UMongameli Emmerson Mnangagwa uthi sevumelene losowabo weleBotswana uMokgweetsi Masisi ukuthi amazwe womabili esule isidingo sama-passports ukuze izizalwane zawo zingene emazweni la zingelazo lezincwadi.
UMnangagwa wazise lokhu ekweleBotswana ngoLwesine emhlanganweni weKusi Ideas Festival oqhutshelwe eGaborone ongenwe layiziphathamandla zamanye amazwe atshiyeneyo.
Inyathelo leli liza ngesikhathi inengi likhala ngokukhwela kwembadalo yokuthatha ama-passport eZimbabwe.
UMnangagwa uthe imingcele ehlukanisa amazwe aseAfrica yimigoqo nje engadingakaliyo eyafakwa ngabelungu evimba abantu ukuya lapho abafuna khona bekhululekile.
Wengeze wathi iziphathamandla ezibona ngokungena lokuphuma kwabantu emazweni womabili baphakathi kokukhulumisana ukuze baphume lesikhathi lapho isivumelwano lesi esizaqala ukusebenza khona.
Umphathintambo obona ngobudlelwano bakweleBotswana lamanye amazwe uMnu Lemogang Kwape uwafakazile amazwi kamnangagwa.
Isiphathamandla senhlanganiso yabantu abazisebenzayo eyeBulawayo Vendors and Traders Association uNkosikazi Debra Mukasa utshele iStudio 7 ukuthi ukwesulwa kwama-passports phakathi kweBotswana leZimbabwe lokhu kuzabaphathisa kumabhizimusi abo.
Forum