ប្រទេសចិននិងរុស្ស៊ី បានយល់ព្រមជាមួយគ្នាក្នុងការពង្រីកកិច្ចសហប្រតិបត្តិ ការផ្នែកហិរញ្ញវត្ថុដោយប្រើប្រាស់ប្រព័ន្ធធនាគារដែលបានគ្រោងទុក។ ក្រុមអ្នកវិភាគនិយាយថា ប្រព័ន្ធនេះធ្វើឡើងក្នុងគោលបំណងគាំទ្រដល់យោធារបស់ពួកគេ និងដើម្បីធ្វើឲ្យខូចដល់សណ្ដាប់ធ្នាប់សាលដឹកនាំដោយសហរដ្ឋអាមេរិក។
ប្រទេសទាំងពីរនេះបានចេញសេចក្ដីប្រកាសរួម ដោយយល់ព្រមពង្រឹង និងបង្កើតហេដ្ឋារចនាសម្ព័ន្ធសម្រាប់ទូទាត់និងដោះស្រាយបញ្ហាហិរញ្ញវត្ថុ ដែលរួមមាន ការបើកគណនីដែលដំណើរការជាមួយគ្នា និងបង្កើតសាខាធនាគារនិងធនាគាររងផ្សេងៗទៀតនៅក្នុងប្រទេសទាំងពីរដើម្បីសម្រួលដល់ការទូទាត់ប្រាក់ដ៏រលូននៅក្នុងជំនួញរបស់ពួកគេ។
សេចក្ដីថ្លែងការណ៍រួមត្រូវបានប្រកាសក្នុងពេលនាយករដ្ឋមន្ត្រីចិនលោកLi Qiang និងនាយករដ្ឋមន្ត្រីរុស្ស៊ី Mikhail Mishustin បានជួបគ្នាកាលពីសីហា។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Tass។
តាមកំណត់ត្រារបស់រដ្ឋាភិបាលរុស្ស៊ី លោក Mishustin បានថ្លែងនៅក្នុងកិច្ចប្រជុំនាពេលនោះថា៖ «ប្រទេសលោកខាងលិចកំពុងដាក់ទណ្ឌកម្ម(លើរុស្ស៊ី) ដោយខុសច្បាប់ ក្រោមលេសដែលខុសពីការពិតឬនិយាយឲ្យងាយស្ដាប់ទៅគឺដោយហេតុផលការប្រកួតប្រជែងមិនយុត្តិធម៌»។
លោក Li និងលោក Mishustin បានចុះហត្ថលេខាលើកិច្ចព្រមព្រៀងជាង ១០ កាលពីពេលនោះ ដែលផ្ដោតលើកិច្ចសហប្រតិបត្តិការលើវិស័យសេដ្ឋកិច្ច វិនិយោគ និងការដឹកជញ្ជូន។ លោក Li បានបំពេញទស្សនកិច្ចទីក្រុងមូស្គូ តាមការអញ្ជើញរបស់លោក Mishustin។
លោក David Asher អ្នកស្រាវជ្រាវជាន់ខ្ពស់នៅវិទ្យាស្ថាន Hudson ថ្លែងថា៖ «ជំនួបរវាងរុស្ស៊ីនិងភាគីចិននាពេលនោះ មានសារៈសំខាន់ខ្លាំងណាស់ ពីព្រោះកិច្ចសហប្រតិបត្តិការនេះកំពុងពង្រីកកាន់តែខ្លាំង ដែលអាចនឹងមាននៅលើទិដ្ឋភាពយោធាកាន់តែធំ ដែលគំរាមកំហែងដល់សន្តិសុខជាតិសហរដ្ឋអាមេរិក។
លោក Asher បន្តថា កិច្ចសហប្រតិបត្តិការទ្វេភាគីរបស់ភាគីទាំងពីរអាចនាំទៅដល់ការផ្ដល់ជំនួយរបស់រុស្ស៊ីទៅឱ្យចិនសម្រាប់កិច្ចការនៅតំបន់អាស៊ីប៉ាស៊ីហ្វិកនិងសមុទ្រចិនខាងត្បូង ជាថ្នូរនឹងការគាំទ្ររបស់រដ្ឋាភិបាលក្រុងប៉េកាំងទៅលើសេដ្ឋកិច្ចរបស់រដ្ឋាភិបាលក្រុងមូស្គូនិងវិស័យឧស្សាហកម្មដែលជំរុញដល់កិច្ចប្រឹងប្រែងធ្វើសង្គ្រាមរបស់រុស្ស៊ីនៅអ៊ុយក្រែន»។
លោក Edward Fishman ជាសាស្ត្រាចារ្យនៅមហាវិទ្យាល័យកិច្ចការអន្តរជាតិនិងសាធារណៈនៅសកលវិទ្យាល័យ Columbia បានថ្លែងថា៖ «ក្រុមហ៊ុននានារបស់ចិនបានកេងយកប្រយោជន៍ពីជំហរតថ្លៃខ្សោយរបស់រុស្ស៊ី និងបានកាត់បន្ថយកិច្ចព្រម ព្រៀងដែលជាអំណោយផលជាច្រើន។ ក៏ប៉ុន្តែ កិច្ចព្រមព្រៀងទាំងនោះ មានសារៈសំខាន់លើសពីកម្រិតពាណិជ្ជកម្ម។ កិច្ចព្រមព្រៀងទាំងនោះធ្វើឱ្យម៉ាស៊ីនសង្គ្រាមរបស់លោក Putin បន្តមានប្រតិបត្តិការ»។
ក្រសួងហិរញ្ញវត្ថុសហរដ្ឋអាមេរិក កាលពីពេលថ្មីៗនេះបានដាក់ទណ្ឌកម្មទៅលើអង្គភាពនិងបុគ្គលជាង ៤០០ ដែលបានគាំទ្រដល់កិច្ចប្រឹងប្រែងធ្វើសង្គ្រាមរបស់រុស្ស៊ីនៅប្រទេសអ៊ុយក្រែន រួមមានទាំងក្រុមហ៊ុនចិនដែលក្រសួងនេះបានអះអាងថា បានជួយដល់ទីក្រុងមូស្គូ ឲ្យគេចផុតពីទណ្ឌកម្មរបស់ប្រទេសលោកខាងលិចតាមរយៈការផ្គត់ផ្គង់ឧបករណ៍គ្រឿងម៉ាស៊ីន និង គ្រឿងអេឡិចត្រូនិកតូចៗ (microelectronics)។
ជាការឆ្លើយតបទៅនឹងផែនការរបស់ចិននិងរុស្ស៊ីក្នុងការបង្កើតប្រព័ន្ធហិរញ្ញវត្ថុដើម្បីជំរុញដល់សេដ្ឋកិច្ចរបស់ពួកគេ លោក Wally Adeyemo អនុរដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកបានប្រាប់កាសែត Financial Times ថា រដ្ឋាភិបាលក្រុងវ៉ាស៊ីនតោននឹងតាមដានរាល់សាខាដែលពួកគេនឹងបង្កើតឡើង និងប្រទេសនានាដែលអនុញ្ញាតឱ្យពួកគេបើកប្រតិបត្តិការ។
ក្រុមអ្នកវិភាគនិយាយថា ចិននិងរុស្ស៊ីអាចងាកទៅរកវិធីទូទាត់ផ្សេងទៀត ដើម្បីគេចចេញពីទណ្ឌកម្មទាំងនោះ។
លោក Tom Keatinge នាយកមជ្ឈមណ្ឌលសិក្សាបទល្មើសហិរញ្ញវត្ថុនិងសន្តិសុខនៅវិទ្យាស្ថាន Royal United Service ក្នុងទីក្រុងឡុងដ៍បានថ្លែងថា៖ «យើងឃើញគោលបំណងយ៉ាងពិតប្រាកដរបស់រដ្ឋាភិបាលក្រុងមូស្គូនិងរដ្ឋាភិបាលក្រុងប៉េកាំង ក្នុងការបង្កើតទំនាក់ទំនងផ្នែកហិរញ្ញវត្ថុ និងពាណិជ្ជកម្ម ដែលអាចប្រតិបត្តិការហួសពីការដាក់ទណ្ឌកម្មនានាដែលដឹកនាំដោយសហរដ្ឋអាមេរិក»។
លោកបន្តថា៖ «កិច្ចសហប្រតិបត្តិការនេះរួមមានការបង្កើតយន្តការទូទាត់ប្រាក់ដែលមិនមែនជាប្រាក់ដុល្លារ និងប្រព័ន្ធទូទាត់ប្រាក់ដែលមានប្រព័ន្ធការពារខ្ពស់ដែលអនុញ្ញាតឲ្យប្រទេសផ្សេងទៀតនៅក្នុងបណ្ដាញរបស់ពួកគេអាចគេចផុតពីទណ្ឌកម្មរបស់សហរដ្ឋអាមេរិក»។
លោក Keatinge បន្តថា វិធីសាស្ត្រផ្សេងទៀតនៃការទូទាត់អាចពាក់ព័ន្ធនឹងរូបិយវត្ថុឌីជីថលនៅធនាគារកណ្ដាល និងហិរញ្ញវត្ថុ crypto និងប្រាក់កាក់ដែលមានស្ថិរភាពផ្សេងទៀត៕
ប្រែសម្រួលដោយលោក នៀម ឆេង
