Kusehlakalo esitshiye abanengi bekhuza umhlola, amapholisa athi abophe untombazana oleminyaka elitshumi lasithupha, 16, ogwaze wabulala owesilisa ngengqamu ngemva kokuxabana e-shabhini lapho ababenathela khona.
Linkemenkeme yenzakalele eHatcliffe, eHarare.
Isikhulumeli samapholisa uMnu Paul Nyathi kabethanga umsolwa ngegama ngoba engumntwana ongakabi leminyaka yokuzalwa efika kwelitshumi lasitshiyangalombili, 18.
Obhubhileyo nguMnu Amon Mhere obeleminyaka engamatshumi amathathu lanhanu, 35.
UNyathi uthi ababili laba banatha kakubi eShabhini ngoLwesithathu basebexabana.
Uveze njalo ukuthi uMhere wafela endlini yomsolwa lapho umsolwa amgwazela khona. Isehlakalo lesi siza ngesikhathi abantu abanengi bekhala ngokuthi sokugcwele indawo zokunathela ezingekho emthethweni lapho abasakhulayo abadakwa bazikhohlwe besebenzisa izidakamizwa.
Sixoxe lomeli weSoutherton ephalamende uMnu Peter Moyo.
