lngcwethi kwezempilakahle zikhuthaza uzulu ukuthi ananzelele ukumemetheka kwemikhuhlane evame ukwanda ngesikhathi sezulu kubangelwa yikusebenzisa amanzi angcolileyo.
Imikhuhlane le igoqela iCholera, Dysentry kanye leTyphoid.
Umongi uMnunzana Mbonisi Dube uchaza kabanzi ukuthi kuyini okwenza imikhuhlane le imemetheke.
"Amanzi ayimpilo kodwa ayathwala imikhuhlane engabulala kumbe ukugula okukhulu. Khathesi kusikhathi esiphila kuso kulento okuthiwa yiglobal warming, izulu selingana ngesikhathi okungamelanga line ngaso, lokhu lakho kuyabangela ukuthi imikhuhlane yande kumbe imemetheke kodwa zikhona indlela esingavikela ngazo imikhuhlane ebangelwa ngamanzi angcolileyo, okokuqala lonke ikhaya kumele lithole isambuzi ikakhulu emakhaya nxa kungela sambuzi ingcekeza igeleza isiya emfuleni kube sekungcolisa amanzi."
UDube uthi imikhuhlane le iyavikeleka nxa abantu bengazifundisa
"Okunye okungasivikela emkhuhlaneni yikugeza ngamanzi lesapa zihlambuluke ngoba izandla zethu ziyabamba indawo ezinengi ezingcolileyo lokugezisa izithelo before sizidla kanye lokuphekwayo.Eminye imikhuhlane leyi iyakwanisa ukuhlatshelwa njengabo typhoid amathuba abaphansi okuthi ubanjwe ngumkhuhlane lo .Abantu kuqakathekile ukuthi befundisa e nxa omunye elolwazi ngoba into esibulalayo yikuswela ulwazi."
Abahlali bakoBulawayo bathi balakho ukugula imikhuhlane ethwalwa ngamanzi ngenxa yengcekeza yabantu egcwele indawo ezinengi okokuthi kungana izulu ilakho ukuhlangana lamanzi anathwa ngabantu. UNkosikazi Melody Sithole isakhamuzi selokitshini leNketa uthi basengozini enkulu kakhulu yokugula ngesimo esibi ezindlini.
"Singakhangela ukuthi besikhala ngamasewer izulu lingakani khathesi ubuhlungu obuzabakhona yikuthi ngokuswelakala kwamanzi abantu sebezadanela emanzini ezulu amileyo ukugeza lokunye okuzakwe ukuthi besebenzise amanzi ayingcekeza kumemetheke imikhuhlane kakhulu. Okunye okukhona esikunanzelelayo yikuthi amasewer ageleza esiya ezikotsho asazi ukuthi kungenziwa mizamo bani ukuthi sivikeleke I kakhulu abantwana ngoba asingeke sihlale sibelusile.
UMnunzana Nqobile Ndlovu isakhamuzi seNketa uthi abantwana yibo abasengozi yokumemethekisa imikhuhlane etholakala emanzini.
“Izulu lisina lisenzani kodwa amasewer lawo ayendlala iyard yonke uclean ukhiphana lengcekeza ngikhulumanje ngicleanile uze ubone iblair toilet ingcono.lcholera imikhuhlane eminengi iyaphakama ngoba abantwabethu bakhulela edotini uzwe umtwana esebanjwe imikhuhlane etshiyeneyo ,iyamemetheka imikhuhlane ngoba abantwana abakwanisi ukuzivikela bayabamba ingcekeza kumemetheke ilizwe lonke leli sithwele nzima.”
Kusukela ngenyanga kaMabasa lonyaka abantu abahlolwa eZimbabwe batholakala belomkhuhlane wecholera bafika inkulungwane ezintathu lamakhulu ayisikhimbisa - 31,705 kuthi abangamakhulu ayisithupha - 683 balahlekelwa zimpilo.
Kunani lelo abantwana abaleminyaka yokuzalwa engaphansi kwetshumi lanhlanu bayisilinganiso sokungamatshumi amathathu ekhulwini - 31%, kuthi abalitshumi lane ekhulwini - 14% ngabantwana abangaphansi kweminyaka emihlanu.
Inhlanganiso yamazwe wonke jikelele eyeUNICEF kanye lohulumende weZimbabwe bathi bazimisele ukusebenzisana lozulu ukuthi umphakathi uthole amanzi ahlanzekileyo.
Forum