Ohulumende beZimbabwe lowe Melika baqhubeka bephoselana aqatha phezu kwezijeziso zenotho ezetheswe uMongameli Emmerson Mnangagwa labemuli yakhe labangane. Uhulumende weZimbabwe uthi lezi zijeziso azikho emthethweni kodwa oweMelika laye eqinisa elokuthi ziqondile.
Embikweni awethule izolo, uhulumende weZimbabwe uveze ukungajabuli kwakhe ngenyathelo elithethwe nguMongameli Joe Biden wele Melika lokuqinisa izijeziso kuMongameli Mnangagwa lomsekeli wakhe umnumzana Constantine Chiwenga labanye babo abakuZanu PF lamankampani adlelana labo. Uhulumende we Zimbabwe uthi kumele iMelika iveze ubufakazi bokwephulwa kwelungelo loluntu nguMnangagwa kanye lemisebenzi yenkohlakalo aphatheke kiyo.
Umphathintambo obona ngokukhitshwa kwemibiko uMnu. Jenfan Muswere uthi eleZimbabwe alingeke lafakelwa imithetho ngeleMelika.
"Uhulumende weZimbabwe kavumelani lokuqhubeka kufakwa izijeziso zenotho elimaza umnotho wethu. Ngokunjalo asijabuleli ukukhitshwa kwabanye kuluhlu lwezijeziso zenotho."
Uhulumende kaMongameli Joe Biden wethesa uMnangagwa labanye bakhe umlandu wokwephula amalungelo oluntu kanye lokuphatheka kunkohlakalo.
Noma-nje eleZimbabwe lona likhala ngokuthi akuphathisi kakhulu ukwesula ingxenye yezijeziso zenotho, uMongameli Hakainde Hichilema wakwele Zambia kanye loMongameli Mokgweetsi Masisi wakwele Botswana, bamukele ukwesulwa kwezinye izijeziso zenotho. UMasisi uthi inyathela leli liyathembisa.
“Kuyathembisa kakhulu. Yikho akade sikukhalela. Sikhuthaza eleMelika kanye leleZimbabwe ukuthi zihlale etafuleni ukuze kuyesulwe izijeziso zenotho ngokupheleleyo.”
Kodwa ocubungula ezombusazwe, uMnunzana Rejoice Ngwenya, uthi eleMelika alingeke livume ukukhulumisana lele Zimbabwe uma kulokunye okungafezwanga ngaphambi kokwesula zonke izijeziso zenotho.
“Angiboni eleMelika lingavuma ukuthi likhulumisane leleZimbabwe uma kukhona imigomo engalandelwayo. Kufanele kube khona ukubuswa kahle, ukungahlukuluzi abemabandla aphikisayo kanye lentathelizindaba.”
Ihofisi yeMelika ebona ngendaba zeAfrica, ibambe umhlangano ebulenjini namuhla, lapho egcizelele ukuthi kayisoze iyekethise phezu kwezijeziso zenotho eZimbabwe noma-nje abanye sebephuma kuloluhlu.
Ommele umsekeli kamabhalani kundaba zeAfrica kuhulumende weMelika, uMnunzana David Gainer uthi balokhe bekhathazekile ngesimo esikhona eZimbabwe.
"Indlela esiphatha ngayo udaba lweZimbabwe alukantshintshi, kodwa indlela esiphatha ngayo izijeziso zenotho isintshintshile. Siqhubeka sikhathazeka ngokungahlonitshwa kwelungelo loluntu kanye lenkohlakalo."
Uhulumende kaBiden uthi izijeziso ezintsha eziqinileyo zifakelwa labo abephula ilungelo loluntu njalo abaphatheka kunkohlakalo eZimbabwe.
Ekwesuleni izijeziso zenotho ezintsha lezi usebenzise imithetho yabomongameli eyethulwa minyaka yonke eyama Executive Orders. U Biden ufake ezinye njalo izijeziso zenotho eziphansi kohlangothi lukahulumende olubona ngemali lempahla yakwamanye amazwe olweOffice of Foreign Assets Control.
Izijeziso lezi ziphansi kohlelo lweGlobal Magnitsky Program olusekekwa lidale leCongress.
Abafakelwe izijeziso lezi ezintsha ababikwa besephula ilungelo loluntu njalo besenza ubukhohlakali bagoqela uMnangagwa, umkakhe uNkosikazi Auxilia Mnangagwa, umsekeli kamongameli uRetired General Constantino Chiwenga, labanye abakubandla leZanu PF kanye lamankampani ambalwa.
Forum