Shugaban 'yansandan ya fadawa wakilin Muryar Amurka cewa cikin wata daya da ya wuce Allah ya basu nasarori da yawa.
Yace sun kama motoci fiye da arba'in wadan da 'yan fashi da makamai suka kwace. Cikin motocin har da bindigogi da wayoyin wuta irin na hukumar lantarki da ma wasu abubuwan da ake hada wuta dasu. Wasu mutane ne suka nado wayoyin daga wani kauye da ake kira Ileido. Da aka tsare wadanda suke dauke da kayan ba su iya bada bayani na zahiri ba. Sabili da haka ana binciken lamarin.
Akan bincike kuma aka kama wasu da awaki 18. A cikin garin Ibadan kuma wasu sun balle wani shago da daddare suka kwashe wayoyin salula sabbi 69. Su ma an kama su.
Nasarar da 'yansandan suka samu tana da nasaba da hadin kan jama'a da rundunar ta samu.
Ga rahoton Hassan Umaru Tambuwal.
