A bayan da aka shafe wata da watanni ana gangami da tarurruka da lacvcoci da hawa kan durum, yau litinin za a kaddamar da kakar zabubbuka da tarurrukan tsayar da ‘yan takara a babban zabe na Amurka, inda masu jefa kuri’a na Jihar Iowa zasu gudanar da tarurruka a unguwanni domin zaben wadanda suke son su tsaya musu takarar shugaban kasa.
.
A bangaren ‘yan Republican, attajiri Donald Trump ya bayar da rata marar yawa ma sanata Ted Cruz daga Jihar Texas, wanda alamu suka nuna cewa yayi tuntube a lokuta da dama kafin wannan zabe na yau.
A bangaren ‘yan Democrat kuwa, zaben kusan ya zamo na kan mai uwa da wabi a tsakanin tsohuwar sakatariyar harkokin waje Hillary Clinton, da sanata dan Indipenda daga Jihar Vermont, Bernie Sanders, wanda ya ayyana kansa a zaman dan Democrat mai ra’ayin gurguzu.
Masu kwadayin tsayawa takarar sun karade jihar ta Iowa jiya lahadi, suka gudanar da tarurruka a kowane lungu na jihar, tare da caccakar lamirin abokan adawarsu.
