Tsohon shugaban Nijer Tandja Mamadou, ya aika da takardar neman gafara ga gwamnatin mulkin sojin da ta hambaras da shi. Tandja Mamadou, mai shekaru 72 da haihuwa a wasikar da ya tura yana cewa bashi da koshin lafiya, kuma ba zai iya fuskantar kotun soja ba, yace ya gwammace ayi masa tsarewar talala a gidansa maimakon fuskantar kotun soja.
A watan Fabarairu ne soja suka hambaras da Gwamnatin Tandja Mamadou, sannan soja suka kafa hukumar yaki da cin hanci da rashawa wadda zata binciki duk zargin da ake yiwa jami’an Gwamnatin Tandja na yin sama da fadi da dukiyar jama’a.
