកត្រាំក្នុងការនិរទេសជនអន្តោប្រវេសន៍គ្មានក្រដាសស្នាមត្រឹមត្រូវ ការគ្មានជំនឿរបស់លោកត្រាំក្នុងបញ្ហាផ្លាស់ប្តូរអាកាសធាតុ ការអត្ថាធិប្បាយរបស់លោកអំពីអ្នកកាន់សាសនាឥស្លាម ហើយនិងការប្តេជ្ញាដើម្បីតែងតាំងចៅក្រមដែលជំទាស់ប្រឆាំងនឹងការពន្លូតទារក»។
បាតុកម្មកើតមានឡើងចាប់តាំងពីមានមនុស្សរាប់រយនាក់រហូតដល់រាប់ពាន់នាក់នៅក្នុងទីក្រុងសំខាន់ៗដូចជាទីក្រុងញូវយ៉ក ទីក្រុង Portland ទីក្រុង Philadelphia និងទីក្រុង San Francisco អស់រយៈពេលជាងមួយសប្តាហ៍ហើយ៕
