An Fara Aikin Sake Kirga Kuri’u "Da Hannu" a Jihar Georgia a Zaben Amurka

Doka ta tanadi cewa a sake kidaya kuri’un da hannu domin tabbatar da cewa na’ura ba ta yi kuskure ba, ba wai don ana zargin an samu tangarda da sakamakon zaben ba.

Sakataren Jihar ta Georgia, Brad Raffensperger ya zabi a sake kidaya kuri’un na zaben shugaban kasa ne saboda yadda aka kusan yin kankankan a sakamakon zaben jihar kamar yadda kamfanin dillancin labarai na AP ya ruwaito.

Joe Biden na jam’iyyar Democrat na gaban shugaban kasa Donald Trump na jam’iyyar Republican da kuri’a 14,000.

Hakan ya sa ake ganin ya zama dole a sake kirga kuri’un amma da hannu.

Ana sa ran da misalin karfe 11:59 na daren ranar Laraba za a kammala aikin sake kirga kuri’un a cewar AP.