Sekulokuthandabuza phezu kohlelo lokusebenzisa izithupha phakathi kwezizalwane zeZimbabwe lezakwele Botswana uma zingena emazweni womabili.
Sekuthule kunxa zombili ngemva kokuba omongameli bamazwe womabili bebike ngoNhlolanja ukuthi sebevumelene ukuthi kusetshenziswe izithupha, endaweni yamaphasiphoti.
Akulalutho oseluke lwakhulunywa phezu kwaloludaba lokhe uMongameli Emmerson Mnangagwa lomunye loMongameli Mokgweetsi Masisi babika ngoNhlolanja ukuthi sekulolongwa isivumelwano sokuthi kungenwe ngezithupha eZimbabwe lakwele Botswana.
Umphathintambo obona ngobudlelwano beBotswana lamanye amazwe, uMnu. Lemogang Kwape kazange afune ukukhuluma phezu kwemibiko ethi udaba lwezithupha selufike emaphethelweni lungazange lusungulwe.
Kodwa esinye isiphathamandla kuhulumende we Zimbabwe sitshele iStudio7 ukuthi akuzange kube lomhlangano ngitsho lowodwa phezu kwaloludaba.
Inhlanganiso ezitshiyeneyo zibikwa zidinga ingcazelo kubohulumende bamazwe womabili phezu kwalolu daba.
Umngcinisihlalo weZimbabwe Community kwele Botswana, uMnunzana Cephas Tshuma, uthi bacabangela ukuthi ukhetho oluzayo kweleBotswana yilo oseludale ukuthi loludaba lufakwe eceleni.
“Ayisikho ukuthi ukungena ngezithupha kuzanceda iZimbabwe kuphela. Kuzadala ukuthi abantu bengene lapha bezowoda, kodwa sicabanga ukuthi kungavuselelwa ngale kokhetho oluzayo.”
UMnunzana Mkhululi Moyo oweZimbabwe ohlala eGaborone laye ucabangela ukuthi ukhetho yilo olumise konke ngoba inkokheli kaMasisi isesaba ukuthi ingalahlekelwa ngamavoti uma ingaqhubeka ngohlelo olungafunwa nguzulu.
“Sinanzelele ukuthi eleBotswana liyakukhetho ngoMfumfu njalo bona abeBotswana abakuthakazeleli lokhu. So kungaba nzima kwababusayo ukuthi balufuqe udaba lolu bekhangele ukhetho, okungenza ukuthi belahlekelwe lukhetho.”
Esinye njalo isizalwane seZimbabwe, uMnunzana Ntokozo Thebe, uthi kuyadanisa ukuthi sekuthule ngodaba lokusetshenziswa kwezithupha.
“Kukhanya abantu beBotswana babona engazani bayabe sebencede abantu abadubekayo eZimbabwe yikho bengahambelani lakho. Kodwa akumelanga kube njalo ngoba kusasa kungaba yibo abeBotswana.”
Abanye kwele Botswana bathi ukuvumela abeZimbabwe ukungena ngezithupha kungadala ukuthi bagcwale kuleli.
Kodwa uMasisi ezama ukuthengisa umbono wokuthi kusentshenziswe izithupha, wathi lokhu kuzayehlisa inani labantu abangena bevela eZimbabwe okungekho emthethweni.
“Singaqala ukusebenzisa izithupha sizavula amehlo. Abachapha bengelamaphasiphoti abeZimbabwe banengi kakhulu, njalo kumele sikhumbule ukuthi iphasiphoti iyadula kakhulu eZimbabwe.”
Noma nje ngakucele leZimbabwe kwamukelwa ngentokozo ukuthi kuzasetshenziswa izithupha, abeBotswana bachila amakhala.
Loludaba lwaze lwayafika edale lephalamende yeBotswana lapho ngitsho lamalunga ebandla elibusayo eleBotswana Democratic Party afunga agomela esithi akumelanga kuvunyelwe abeZimbabwe ukuthi bangene besebenzisa izithupha.
Kukanti akuzange kube lokuxokozela ngesikhathi eleBotswana livumelana leNamibia phezu kohlelo olufanayo olukusebenzisa izithupha ngoNhlolanja nyakenye.
Forum