នាយករដ្ឋមន្ត្រីជប៉ុនលោក Shinzo Abe បានមានប្រសាសន៍នៅថ្ងៃច័ន្ទនេះថា ជ័យជម្នះភ្លូកទឹកភ្លូកដីនៅក្នុងការបោះឆ្នោតក្នុងប្រទេសជប៉ុន នឹងមិនធានានោះទេ ថាសំណើដ៏ចម្រូងចម្រាសរបស់លោកនឹងត្រូវបានគេអនុម័ត ដើម្បីកែប្រែរដ្ឋធម្មនុញ្ញបែបសន្តិភាពនិយមរបស់ប្រទេសនេះឬយ៉ាងណា។
លោក Abe បានមានប្រសាសន៍នៅក្នុងសន្និសីទកាសែតមួយនៅថ្ងៃច័ន្ទនេះថា «ការកែប្រែរដ្ឋធម្មនុញ្ញគឺជាកាតព្វកិច្ចរបស់ខ្ញុំក្នុងនាមជាប្រធានគណបក្សប្រជាធិបតេយ្យសេរី LDP។ នេះមិនមែនជាការងាយស្រួលនោះទេ ដោយសារតែការកែប្រែនេះតម្រូវឲ្យមានសម្លេងភាគច្រើន ដែលស្មើរនឹង ២ភាគ៣ នៅក្នុងសភាទាំង២ថ្នាក់ ប៉ុន្តែខ្ញុំសង្ឃឹមថាការពិភាក្សាដេញដោលគ្នានឹងជួយដល់ដំណើរការនេះ។»
គណបក្សចម្រុះដែលកាន់អំណាចឈ្នះបានអាសនៈចំនួន៧០ក្នុងចំណោមអាសនៈ១២១ នៅក្នុងការបោះឆ្នោតក្នុងឆ្នាំនេះ បើទោះបីជាសេដ្ឋកិច្ចមានភាពទន់ខ្សោយនិងមានការប្រឆាំងយ៉ាងខ្លាំងទៅលើជំហររបស់លោក Abe ក្នុងការកែប្រែរដ្ឋធម្មនុញ្ញ ដើម្បីពង្រីកអំណាចនិងទំហំយោធាក៏ដោយ។
មានតែអាសនៈពាក់កណ្តាលអាសនៈសរុបចំនួន២៤២នៃសភាជាន់ខ្ពស់ដែលគេហៅថា National Diet ប៉ុណ្ណោះ ដែលត្រូវបោះឆ្នោតជ្រើសរើសជារៀងរាល់៣ឆ្នាំម្តង។ សមាជិកគណបក្សប្រជាធិបតេយ្យសេរីរបស់លោក Abe ទទួលបាន ៥៦អាសនៈ ហើយគណបក្ស Komeito ដែលជាសម្ព័ន្ធមិត្តរបស់លោកទទួលបាន១៤អាសនៈ។
គណបក្សចម្រុះដែលកាន់អំណាចនេះគ្រប់គ្រងសភាជាន់ទាបដែលមានអំណាចជាងនេះ ប៉ុន្តែជ័យជម្នះនៅក្នុងការបោះឆ្នោតសភាជាន់ខ្ពស់កាលពីថ្ងៃអាទិត្យគឺចាំបាច់ ដើម្បីទទួលបានសម្លេងភាគច្រើន ២ភាគ៣ នៅក្នុងសភាទាំង២ថ្នាក់ ជាមួយនឹងការបោះឆ្នោតប្រជាមតិនៅទូទាំងប្រទេសដើម្បីកែប្រែរដ្ឋធម្មនុញ្ញ។
លោកនាយករដ្ឋមន្ត្រីបាននិយាយថា នៅទីបំផុតប្រជាជនជប៉ុននឹងសម្រេចអំពីការកែប្រែរដ្ឋធម្មនុញ្ញក្នុងដំណាក់កាលបោះឆ្នោតប្រជាមតិថ្នាក់ជាតិ៕
