Har yanzu shugaban kasar Rasha Vladimir Putin bai ce uffan ba kan harin, kuma Moscow ba ta yi magana kan ikirarin kungiyar IS ba, kamar yadda wasu ‘yan majalisar dokokin kasar suka nuna yiwuwar alaka da Ukraine.
Wasu ‘yan bindiga dauke da makamai sun bude wuta a dakin taro na Crocus City Hall da ke yankin Krasnogorsk na arewacin birnin Moscow a yammacin ranar Juma’a, gabanin wani wasan wake-wake da kungiyar zamanin Soviet ta Piknik za ta yi, a wani mummunan harin da ba'a ga irinsa ba akalla shekaru goma a Rasha.
Hukumar tsaro ta FSB ta Rasha ta ce, wasu daga cikin wadanda suka aikata laifin sun tsere zuwa kan iyakar Rasha da Ukraine, inda ta kara da cewa maharan suna da alaka da wasu a kasar.
Bata bayar da karin bayani ba.
Wasu ‘yan majalisar dokokin Rasha ma sun nuna yatsa ga Ukraine, ba tare da bayar da wata shaida ba.
“Babbar wadda za ta kasance da hannu na iya zama Ukraine da abokanta...ba za mu iya kawar da tunanin hakan ba,” in ji babban dan majalisar dokokin Rasha Andrey Kartapolov.
Dandalin Mu Tattauna