WASHINGTON, DC —
Daya daga cikin abubuwan da suka fi janyo hankalin wadanda suka kalli muhawar shine dari-darin da Donald Trump ya nuna lokacin da aka tambaye shi ko zaiyi na’am da duk sakamakon da ya fito a karshen zaben nasu, inda Trump yace “zan duba sakamakon a lokacinda ya fito, yanzu bana ganin wannan sakamakon, zan dube shi in ya fito sannan in yanke hukunci.”
A tata amsar, Hillary Clinton tace kasawar Mr. Trump na amsa wannan tambayar game da sakamakon zaben, tana nuna cewa bai cancanta ya zama shugaban kasar Amurka ba, Hillary tace “Ba haka akidar siyasarmu ke tafiya ba, munfi shekaru 240 muna siyasa, muna gudanar da zaben adalci, kuma mukan karbi sakamakon zabe koda bai zo yadda muke so ba.”
