Uhulumende uthi uqoqa umkhosi omkhulu ozaqhutshwa ngeviki ezayo mhlaka 21 kuyonale inyanga eLupane lapho okuzathi gwaqa abatsha abavela kuzigaba zonke zelizwe, kanye lomongameli Emmerson Mnangagwa, becubungula amaqhinga okwenqabela ukusetshenziswa kwezidakamizwa, osokubhahile elizweni.
Lokhu kuvezwe lugatsha lukahulumende olubona ngokwethulwa kwembiko ngemva komhlangano wabaphathintambo bakahulumende i-cabinet meeting, eqhutshwe izolo kusihlwa.
Umhlaka 21 kuNhlolanja lilanga lokunanza imisebenzi yabatsha minyaka-yonke, eleRobert Mugabe National Youth Day. Umhlangano lo uqoqwa lugatsha olubona ngokuphathelane labatsha lumanyene lezinye ingatsha zikahulumende.
Ukuze sicubungule ukuqakatheka kwalelilanga, uSithandekile Mhlanga weStudio 7 uxoxe loMnu. Kudakwashe Munsaka, ilunga lebandla leZANU PF eMatabeleland North.
