Wani hoton bidiyon da ya nuna shugaban Venezuela Nicolas Maduro yana ragargazar gasasshen nama a wani gidan saida abince mai tsadar gaske ya janyo cece-kuce a fadin duniya a madadin al’ummar kasarsa da talauci ya yiwa katutu.
Wani hoton bidiyon ya nuna wani gwanin dafa abinci Nusret Gokce, wanda kuma ake kira Salt Bae,” yana yankawa shugaban da matarsa Cilia Flores tsokokin nama, a gidan cin abinci Nusret a Istanbul, inda duk wata katafariyar tsokar nama ake saida ta akan kudi masu yawa.
Sanatan jihar Florida ta nan Amurka, Marco Rubio ya caccaki mai dafa abincin wanda aka dauki hoton bidiyonsa da shugaban mai mulkin kama karyar na Venezuela,” inda aka nuna shi yana cin abinci mai tsadar gaske, yana kuma busa sigari mai tsada yayinda yunwa ke neman hallaka mutanen Venezuela.”
Rubio ya fadawa jaridar Miami Herald jiya Talata cewa “abin tur ne, wannan mutumin da sanadiyarsa mutane ke fama da yunwa amma ga shi Salt Bae na nuna shi kamar wani jarumi, abin ya bata mani rai.”
Facebook Forum