Abanye abatsha eZimbabwe bathi bathwele nzima ngenxa yesimo esibi somnotho lokunye okubenza behluleke ukuziphilisa. Bakhuluma amazwi la ngesikhathi kulungiselelwa ukunanza usuku lweRobert Gabriel Mugabe National Youth Day.
Abatsha abakhulume leStudio 7 bathi ilanga leli libalethela imicabango eminengi ngoba kunzima ukulithakazelela belambile, bengela misebenzi, abanye bechapha imingcele besiya kwamanye amazwe lokunye okubathwalise nzima.
Usuku lolu lonyaka luzathakazelelwa koBulawayo phansi kwesihloko esithi: Empower Youth, Secure the Future.
Kukhangelelwe ukuba kube labantu abafika inkulungwane ezimbili – 20,000 abazahamba emkhosini lo ozakhokhelwa nguMongameli Emmerson Mnangagwa eBarbourfields Stadium. Abatsha abanengi bathi lokhu akusoze kubancede ngitsho lakancane. Omunye wabakhala ngenhlupho ababhekane lazo nguOnias Dube, othengisa impahla etshiyeneyo eHarare.
“Usuku lolu luthunuka amanxeba obuyanga esibhekane labo kuleli ngoba impilo yethu ingeyikugijinyiswa ngamapholisa lokuhlala singela mali ezikhwameni,”kutsho uDube.
URosermary Nyathi ukusimo esifanayo.
“Ilanga leli liyisikhumbuzo sendubo zethu ezifana lokuswelakala kwemsebenzi, ubuyanga lokunye. Sithi ngabe uhulumende uyakhenga indubo zethu hatshi ukusicabanga kuphela nxa efuna amavoti,” kugcizelela uNyathi.
Banengi abatsha abathwele nzima eZimbabwe. USimbarashe Maringosi laye uthwele amagabha avuzayo.
“Njengabatsha kunzima ikakhulu kwezamabhizimusi akungeneki ngenxa yemithelo esiyibekelwa ngu hulumende sikhathi sonke. Ngabe ngelanga leli uyasibuza indubo lezi silungisise,” kutsho uMaringosi.
Amazwi kaSimbarashe agcizelelwa nguGilbert Tshuma yena othi abatsha kabasela themba empilweni ngakho-ke kumele uhulumende angenele.
“Impilo yethu ayilathemba kangako ngoba izifiso zethu azikho emicabangweni kahulumende yikho esikukhumbulayo ngelanga leli,” kukhulume u Tshuma.
: Kodwa omunye njalo osakhulayo uCuthbert Mdlongwa uthi kumele abatsha besebenzise ilanga leli ukuphuma lamacebo atshiyeneyo awokwenza ukuba impilo zabo zibe ngcono.
“Lobanje kulobunzima elizweni thina esikufunayo yikuba abatsha basebenzise itechnology ukuza lemicabanga etshiyeneyo ngoba yithi esisalemicabango emitsha. Ngelanga leli yikho okumele sikukhangelisise.”
Osakhulayo olilunga lebandla leZanu PF, uTendai Phiri, uthi ngamanga aluhlaza tshoko ukuthi abatsha bathwele nzima eZimbabwe.
“Uhulumende uyakhangela imsebenzi eyenziwa ngabatsha kuleli, yikho kulelanga leli lona elenza ukuba sibuthane sihlaziye okusihluphayo njalo sinikane amacebo.” kutsho uPhiri.
Usuku lweRobert Gabriel Mugabe National Youth Day luzananzwa ngesikhathi abanye abatsha besithi akukho okubambekayo elizweni. Usuku lolu, olwalusaziwa ngokuthi yi21st February Movement, lwalungolokuthakazelela usuku lokuzalwa kowayengumongameli uRobert Mugabe, owasuswa libutho esikhundleni ngomnyaka ka2017.
Forum