Kuyaxokozela kubandla leZanu PF ngesikhathi kulungiselelwa umhlangano omkhulu owebandla leli oweAnnual National People’s Conference ozaqutshwa kusukela ngoLwesibili.
Okwamanje kulelunga lebandla leli eselitshiselwe iwofisi lelinye njalo elihlaselwe lisemzini walo yilabo okubikwa ukuba bafuna ukuthi uMongameli Emmerson Mnangagwa esuke embusweni kungafika umnyaka ka2028.
Ababili abahlaselwe ngabacatshangelwa ukuba ngamalunga ebandla leli ngumgcinisihlalo weZanu PF owesabelweni seHarare, uMnu. Goodwills Masimirembwa, lomsekeli wakhe uMnu. Ephraim Fundukwa, abasekela labo abafisa ukuba uMnangagwa aqhubekele phambili esembusweni kungafika umnyaka ka2028.
Kabakabotshwa abatshise iwofisi kaMasimbirembwa lengxenye yomuzi kaFundikwa.
Abatshise izindlu zamalunga la besebenzisa amabhomba epetulo kubikwa ukuba ngabasekeli bomsekeli kamongameli uMnu. Constantino Chiwenga, okuthiwa ukhangelele ukungena esikhundleni sikaMnangagwa.
Kasenelisanga ukukhuluma laye ngodaba lolu labanye abamsekelayo. Isikhulumeli samapholisa uCommissioner Paul Nyathi uthi sebehlolisisa okwenzakale ewofisini kaMasimirambwa kanye lemzini kaFundikwa.
"Sisaluhlolisisa udaba lolu. Sizalazisa ngokuya kwesikhathi.”
Uthithibele uMasimirembwa ngokwenzakala ewofisini yakhe.
“Kubuhlungu abakwenze lapha balimaza uguard kanzima. Ngabantu abalolunye lobanje ngingazi ukuba ngobani kodwa ye libonile okwenzakale lapha.”
UFundikwa walile ukukhuluma ngodaba lolu leStudio 7. Isikhulumeli sebandla leZANU PF, uMnu Farai Marapira, uthi akwenzakali ukuba bengahlasela amanye amalunga abo.
“Ibandla leZANU PF libambene njalo lilokuthula. Sizamelela inhlolisiso yamapholisa,kodwa lokhu akulani lebandla lethu.”
Kulimele obelinde amawofisi kaMasimirembwa eHarare ngesikhathi ihlaselwa ngabantu abangaziwayo. Ingcwethi kwezombusazwe zithi kunuka santungwana okwenzakala kubandla leli ngesikhathi kulungiselelwa umhlangano omkhulu ozaqhutshwa koBulawayo oweAnnual National People’s Conference, okulakho ukukhulunywa ngodaba lukaMnangagwa olukuhlala kumbe ukusuka embusweni. Eyinye yalezingcitshi nguMnu. Mqondisi Sibindi ofundisa ekolitshini yeUniversity of South Africa.
“Okwenzakala kuZANU PF akumelanga sikwahlukanise lomhlangano wabo abazawenzakuyonale iviki. Kulalabo abafuna ukuba uMongameli ahlale esikhundleni lalabo abathi isikhathi sakhe sesenele. Bayalwa. Ngakhoke ukudutshulwa kwakhe ngenye yezindlela zokutshengiselana ukuba ngubani olamandla.”
Okunhlanganiso yeZimbabwe Democratic Forum, uMnu. Rynold Ncube, uthi kuyethusa okwenzakala kubandla elibusayo.
“Lezi yizo indaba ze-factionalism esazibona ngesikhathi sika Mugabe. Kukhona abafuna ukwala lokho okutshiyo ngabanye ukuba uMnangagwa kabuse kuze kube nini lanini, yibo abazama ukukhuza oMasimirembwa ukuba bachume.”
UMnu. Liberty Makaripe ingcitshi ezimeleyo yena uthi kungabe kungamacele awebandla leZANU PF afuna ukuzwana amandla ikakhulu kudaba lokuba ngubani ozathatha isikhundla uMnangagwa engasuka embusweni.
“Lokhu kusegcekeni ukuba njengenhlalayenza sebeqalile ukwenza abakwejayeleyo abantu be ZANU. Bayalwisana njalo akumelanga thina sikungene lokhu.”
UMnangagwa usekhulume kathathu ngokuthi kafisi ukuqhubekela phambili esembusweni kodwa kulamalunga ebandla leZanu PF athi kumele ahlale esikhundleni. Amalunga la atshaya isilogani esithi ‘2030 uMnangagwa uzabe elokhu ekhona’.
Abakuphikisa lokhu batshaya phansi ngenduku besithi sokumele kungene omunye esikhundleni lesi. Bazatshukana kanganani emhlanganweni omkhulu ozayo ngodaba lolu kumbe lizaduma ledlule nje.
Forum