Izakhamizi zeCowdray Park zithi phezu kokuthwaliswa nzima yikuswelakala kwempompi ezithwala ingcekeza yezambuzini, umanisipala wako Bulawayo ubikwa esesithi kumele zihlawule inkulungwane ezintathu zamadola - $3,000 umuzi munye ngamunye andubana umsebenzi wokufaka lezompompi usungulwe.
Lanxa limali izabe ibhadalwa kancane kancane, izakhamizi zeCowdray Park zithi lokhu kwephula amalungelo azo ngoba zabhadalela ukufakwa kwempompi lezi kanye lamanzi kudala kodwa sokufunakala enye njalo imali.
UMnu. Gladman Mdawini, oyisikhulumeli sezakhamuzi, uthi iminyanka isiminengi kungela mpompi zengcekeza.
Uthi lokhu sokungabangela ukuqhamuka kwemikhuhlane enjenge sihudo seCholera.
“Thina inking esilayo njengezakhamuzi zeCowdry Park eHlalani Kuhle yikuthi sesileminyaka sathola indawo leyi ngingathi kusukela ngomnyaka ka2006 khathesi sesiku 2019 asila mpompi sokuthwala ingcekeza. Amanzi sekhona kodwa inkinga yikuthi abantu abala mali yokuthi babhadale abuye ezindlini.
“Kwagejwa indawo zasala zinjalo eminye seyaze yagqibeleka. Asisakwazi ukuthi kumele senzeni. Kumele iziphathamandla zekhansili zisizwele. Sesisesaba ukuthi ngokuya kwesikhathi nxa izulu lingana singacina sisiba lemikhuhlane enjenge Cholera ngoba abantu abanengi abala ama blair toilet baya egangeni. Sekuze kungasahambeki.”
Esinye isakhamuzi sendawo le, uNkosikazi Nothabo Ncube, uthi akusimlandu wabo ukuthi imali yawa isisindo.
“Mina ngizwa ubuhlungu ngendaba le eye sewer. Khathesi batshiya begebhile imigelo phambili kwezindlu zethu, silabantwana bayadlala … Sesibone ukuthi imigelo le isiyingozi kithi sayiqgibela. Ukuthi kuzalunga nini asisakwazi kodwa sabhadalela indawo yethu le lemeli le esiyikhiphayo akukhanyi ukuthi kuyangaphi lokhu.
“Kambe kunini lokhe singena ematoilet lawa angenziyo, abanye vele basebenzisa iganga. UHulumende kangenele kumbe ufuna ukusukuma abantu sebebanjwe yiCholera. Kangenele kungakabi lohlupho. ”
UMnu. Charlse Nzenzema, esinye njalo isakhamuzi seCowdray Park, uthi imali le okuthiwa bayikhiphe yikhansili sekungani umuntu uthenga istanda sakhe kabili.
Umsekeli wesikhulumeli sikamanisipala wakoBulawayo, uNkosazana uBongiwe Ngwenya, uthi abantu beCowdray Park kumele babhadale njengokuvumelana kwabo ukuze kulungiswe loluhlupho.
Uthe nxa bedonsela emuva ekubhadaleni imali efunakalayo bazibuyisela emuva.