HARARE - Inkantolo yeHigh Court ngoLwesihlanu yalile njalo ukukhulula umeli weZengeza West edale lephalamende, uMnu Job Sikhala, ngemali yesibambiso, i-bail.
Lokhu ngokwesitshiyangalombili, 8, imithethwndaba isala ukukhulula uSikhala kulandela ukubotshwa kwakhe labanye bakhe ebebandla leCCC kunyanga phose ezinhlanu ezedluleyo.
Esethula isinqumo sakhe, umahluli weHigh Court, uJustice Rogers Manyangadze wale ukukhulula uSikhala esithi akulalutho osoluguqukile kuzizatho ezibangele ukuthi ancitshwe i-bail yinkantolo kamantshi kanye leHigh Court kuzicelo zakhe eziyisikhombisa azikhweze kulawamadale kusikhathi esedluleyo.
Amagqwetha kaSikhala ebecele uJustice Manyangadze ukuthi elahle isinqumo sikamantshi esokwala ukumkhulula ngoba esithi kukhona obesokuguqukile kulandela ukuncitshwa kwakhe i-bail kuqala.
Amagqwetha la ebethe njalo ukuvalelwa lokuncitshwa i-bail kukaSikhala lomeli weChitungwiza North edale lephalamende uMnu Godfrey Sithole, kanye lamanye amalunga eCCC alitshumi lane kubangela ukuthi uzulu weZimbabwe elahlekelwe lithemba kundlela imithethwandaba yeZimbabwe eqhuba ngayo umsebenzi.
Kodwa umahluli uthe kumele kulandelwe umthetho kungelani lokuthi abantu bacabangani.
Uphinde wathi isizatho sokuba i-video kaSikhala esetshenziswa nguhulumende ekumetheseni icala lokushotshozela udlakela kayifakwanga nguye ebulenjini be-internet kasilandaba ngoba idale likhangela amazwi akhe, hatshi ukuthi achaywa ngubani.
USikhala labanye bakhe betheswa icala lokutshotshozela udlakela olwaqhamuka eNyatsime kulandela ukubhubha kwelunga leCCC uNkosazana Moreblessing Ali, yena ocatshangelwa ukuba wabulawa ngabantu beZanu PF.
Babotshwe mhlaka 14 ngoNhlangula, okutsho ukuthi sebezafikisa inyanga ezinhlanu bevalelwe.
Igqwetha likaSikhala, uMnu Jeremiah Bamu, usole kakhulu isinqumo sikaJustice Manyangadze esithi sokusobala ukuthi imithethwandaba yeZimbabwe ayisaqhubi kuhle umthetho, ikakhulu kundaba eziphatha amalunga ebandla eliphikisayo eleCCC.
Umsekeli wesikhulumeli seCCC, uMnu Felix Magalela Mafa, utshele iStudio 7 ukuthi njengebandla, bazakwenza konke okusemandleni abo ukuba uSikhala akhululwe.
Ilunga leZanu PF, uMnu Matthew Sibindi, yena othe uSikhala watshotshozela udlakela, ngakho kumele ahlale ejele.
USikhala uzaqhubeka evalelwe njalo aphindele emthethwandaba mhlaka 15 kulinyanga lapho umahluli athi icala lakhe lizathethwa khona.
